1 थिस्सलुनीकियों 5
5
यीशु रे दुबारा आणे पर तैयार रैह्णा
1पर ओ संगी विश्वासियों, तुसा जो ए लिख्खे करी दसणे रा कोई फायदा नी है कि मसीह यीशु ने कधाड़ी हटणा ते ए सारी गल्लां कधाड़ी होणी। 2किजोकी तुसा अप्पु ठीक तरिक्के कने जाणदे कि जिय्यां कुसकी जो भी चोर रे आणे रा पता नी हुंदा तिय्यां ही प्रभु यीशु रे हटणे रा भी समय भी होणा। 3जां मणू बोलदे होणे, सब ठीक है ते चिंता री कोई गल्ल नी है, तां चाणचक्के ही मुसीबतां ने तिन्हा पर इक्क-दम ही इय्यां आई पैणा जिय्यां कुसकी दुपराणी जनानी जो पीड़ां लग्गी पैंदी ते तिन्हा ने कुसकी भी तरिक्के कने तिस मुसीबत का नी बची सकणा है। 4पर ओ संगी विश्वासियों, तुसा तां इन्हा गल्लां रे बारे बिच अनजाण नी हिन किजोकी तुसा बुराई जदेय न्याहरे बिच नी हिन कि प्रभु रे हटी आणे रा से समय तुसा पर चोर सांई चाणचक्के ही आई पेयो। 5किजोकी तुसा सारे दिन री लौ जदेय धार्मिकता रे मणू हिन।#5:5 रौसनी ते दिन रे मणू हिन। असी न्याहरे जैसी बुराई ते रात रे मणू नी हिन।#5:5 जे मणू अपवित्रता री जिन्दगी जिन्दे। 6इधेरे तांइ असी दूज्जेयां सांई प्रभु रे आणे रे समय तांइ सोन्दे ते बगैर तयारी रे ना रैह्ण, पर जागदे होए ते चुकन्ने रैह्ण। 7किजोकी जे सोन्दे से रात्ती ही सोन्दे, ते जे मतवाले हुन्दे, से रात्ती ही मतवाले हुन्दे। 8ते जे असी दिन जदेय धार्मिकता रे मणू हिन, असा जो प्यार ते विश्वास जो अपणी रक्षा तांइ लैणी चाएदी, जिय्यां इक्क सिपाई अपणी रक्षा तांइ इक्क झीलम जो पांदा, ते इस आस रे टोप जो तिस सिपाई सांई पाई करी इस उम्मीद बिच चुकन्ने रैह्णा चाएदा कि असी हमेसा री सजा का बचाए गेरे हिन। 9किजोकी परमेश्वर ने असा जो अपणे गुस्से बिच सजा दैणे तांइ नी चुणे रा है पर मसीह यीशु रे जरिए छुटकारा पाणे तांइ चुणे रा है। 10प्रभु यीशु मसीह असा तांइ इधेरे तांइ मरे ताकि भले ही असी जिन्दे होण या मरी गेरे होण पर जां यीशु मसीह हटी करी आए तां असी तिन्हा कने मिली करी जीण। 11इधेरे तांइ इक्क-दूज्जे जो उत्साहित करो ते परमेश्वर बिच विश्वास करणे बिच बधणे तांइ मदद करो, जदेया कि तुसा करदे भी।
आखरी सलाह अते नमस्ते
कलीसिया जो उपदेस
12ओ संगी विश्वासियों, असी तुसा का बिनती करदे कि जे मणू तुसा बिच मैहनत करदे, ते मसीह बिच तुसा रे अगुवे हिन, ते जे तुसा विश्वास री शिक्षा दिन्दे, तिन्हेरी गल्लां मन्नेया करो। 13जे कम्म से मणू तुसा तांइ करदे तिन्हा कम्मां री वजह कने तिन्हेरी इज्जत ते तिन्हा कने प्यार करो। अप्पु-मिते इक्क-दूए कने खरा बर्ताव करेया करो। 14ओ संगी विश्वासियों, असी तुसा का घड़ी-घड़ी बिनती करदे कि आलसी लोक्कां जो सावधान करो, डरपोक लोक्कां जो हिम्मत देयो, कमजोर लोक्कां री मदद करो ते सारेयां कने सबर कने रेयो। 15चुकन्ने रेयो कि कोई कुसकी कने बुराई रे बदले अन्दर बुराई ना करो पर हमेसा ठीक कम्म करणे तांइ हमेसा तैयार रेयो, अप्पु-मित्ते ते सबणी कने भी भलाई री ही कोसीस करो। 16हमेसा खुस रेयो। 17लगातार प्रार्थना अन्दर ही लग्गी रेयो 18हर हालात बिच परमेश्वर रा शुकर करो किजोकी तुसा तांइ मसीह यीशु बिच परमेश्वर री ए ही मर्जी है। 19पवित्रात्मा जो लोक्कां री जिन्दगी बिच कम्म करणे का मत रोक्को। 20जे भविष्यवाणियां परमेश्वर ने लोक्कां पर ज़ाहिर कित्ते री हिन तिन्हा जो नक्कारो मत। 21हर बसेख जो परखो, ते जे बसेख परमेश्वर रे पास्से का हिन तिन्हा जो अपणाई लेयो। 22हर तरिक्के री बुराई का बची रेयो।
आशीर्वाद
23ते परमेश्वर जे तुसा जो सांती दिंदे अप्पु ही तुसा जो पूरे तरिक्के कने पवित्र करण ते असा रे प्रभु यीशु मसीह रे हटी आणे तिकर तुसा री पूरी आत्मा ते पूरे प्राण ते पूरा सरीर कने बेकसूर ते सुरक्षित रे। 24परमेश्वर ने इय्यां ही करणा किजोकी परमेश्वर जिन्हा ने तुसा जो सद्दे रा है से विश्वासयोग्य हिन। 25ओ संगी विश्वासियों, असा तांइ प्रार्थना करो। 26मसीह रे प्यार बिच सारे संगी विश्वासियां जो प्रणाम करो। 27मैं तुसा जो प्रभु रे नां कने हुकम दिंदा कि ए चीठ्ठी सबणी विश्वासियां जो पढ़ी करी सूणाई देयो। 28असा रे प्रभु यीशु मसीह रा अनुग्रह तुसा पर हुंदा रेयो।
Currently Selected:
1 थिस्सलुनीकियों 5: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
