प्रेरितां रे कम्म 11

पतरस रा अपणे कम्मां री सफाई दैणा

1जे प्रेरित ते संगी विश्वासी ने यहूदियां प्रदेश बिच रैहन्दे थिये, तिन्हा ने सूणेया कि गैर यहूदियां ने भी परमेश्वर रे वचन जो मन्नी लेया। 2अते जां पतरस यरुशलेम सहर बिच आया, ते यहूदी विश्वासी तिस कने बहस करणा लग्गे 3कि तू गैर यहूदी घरे गेया ते तिन्हेरे कने खाया-पित्तेया, 4तां पतरस ने तिन्हा जो सुरु का इक्क-इक्क गल्ल दस्सी, 5कि मैं याफा सहर बिच प्रार्थना करेया करदा थिया, ते बेहोश होई करी दर्शन दिख्खेया, कि इक्क बड्डी चाद्दर सांई चारो कुणे का लटकेरा, आसमान का उतरी करी मेरे का आया। 6जां मैं तिस पर ध्यान दित्तेया, तां दुनिया रे सारे चार पैरा अते जंगली जानवर ते रेंगणे वाले जीव-जन्तु ते आसमान बिच उड़ने वाले पखेरु दिख्खे 7ते ए अवाज भी सुणी कि ओ पतरस उठ मार अते खा 8मैं बोल्लेया, नी प्रभु कदी भी नी, किजोकी कोई भिठ्ठी चीज मैं कदी नी खाई। 9इस जवाब बिच आसमान का दूज्जी वरी अवाज आई, कि जे किच्‍छ परमेश्वर ने सुच्चा कित्तेया है तिसजो असुच्चा मत बोल 10तीन्न वरी इय्यां ही होया, तां फिरी सब किच्‍छ आसमान जो खिच्ची लित्तेया 11ते तिस्सी बेल्ले कुरनेलियुस रे भेज्जे रे त्रै मणू कैसरिया कस्बे का मेरे का आई गे। 12तां पवित्रात्मा ने मेरे जो तिन्हा कने जाणे जो बोल्लेया, ते ए छे भ्याल मेरे कने चली पे, अते असी तिस मणू रे घरे आये। 13ते तिन्ने दस्सेया कि, मैं इक्क स्वर्गदूत जो अपणे घरे खड़ा दिख्खेया, जिस ने मेरे जो बोल्लेया, कि याफा बिच मणूआं जो भेजी करी शमौन जो जिस जो पतरस भी बोलदे जो सद्दी लेईया। 14तिन्ने तुसा कने इदेइ गल्लां बोलणी, जिन्हा कने परमेश्वर ने तिज्जो तेरे पूरे टब्बर जो छुटकारा दैणा। 15जां मैं गल्लां करणे लग्गेया, तां पवित्रात्मा तिस्सी ही तरिक्के कने उतरेया, जिस तरिक्के कने पिन्तुकुस्त रे दिन पर असा पर उतरेया थिया। 16तां मेरे जो प्रभु रा से वचन चेत्ता आया, जे तिन्हा ने बोल्लेया थिया, कि यूहन्ना ने तां पाणी कने बपतिस्मा दित्तेया थिया, पर तुसा ने पवित्रात्मा कने बपतिस्मा पाणा 17हलांकि तिन्हा जो भी से ही दान मिल्लेया, जे असा जो मसीह यीशु पर विश्वास करणे रे जरिए मिल्लेया थिया, तां मैं कुण है जे परमेश्वर जो रोकी सकदा? 18ए सुणी करी, यहूदी विश्वासी चुप रे, ते परमेश्वर री बड़ाई करी के बोलणा लगे, तां परमेश्वर ने गैर यहूदियां जो भी हमेसा री जिन्दगी बिच तांइ अपणे पाप्पां का तौबा करणे ते मसीह यीशु पर विश्वास करणे रा मौक्का दित्ता।

अन्ताकिया री कलीसिया

19स्तिफनुस रे मारे जाणे रे बाद, विश्वासियां पर बड़ा जुल्म कित्तेया गेया जिस कने से बिखरी करी फीनीके ते साइप्रस ते अन्ताकिया बिच जाई पूज्जे, पर यहूदी लोक्कां जो छड्डी करी होर कोई भी तिन्हेरे मसीह यीशु रा सुब बसेख नी सुणादे थिये। 20पर तिन्हा बिच का किच्‍छ साइप्रस द्वीप ते कुरेनी प्रदेश रे रैहणेवाले मणू थिये, जे अन्ताकिया सहर अन्दर आई करी यूनानियां जो भी प्रभु यीशु री सुब बसेख रा सूणाणा लग्गे। 21ते प्रभु री ताकत तिन्हा पर थिया, ते मते सारे गैर यहूदी मणू प्रभु यीशु पर विश्वास करणा लग्गी पये। 22तां तिन्हेरी चर्चा यरुशलेम री कलीसिया ने सूणी, ते तिन्हा ने बरनबास जो अन्ताकिया सहर जो भेज्जेया। 23से तित्ते पूज्जी करी परमेश्वर रे अनुग्रह जो दिख्खी करी बड़ा खुस होया ते सब जो शिक्षा दित्ती की तन मन लगाई करी प्रभु यीशु कने लिपटी रेयो, 24बरनबास इक्क भला मणू थिया, ते पवित्रात्मा रे वस बिच थिया, ते बड़े मणूआं ने प्रभु जी जो अपणाया 25तां से शाऊल #11:25 ए इक्क इब्री नां है।जो तोपणे तरसुस कस्बे जो चली गेया, 26ते जां तिन्हा कने मिल्लेया तां से तिन्हा जो अन्ताकिया सहर लेई आया, ते इय्यां होया कि पौलुस #11:26 इसी पौलुस जो पैल्ले शाऊल बोल्लेया जांदा थिया।ते बरनबास इक्क साल तांइ कलीसिया कने मिलदे ते बड़े जणेया जो मसीह यीशु रा उपदेस दिंदे रे, ते चेल्लेया बिच सबका पैल्ले अन्ताकिया बिच मसीही बोल्लेया गेया। 27तिन्हा ही रोज्जा बिच किच्‍छ विश्वासी मणू जे भविष्यद्वक्ता भी थिये, यरुशलेम सहर का अन्ताकिया सहर जो आये। 28तिन्हा बिच का अगबुस नां रे इक्क भविष्यद्वक्ता ने खड़े होई करी पवित्रात्मा रे गलाये ए दस्सेया, कि सारे रोम साम्राज्य बिच इक्क बड्डा अकाल पैणा, ते से अकाल क्लौदियुस सम्राट रे राज रे दौरान पेया। 29तां चेल्‍लेयां ने फैसला लित्तेया, कि हर इक्क अपणी-अपणी पूंजी रे हिसाब कने यहूदियां प्रदेश बिच रैह्णे वाले हर इक्क संगी विश्वासी री सेवा तांइ किच्‍छ ना किच्‍छ भेजण। 30ते तिन्हा ने तिय्यां ही कित्तेया, ते बरनबास ते शाऊल रे हत्थां बुजुर्ग मणू का किच्‍छ पैसे भेजी दित्ते।

Currently Selected:

प्रेरितां रे कम्म 11: CDHNT

Highlight

Compare

Copy