1 थिस्सलुनीकियों 3
3
तीमुथियुस रा भेज्जेया जाणा
1जां तुसा जो मिल्ले बगैर असा का नी रेया गेया, तां मैं ते सीलास ने किल्ले ही एथेंस सहर बिच रैह्णे रा फैसला लेई लित्ता। 2ते असी तुसा जो उत्साहित करणे तांइ ते विश्वास बिच मजबूत करणे तांइ अपणे इक्क विश्वासी भाई, मसीह रा सुब बसेख सुनाणे वाले असा रे साथी ते परमेश्वर रे सेवादार तीमुथियुस जो तुसा का भेज्जेया। 3ताकि इन्हा मुसीबतां का कोई ना घबराये किजोकी तुसा तां जाणदे ही कि असा जो जुल्म सैह्णे ही हिन। 4किजोकी पैल्ले भी जां असी तुसा कने थिये, तां तुसा जो बोल्ली दित्तेया थिया कि असा कने जुल्म होणे, अते इय्यां ही होए रा भी है, तुसा तां ए जाणदे। 5इधेरे तांइ जां मेरे का तुसा रा हालचाल जाणे बगैर रेया नी गेया, तां मैं तुसा रे विश्वास रा हाल जानणे तांइ तीमुथियुस जो भेज्जी दित्ता। मेरे जो ता ए डर थिया कि कुते शैतान ने तुसा जो परिक्षा बिच पाई करी भटकाई दित्ते रा हो ते असा री सारी मैहनत बेकार होई गे री हो।
तीमुथियुस रे जरिये बसेख मिलणा
6पर तीमुथियुस अब्बे तुसा री जगाह् का असा का पूज्जे रा है। तिसने असा जो तुसा रे विश्वास ते प्यार रा सुब बसेख भी दित्तेया। तिसने असा जो ए भी दस्सेया कि तुसा असा जो बड़ा याद करदे ते असा कने मिलणा चाह्ंदे जिय्यां असी भी तुसा कने मिलणा चाह्ंदे। 7इस वजह कने, ओ संगी विश्वासियों, असा जो तुसा रे मजबूत विश्वास री खबर सुणी करी बड़ा उत्साह मिल्लेया। ए जाणदे होए असा जो बड़ा उत्साह हुंदा कि तुसा विश्वास बिच बदेया करदे हिन। 8किजोकी अवे तुसा प्रभु बिच विश्वास करणे बिच मजबूत हिन तां ही असा री जान बिच जान आई गयी। 9तुसा री वजह कने असा जो जे खुसी मिल्ली तिस तांइ असी परमेश्वर रा जिन्ना भी जादा शुक्रिया करण से घट है। 10परमेश्वर रे सामणे असी लगातार प्रार्थना करदे कि तुसा कने मिलण, अते मसीह यीशु बिच तुसा रा विश्वास बधाणे तांइ तुसा री मदद करण। 11असा रे पिता परमेश्वर अते असा रे प्रभु यीशु तुसा का आणे तांइ असा री मदद करण। 12असी प्रार्थना करदे कि जिय्यां असी प्यार तुसा कने करदे तिय्यां ही मसीह यीशु तुसा जो इक्क दूए कने प्यार रखणे ते तिस बिच बधणे बिच मदद करे। 13अते इस तरिक्के कने से तुसा सारेयां रे मन जो मजबूत करण, अते पिता परमेश्वर रे सामणे असा रे प्रभु यीशु रे हटणे पर अपणे सब लोक्कां कने पवित्र अते बेकसूर ठैहराई देंन।
Currently Selected:
1 थिस्सलुनीकियों 3: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
