गलातियों 6

इक्क दूए री मदद करो

1ओ संगी विश्वासियों, जे अगर कोई मणू कुसकी गलत कम्म करदा पकड़ेया भी जाओ, तां तुसा मणू जे पवित्रात्मा रे कहे मुताबिक चलदे, निम्तेपन कने इदेय मणू जो सही रस्ते पर वापिस लेयो, ते अपणे तांइ भी चुकन्ने रेयो ताकि तुसा पाप करणे री परिक्षा बिच ना पेई जाओ। 2तुसा मुसीबत बिच इक्क-दूए री मदद करेया करो ते इसी तरिक्के कने तुसा मसीह रे हुकमां जो पूरा करो। 3किजोकी जे अगर कोई सोचदा कि से कोई खास मणू है पर हकीकत बिच से नी है, तां से अप्पु जो धोख्खा देया करदा है। 4पर हर इक्क जणा अपणे-अपणे कम्मां जो परखी लै कि से ठीक हिन कि नी। जे अगर तिन्हेरे कम्म सही होए तां से अप्पु तांइ गर्व करी सकदे पर तिन्हा जो अपणे कम्मां जो दूज्जेयां कने बराबरी ना करे। 5किजोकी असी सारे जणे अपणे-अपणे कम्मां तांइ जिम्मेवार हिन। 6जे मणू परमेश्वर रे वचन री शिक्षा पाया करदे हिन, तिन्हा जो हर इक्क ठीक चीजां अपणे सिखाणे वालेयां कने बडंणी चाएदी। 7धोख्खे बिच मत रेयो, कोई भी परमेश्वर जो बेवकूफ नी बणाई सकदा। किजोकी मणू जे किच्‍छ भी बांदे, तिन्हा ने से ही बडणा। 8किजोकी जे कोई अपणे सरीर री बुरी इच्छां जो पूरा करदा, तिसेरा अंजाम हमेसा री मौत होणा। ते जे कोई पवित्रात्मा रे कहे मुताबिक चलदा तां पवित्रात्मा तिसजो हमेसा री जिन्दगी दिंदे। 9असा जो नेक कम्म करणे तांइ हिम्मत नी छडणी चाएदी, किजोकी जे अगर असी हिम्मत ना छड्डे तां असा ने परमेश्वर रे ठैहराए रे समय पर ईनाम पाणा। 10इधेरे तांइ जित्ते तक भी मौक्का मिल्लो असा जो सारे लोक्कां कने भलाई करणा चाएदी, खास कर संगी विश्वासियां कने।

आखरी नमस्ते

आखरी चितौणी अते नमस्ते

11ध्यान देयो कि मैं किन्ने बड्डे-बड्डे अक्षरां बिच तुसा जो अपणे हत्थां कने लिख्खे रा है। 12जे मणू सिर्फ बाहरी दिखावा करदे, से ही मणू तुसा पर खतना कराणे रा दवाब पांदे। से इधेरे तांइ इय्यां करदे ताकि मसीह रे सुली रा बसेख सुनाणे री वजह कने तिन्हा पर जुल्म ना हो। 13किजोकी यहूदी विश्वासी जो अप्पु ता मूसा रे कानून पर नी चलदे, पर तुसा रा खतना इधेरे तांइ कराणा चाह्‍ंदे कि तुसा रे सरीर री हालत पर घमंड करण। 14पर मैं कदी भी मसीह री सुली री मौत जो छड्डी करी होर कुसकी गल्ल पर घमंड नी करणा चाह्‍ंदा। मसीह यीशु रे सुली पर मरणे री वजह कने मैं अवे दुनिया री बुरी इच्छां रा गुलाम नी है, ते तिन्हा बुरी इच्छां का मेरे पर राज करणे तांइ होर ताकत नी है। 15किजोकी खतना होणे या ना होणे कने परमेश्वर जो कोई फरक नी पैंदा, पर इक्क नौई रचना बणी जाणा जरुरी है। 16जिन्ने मणू इन्हा सारे नियमां पर चलदे, तिन्हा लोक्कां जो परमेश्वर ने सांती अते आशीष दैणी। से परमेश्वर रे चुणे रे मणू हिन। 17इसका बाद कोई भी मेरे जो होर परेशान ना करे, किजोकी मेरे सरीर पर जे दाग हिन से इस गल्ल जो दर्शांदे कि मैं मसीह रा सेवादार है। 18ओ संगी विश्वासियों, असा रे प्रभु यीशु मसीह रा अनुग्रह तुसा कने बणी रेयो। आमीन!

Currently Selected:

गलातियों 6: CDHNT

Highlight

Compare

Copy