1 थिस्सलुनीकियों 1

नमस्ते 1:1-3

पौलुस री तरफ का नमस्ते

1मैं पौलुस, सिलवानुस अते तीमुथियुस कने थिस्सलुनीकियों सहर री कलीसिया जो ए चीठ्ठी लिख्खेया करदा है जे परमेश्वर अते प्रभु यीशु मसीह बिच है। तुसा जो अनुग्रह अते सांती मिलदी रेह्।

थिस्सलुनीकियां रा विश्वास

2असी हमेसा तुसा तांइ परमेश्वर रा शुकर करदे ते प्रार्थना बिच तुसा जो याद रखदे। 3जां असी पिता परमेश्वर का प्रार्थना करदे तां असी तुसा लोक्कां रे विश्वास रे हिसाब रे कम्मां जो, ते विश्वासी लोक्कां तांइ तुसा रे प्यार भरे कम्मां जो, ते मसीह यीशु रे हटणे री आस बिच मुसीबतां रे दौरान तुसा रे सबर रखणे जो भी याद करदे।

थिस्सलुनीके विश्वासियां रा विश्वास ते उदारण

4ओ संगी विश्वासियों, असी जाणदे कि परमेश्वर तुसा जो प्यार करदे ते तिन्हा ने तुसा जो अपणे मणू बणाई लैणे तांइ चुणी लित्ते रा है। 5किजोकी मसीह यीशु रा सुब बसेख तुसा का ना सिर्फ गल्लां बिच, पर पवित्रात्मा री ताकत अते मजबूत भरोस्से कने पूजाया गेया। तुसा जाणदे कि जां असी तुसा रे कने थिये, तां कुस तरिक्के री जिन्दगी जिया करदे थिये। 6अते बड़ी मुसीबतां रे बिच तुसा ने पवित्रात्मा का मिलणे वाली खुसी कने सुब बसेख जो अपणाया ते प्रभु अते असा सांई जिन्दगी जीणा लगे। 7इसी तरिक्के कने तुसा मकिदुनिया प्रदेश अते अखाया प्रदेश रे विश्वासियां तांइ मिसाल बणी गे। 8किजोकी तुसा रे प्रदेश का परमेश्वर रे सुब बसेख री जे धूम मची से ना सिर्फ मकिदुनिया अते अखाया बिच बल्कि परमेश्वर बिच तुसा रा विश्वास हर कुते मन्नेया गेया ते असा जो होर कुसकी जो किच्‍छ बोलणे री जरुरत नी है।

मसीह रा स्वभाव अते कम्म

9किजोकी मणू अप्पु-मिते गल्लां करदे कि जां असी तुसा का आए थिये तां तुसा ने असी लोक्कां रा कदेया स्वागत कित्तेया थिया अते तुसा मूर्तां री पूजा करणा छड्डी करी जिंदे परमेश्वर रे पास्से किय्यां मुड़े थिये, ताकि तुसा जिंदे अते सच्चे परमेश्वर री सेवा करी सको, 10अते स्वर्ग का परमेश्वर रे पुत्तर मतलब यीशु रे हटणे री भाल करो, जिस जो परमेश्वर ने मरे रेयां बिच का जिंदा कित्तेया अते तिन्हा ने ही परमेश्वर रे आणे वाले न्याय का असा जो बचाणा।

Currently Selected:

1 थिस्सलुनीकियों 1: CDHNT

Highlight

Compare

Copy