2 थिस्सलुनीकियों 1
1
नमस्ते
नमस्ते
1मैं पौलुस, सिलवानुस अते तीमुथियुस कने थिस्सलुनीकियों सहर री कलीसिया जो ए चीठ्ठी लिख्खेया करदा है जे पिता परमेश्वर ते मसीह यीशु रे मणू हिन। 2असी प्रार्थना करदे कि तुसा जो पिता परमेश्वर अते प्रभु यीशु मसीह रे पास्से का अनुग्रह अते सांती मिल्ले।
प्रभु री वापसी इंसाफ लेई करी आणा
न्याय रे दिन
3ओ संगी विश्वासियों, असा जो तुसा तांइ हमेसा परमेश्वर रा शुकर करणा चाएदा। इय्यां करणा ठीक है किजोकी तुसा मसीह बिच विश्वास करणे बिच होर जादा मजबूत होया करदे हिन ते तुसा बिच आपसी प्यार भी बदेया करदा है। 4इधेरे तांइ असी अप्पु परमेश्वर री कलीसिया बिच संगी विश्वासियां सामणे तुसा पर गर्व करदे, हालांकि तुसा बड़े दुख ते मुसीबतां का गुजरे पर तुसा फिरी भी बड़े सबर कने सैहन्दे रे ते तुसा मसीह बिच विश्वास करणा नी छड्डेया। 5तुसा परमेश्वर तांइ दुख-मुसीबतां सहन करेया करदे हिन ते ए तुसा जो तिन्हेरे राज बिच जाणे रे लायक बणांदा। ए इस गल्ल रा सबूत है कि परमेश्वर ने धार्मिकता कने तुसा रा हिसाब-किताब करणा। 6किजोकी परमेश्वर हमेसा धार्मिकता कने हिसाब-किताब करदे, तिन्हा ने उन्हा मणूआं पर मुसीबतां पाणी जिन्हा ने तुसा जो मुसीबत बिच पाया। 7किजोकी तुसा दुख-मुसीबतां सहन करेया करदे हिन इधेरे तांइ परमेश्वर ने तुसा ते असा जो अराम दैणा। ए सब किच्छ तां होणा जां मसीह यीशु ने अपणे ताकतवर स्वर्गदूतां कने धधकदी आग्ग सांई स्वर्ग का वापिस हटणा। 8अते जे मणू परमेश्वर जो नक्कारदे ते जे असा रे प्रभु यीशु रे सुब बसेख जो नी मनदे तिन्हा जो सजा दित्ती जाणी 9तिन्हा जो परमेश्वर का हमेसा तांइ अलग करी दित्तेया जाणा ते तिन्हा ने परमेश्वर री महिमामय ताकत रा अनुभव नी करी पाणा। परमेश्वर ने तिन्हा लोक्कां जो हमेसा री सजा दैणी। 10ए सारी चीजां तिस बेल्ले होणी जां मसीह यीशु ने तिन्हा लोक्कां का महिमा ते आदरमान पाणे तांइ हटी आणा जे तिन्हा बिच विश्वास करदे ते जे तिन्हेरे अपणे मणू हिन। तुसा भी तिन्हा लोक्कां बिच होणा किजोकी तुसा तिस बसेख पर विश्वास कित्तेया जे असा ने तुसा जो दस्सेया थिया। 11इधेरे तांइ असी हमेसा तुसा तांइ प्रार्थना भी करदे कि परमेश्वर तुसा जो तैसी जिन्दगी जीणे रे लायक बनाण जे जीणे तांइ तिन्हा ने तुसा जो सद्दे रा है। ते से तुसा अपणी ताकत रे हिसाब कने चलाण ताकि तुसा रा हर इक्क खरा मकसद ते हर इक्क चीज तुसा विश्वास कने करदे से पूरा होई जाए। 12इय्यां करणे कने तुसा रे जरिये लोक्कां बिच असा रे प्रभु यीशु रा आदरमान होणा ते तुसा जो भी मसीह यीशु का आदरमान मिलणा। ए सारा किच्छ असा रे परमेश्वर ते प्रभु यीशु मसीह रे अनुग्रह कने होणा।
Currently Selected:
2 थिस्सलुनीकियों 1: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.