प्रेरितां रे कम्म 12

पतरस रा जेल का निकलणा

1तिस बेल्ले हेरोदेस राज्जे ने कलीसिया रे केई मणूआं जो दुख दैणे तांइ तिन्हा जो कैदी बणाई लित्ता। 2तिसने प्रेरित यूहन्ना रे भ्याल याकूब जो तलवार कने मरवाई छड्डेया। 3ते जां तिसने दिख्खेया, कि यहूदी मणू तिसका खुस हुन्दे, तां तिसने पतरस जो भी पकड़ी लेया, से रोज अखमीरी रोट्टी रे त्योहर रे रोज थिये। 4ते तिसने पतरस जो पकड़ी करी जेल बिच पाई दित्तेया, ते रखवाली तांइ, चार-चार सपाईयां रे चौं पहरा बिच रख्खेया इस इच्छा बिच कि से फसह रे त्याहार रे बाद तिसजो मणूआं रे सामणे तिस पर मुकद्दमा करे। 5जेल बिच काफी दिनां तांइ पतरस पर पैहरा लाया गेया थिया, पर कलीसिया, तिसेरे तांइ लौ लाई करी परमेश्वर का प्रार्थना करेया करदी थी। 6ते जां हेरोदेस तिसजो लोक्कां सामणे लियाणे जो थिया, तां तिसका इक्क रात पैल्ले पतरस दो संगलां कने बनितेरा दो सपाईयां रे बिच सोया करदा थिया, ते रखवाली करणे वाले दुआर का जेल री रखवाली करेया करदे थिये। 7ते तिस्सी बेल्ले प्रभु रा इक्क स्वर्गदूत पतरस रे नेड़े आई करी खड़ा होया ते तिस कोठरी बिच लौ चमकी ते तिसने तिसेरी पसली पर हत्थ मारी करी तिसजो जगाया, ते बोल्लेया, उठ फुर्ती मार, ते तिसेरे हत्थ का संगलां खुली करी पेई गई। 8तां स्वर्गदूत ने तिसजो बोल्लेया, तैयार होई जा, अपणे जूत्ते पाई लै, तिसने तिय्यां ही कित्ता, फिर स्वर्गदूत ने तिसजो बोल्लेया, अपणा चोग्गा पाई करी मेरे पीच्छे चल। 9से निकली करी तिसेरे पीच्छे चली गेया पर ए नी जाणदा थिया, कि जे किच्‍छ स्वर्गदूत बोल्लेया करदा है, से सच्ची ही होया करदा है, पर ए समजेया, कि मैं दर्शन दिख्खेया करदा है 10तां से पैल्ले ते दूज्जे पहरे का निकली करी लोये रे दुआर का पूज्जे, जे सहर पास्से थिया, से तिन्हा तांइ अपणे आप ही खुली गेया, ते से निकली करी इक्क ही गली होई करी गे, इतणे बिच स्वर्गदूत तिसजो छड्डी करी चली गेया। 11तां पतरस ने होश बिच आई करी बोल्लेया, अवे मेरे जो सच्ची पता लग्गी गेया कि प्रभु ने अपणा स्वर्गदूत भेजी करी मेरे जो हेरोदेस रे हत्थां का बचाई लेया, ते यहूदी अधिकारियां री उम्मीद तोड़ी दित्ती। 12ते ए सोची करी कि परमेश्वर ने तिसजो हेरोदेस रे हत्थां का बचाए रा है, से तिस यूहन्ना जिस जो मरकुस भी बोलदे, तिसेरी मां मरियम रे घरे गेया। तित्ते बड़े विश्वासी मणू इकट्ठा होई करी प्रार्थना करेया करदे थिये। 13जां तिसने दुआर जो खटखटाया, तां रुदे नां री इक्क भक्तणी दिखणे जो आई 14ते पतरस री अवाज सुणी करी पछाणी लेया, ते खुसी रे मारे दुआर भी नी खोल्लेया, पर दौड़ी करी अन्दर आई ते अन्दर तिन्हा जो दस्सेया कि पतरस दुआर पर खड़ा है 15तिन्हा ने तिसजो बोल्लेया, तू पागल है, पर से निडर होई करी बोलणा लग्गी कि से पतरस ही है, तां तिन्हा लोक्कां ने बोल्लेया, “तिसेरा स्वर्गदूत होणा।” 16पर पतरस दुआर खटखटांदा ही रेया, ते तिन्हा दुआर खोल्लेया, ते तिसजो दिख्खी करी हैरान होई गे। 17तां तिसने हत्थां कने इसारा कित्तेया कि, से चुप रैह्ण, ते तिन्हा जो दस्सेया, कि प्रभु जी ने कुस तरिक्के कने मेरे जो जेल का कड्डेया, ते फिरी बोल्लेया, कि याकूब रे भ्यालां जो ए गल्ल बोल्ली देयां, तां से निकली करी दूज्जी जगाह् चली गेया 18भ्यागा-भ्यागा ही सिपाहियां बिच बड़ी अफरा-तफरी पेई गई, कि पतरस कुते गेया? 19जां हेरोदेस ने तिसेरी तोप रा हुकम दित्ता ते तां भी पतरस नी मिल्लेया, ते पैहरेदारां री जांच-पड़ताल रे बाद ए हुकम दित्तेया गेया कि तिन्हा जो मारी दित्तेया जाये, इसका बाद हेरोदेस ने यहूदियां प्रदेश जो छड्डी करी कैसरिया सहर बिच जाई करी रैह्णे लग्गेया।

हेरोदेस री मौत

20हेरोदेस राज्जा सूर अते सैदा रे सहर रे मणूआं का गुस्सा थिया। से मणू इक्क मन होई करी हेरोदेस का आये ते बलास्तुस नां रे राज्जे रे इक्क कर्मचारी जो मनाई करी मेल कराणा चाहंदे थिये। किजोकी राज्जे रे देसां कने ही तिन्हेरे देसां रा पालण पोषण हुन्दा थिया। 21ते तिस दिन जां हेरोदेस ने तिस सहर रे लोक्कां कने मिलणे री योजना बणाए री थी, हेरोदेस राजपहनावा पाई करी हिसाब-किताब री गद्दी पर बैठ्ठेया ते तिन्हा जो समझाणे लग्गेया। 22ते मणू बोल्ली पे, कि ए तां मणू रा नी पर परमेश्वर रा वचन है 23प्रभु रे इक्क स्वर्गदूत ने तिस्सी बेल्ले हेरोदेस जो मारेया ते से कीड़े पेई करी मरी गेया, किजोकी तिनिये परमेश्वर री महिमा नी कित्ती 24पर परमेश्वर रा वचन ते फैलदा गेया ते विश्वासियां री गिनती हर दिन बदधी गयी। 25जां बरनबास ते शाऊल अपणी सेवा #12:25 इस जगाह् से मणू तिस कलीसिया जो पैसे रे जरिए मदद करी के सेवा करेया करदे थिये।पूरी करी बैठ्ठे, तां यूहन्ना जिस जो कि मरकुस भी बोल्दे कने लेई करी यरुशलेम का हटी आये।

Currently Selected:

प्रेरितां रे कम्म 12: CDHNT

Highlight

Compare

Copy