1 थिस्सलुनीकियों 4

परमेश्वर जो खुस करणे वाली इक्क जिन्दगी

जिन्दगी जे परमेश्वर जो खुस करे

1आखिरकार, संगी विश्वासियों, असी तुसा जो मसीह यीशु बिच जोर पाई करी समझांदे कि इदेइ जिन्दगी जियो जिस कने परमेश्वर खुस हो, जिय्यां तुसा जिया भी करदे हिन ते असी तुसा होर बदिया जिन्दगी जीणे तांइ उत्साहित करदे। 2किजोकी तुसा जो याद है कि असी तुसा जो मसीह यीशु रे नां बिच कै सिखाए रा है। 3किजोकी परमेश्वर री ये मर्जी है कि तुसा व्यभिचार ना करो ते पवित्र बणो। 4तां तुसा बिच का हर इक्क जणे ने अपणे सरीर जो काबू बिच रखणा ते पवित्रता ते आदर कने जीणा। 5ते तुसा अन्यजाती लोक्कां सांई वासना बिच पेई करी जिन्दगी मत जियो जे परमेश्वर जो नी जाणदे। 6कि तुसा अपणे विश्वासी भाई रे खिलाफ पाप मत करदे, ते ना जो बुरी चाल चले किजोकी प्रभु यीशु ने इदेय कम्म करणे वालेयां जो सजा दैणी, जिन्हा रे बारे बिच असा तुसा जो पहले ही खबरदार कित्तेया है। 7किजोकी परमेश्वर ने असा जो अपवित्रता री जिन्दगी जीणे तांइ नी पर पवित्रता री जिन्दगी जीणे तांइ सद्दे रा है। 8जे मणू इन्हा शिक्षाओं जो नी मनदा से कुसकी इन्सान जो नी पर परमेश्वर जो तुच्छ मनदा जे तुसा जो अपणा पवित्रात्मा दिंदे। 9पर मेरे जो चीठ्ठी लिख्खी करी तुसा जो संगी विश्वासियां कने प्यार रखणे तांइ दसणे री जरुरत नी है, किजोकी से तुसा अप्पु परमेश्वर का सिख्खे रा है। 10ओ संगी विश्वासियों, तुसा पैल्ले ही मकिदुनिया प्रदेश बिच रैह्णे वाले सारे संगी विश्वासियां पर अपणा प्यार ज़ाहिर कित्ते रा है, ते असी तुसा जो इक्क-दूए कने प्यार करणे बिच बधणे तांइ उत्साहित करदे। 11ते जिय्यां असी तुसा जो समझाये रा है कि तुसा इक्क सांती कने भरपूर जिन्दगी जियो, दूए लोक्कां रे कम्मां बिच दखल मत देयो ते मैहनत कने अपणा अपणा काम्म-काज करेयो। 12कि गैर-विश्वासियां कने खरा बर्ताव करेया करो, ते तुसा जो अपणी जरुरतां तांइ निर्भर नी होणा पे।

प्रभु रे वापस आणे पर कै उम्मीद करणी

यीशु रा दोबारा आणा

13ओ संगी विश्वासियों, असी ए चाह्‍ंदे कि तुसा इस गल्ल जो समझो कि जे विश्वासी भाई अवे मरी चुके रे हिन तिन्हा कने कै होणा। तुसा अविश्वासी लोक्कां सांई मत बणो। से तिन्हेरे मरणे पर बड़ा जादा मातम करदे किजोकी तिन्हेरे फिरी जिन्दे होणे री आस नी करदे। 14किजोकी असी विश्वासी जाणदे कि ए गल्ल सच है कि यीशु मरे ते फिरी जिन्दे होई गे तिय्यां ही परमेश्वर ने तिन्हा विश्वासी जो भी फिरी जिन्दा करणा जे मरी गेरे हिन ते तिन्हा जो यीशु कने वापिस हटाई लाणा#4:14 इसेरा मतलब ए है कि जां मसीह यीशु ने दुनिया बिच हटणा तां धार्मिक लोक्कां जो दुबारा मुर्देयां बिच । 15किजोकी असी तुसा जो प्रभु यीशु रे वचन रे हिसाब कने दस्सेया करदे हिन कि जां मसीह यीशु ने हटणा तां असा जिन्दे लोक्कां का पैल्ले मुर्देयां बिच का जिन्दे कित्ते गेरे लोक्कां ने मसीह यीशु कने मिलणा। 16किजोकी प्रभु यीशु ने अप्पु ही स्वर्ग का उतरणा ते जोर सणे ललकार होणी ते प्रधान दूत री अवाज सुनिणी ते परमेश्वर री तुरही बजाई जाणी, ते जे विश्वासी मणू मरी चुके रे होणे, पैल्ले तिन्हा सारेयां जो फिरी जिन्दा कित्तेया जाणा। 17तां असी जे जिन्दे विश्वासी होणे तिन्हा कने ही बदलां पर चुक्की लित्ते जाणे ताकि आसमान बिच प्रभु कने मिलण, ते इसी तरिक्के कने असी हमेसा तांइ प्रभु यीशु कने रैह्णा। 18इधेरे तांइ इन्हा गल्लां कने इक्क-दूए जो तसल्ली दिंदे रेयो।

Currently Selected:

1 थिस्सलुनीकियों 4: CDHNT

Highlight

Compare

Copy