1 थिस्सलुनीकियों 2
2
पौलुस रा प्रचार रा कम्म
1ओ संगी विश्वासियों, तुसा अप्पु ही जाणदे की असा रा तुसा का ईणा बड़ा फायदेमंद होया, 2बल्कि तुसा अप्पु ही जाणदे की असा ने पैल्ले फिलिप्पी सहर बिच दुख चुक्कणे ते तकलीफ सहणे पर भी असा रे परमेश्वर ने असा जो इदेइ हिम्मत दित्ती, की असी तुसा रे सहर बिच वरी विरोध रे हुदें होए भी तुसा जो परमेश्वर रा सुब बसेख सुनाण 3किजोकी असा रा उपदेस ना वहम कने है ते ना गलत इराद्दे कने, ते ना छल कने है। 4पर जिय्यां परमेश्वर ने असा जो इस जोग्गे ठैहराई करी सुब बसेख दित्तेया, असी तैसा ही बखाण करदे, ते इस बिच मणूआं जो नी, पर परमेश्वर जो खुस करदे जे असा रे दिल री गल्लां जो जांचदे। 5तुसा जाणदे की असी ना तां चापलूसी री गल्लां करेया करदे थिये ते ना तुसा का किच्छ हासिल करणे रे लालच बिच बहाणे बणादे थिये, परमेश्वर इन्हा गल्लां रे गवाह हिन। 6असी मणूआं का आदर नी चाह्ंदे थिये, ते ना तुसा का, ना होर कुसकी का, हालांकि असी चाह्ंदे तां मसीह यीशु रे प्रेरित होणे रे वजह कने तुसा पर बोझ पाई सकदे थिये 7पर जिय्यां मां अपणे बच्चेयां रा पालण-पोषण करदी, तिय्यां ही असी भी तुसा मझाटे रेई करी कौमलता दिखाई 8ते तिय्यां ही असी तुसा री चाहत करदे होए, ना सिर्फ परमेश्वर रा सुब बसेख पर अपणी जान भी तुसा जो दैणे तांइ तैयार थिये, इस तांइ किजोकी तुसा जो बड़ा प्यार करदे थिये। 9किजोकी ओ भाईयों, तुसा ने असा री कड़ी मैहनत जो याद रख्खेया ते असा ने इस तांइ रात-दिन कम्म करी के तुसा बिच परमेश्वर रा सुब बसेख प्रचार कित्ता ताकि असी अपणी जरुरतां तांइ तुसा पर बोझ ना बनण। 10तुसा अप्पु ही गवाह हिन, ते परमेश्वर भी गवाह है की तुसा संगी विश्वासियों रे मझाटे असा रा बर्ताव कदेया पवित्र, धार्मिक ते बेकसूर रे रा है। 11तुसा जाणदे की जिय्यां पिता अपणे बच्चेयां कने बर्ताव करदा तिय्यां ही असी भी तुसा बिच हर इक्क जो सिखांदे, हिम्मत दिदें, ते समझादें थिये, 12कि तुसा इदेइ जिन्दगी जियो जे परमेश्वर जो आदर दिंदी हो, जे तुसा जो अपणे राज ते महिमा बिच हिस्सेदार बणने तांइ सददे। 13इस तांइ असी भी परमेश्वर रा शुक्रिया लगातार करदे की जां असा रे जरिए परमेश्वर रे सुब बसेख रा वचन तुसा ने सूणेया, तां तुसा तिसजो मणूआं रा नी पर परमेश्वर रा वचन समजी करी अपणाया कि से हकीकत बिच तिन्हेरे हिन, ते ए ही सुब बसेख तुसा विश्वास करणे वालेयां लोक्कां री जिन्दगी बिच कम्म करदा। 14इस तांइ तुसां, ओ संगी विश्वासियों, परमेश्वर रे तिन्हा कलीसिया रे लोक्कां सांई जिन्दगी जीणा लगे जे यहूदियां प्रदेश बिच मसीह यीशु बिच हिन किजोकी तुसा भी अपणे ही प्रदेश रे लोक्कां का तैसा ही दुख पाया जदेया तिन्हा ने यहूदियां प्रदेश का पाया, 15जिन्हा ने प्रभु यीशु ते भविष्यद्वक्ता जो भी मारी रख्खेया ते असा पर भी जुल्म करेया करदे हिन, पर परमेश्वर तिन्हा का खुस नी, ते से सारे मणूआं रा विरोध करदे, 16ते से असा जो गैर यहूदी लोक्कां बिच तिन्हेरे छुटकारे रा सुब बसेख बंडणे का रोकदे ताकि तिन्हेरे पाप रा घड़ा भरी जाओ, पर अवे आखिर बिच परमेश्वर तिन्हा लोक्कां जो सजा दैणे वाले हिन।
कलीसिया कने मिलणे री इच्छा
17ओ संगी विश्वासियों, जां असी थोड़ी देर तांइ तुसा का दुर थिये पर मन बिच हमेसा तुसा जो याद रखदे थिये तां असी तुसा कने मिलणे तांइ बड़ी मैहनत कित्ती किजोकी असी दुबारा तुसा जो दिखणा चाह्ंदे थिये। 18असा ने खासतौर पर मैं, पौलुस कई वरी तुसा का आणा चाएया पर शैतान ने असा जो आणा का रोकदा रेया। 19भला असा री आस या खुसी या बड़ाई रा ताज #2:19 ए कलीसिया रे लोक्कां जो दर्शाए करदा है।कुण है? असा रे प्रभु यीशु रे हटणे बेल्ले से तुसा ने ही होणा। 20असा री बड़ाई ते खुसी तुसा ही हिन।
Currently Selected:
1 थिस्सलुनीकियों 2: CDHNT
Highlight
Share
Compare
Copy
Want to have your highlights saved across all your devices? Sign up or sign in
Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.
