1 कुरुन्थियों 3

कलीसिया बिच गुटबदीं करणे पर भतसर्ना

1ओ संगी विश्वासियों, मैं तुसा रे कने तिय्यां गल्ल नी करी सकेया, जिय्यां आत्मिक मणूआं कने करदा। पर इसेरे उलट मेरे जो तुसा कने इय्यां गल्ल करणा पेई जिय्यां कि दुनियावी मणूआं कने कित्ती जांदी, मतलब उन्हा कने जे मसीह यीशु री गल्लां जो समजणे बिच हल्ले बच्चे हिन। 2मैं तुसा जो परमेश्वर रे बसेख बिच हल्ले मामुली गल्लां ही सिखाई ते हल्ले गहराई री सच्चाई नी दस्सी, किजोकी तिस बेल्ले तुसा तदेई गल्लां जो सिखणे रे जोग्गे नी होए थिये ते तुसा हल्ले भी तिस शिक्षा जो अपनाणे रे जोग्गे नी होए रे थिये। 3किजोकी हल्ले तांइ तुसा इस दुनिया रे अविश्वासी लोक्कां सांई हिन। तुसा रे बिच हिर्स अते झगड़ा है, इस कने साबित हुंदा कि तुसा इस दुनिया रे दूए लोक्कां सांई हिन ते तिय्यां ही बरताव करदे। 4किजोकी जां इक्क बोलदा कि मैं पौलुस रे सिखाए चलदा, ते दुज्जा मणू बोलदा कि मैं अपुल्लोस रे सिखाए चलदा, तां तिस बेल्ले तुसा रा बोल-चाल दुनियावी मणूआं सांई हुंदा। 5मैं पौलुस ते अपुल्लोस परमेश्वर री सेवा करणे वाले दास का बधी करी होर किच्‍छ नी हिन, जिन्हेरे जरिए तुसा ने मसीह यीशु रे बसेख विश्वास कित्तेया, असा सबने से ही कम्म कित्तेया जे प्रभु ने असा जो दित्तेया। 6परमेश्वर रा बसेख इक्क बीह् सांई है जे जमीन बिच बाया गेया। मैं तुसा लोक्कां जो सुब बसेख सुणाया जिय्यां इक्क मणू खेत्तर बिच बीह् बांदा, ते अपुल्लोस ने तिस कम्म जो शिक्षा दैणे कने जारी रख्खेया जिय्यां इक्क मणू पौधेयां जो पाणी दिंदा पर सिर्फ परमेश्वर ने ही तुसा जो आत्मिक रुप कने बधणे रे काबिल बणाया जिय्यां से पौधेयां जो बधांदे। 7इधेरे तांइ ना तां लगाणे वाला किच्‍छ है, अते ना ही सींचणे वाला, पर परमेश्वर जे बधाणे वाला है, से ही सब किच्‍छ है। 8मैं तुसा बिच मसीह रा बसेख सुणाया ते तुसा जो शिक्षा दैणा सुरु कित्तेया ते अप्पुल्लोस ने तुसा जो शिक्षा दैणा जारी रख्खेया पर असा दोन्नों रा इक्क ही मकसद है। पर हर इक्क जणे जो अपणे कम्मां रे हिसाब कने परमेश्वर का मजदूरी मिलणी। 9किजोकी असी मणू परमेश्वर रे सहकर्मी हिन ते तुसा विश्वासी मणू परमेश्वर रे खेत्तर सांई हिन, ते तुसा परमेश्वर रे घर सांई हिन। 10मैं परमेश्वर रे दित्ते रे वरदान कने से कम्म पूरा कित्तेया जे तिन्हा ने मेरे जो करणे तांइ दित्तेया थिया; मैं तुसा रे सहर बिच सुब बसेख सुणाया ते तुसा बिच का सुरु-सुरु बिच मसीह बिच विश्वास करणे वाले लोक्कां जो तिस बिच बधणे तांइ मदद कित्ती। तिसेरे बाद, बाकि मसीही सेवकां ने तिस कम्म जो जारी रख्खेया जे मैं सुरु कित्तेया थिया। पर असा बिच का हर इक्क मसीही सेवक जो इस गल्ल रा ध्यान रखणे री जरुरत है कि असा जो परमेश्वर रा कम्म किय्यां करणा चाएदा। 11किजोकी जे नीं पैल्ले का पेई गयी री है, से मसीह यीशु हिन, ते कोई दुज्जा कोई होर नीं पाई नी सकदा। 12जे अगर परमेश्वर रे सेवक सुब बसेख री सही शिक्षा दैण जे परमेश्वर ने तिन्हा जो दित्ते री है, तां से मणू इक्क घर बणाणे वाले मिस्त्रि सांई हिन, जे सोन्ना, चाँदी ते कीमती पत्थर जदेय बदिया समान लाई करी तिस नीं पर घर पांदे। पर जे अगर से सुब बसेख री सही शिक्षा ना दैण तां से मणू तिन्हा मिस्त्रियां सांई होए जे तिस नीं पर घा-फू जदेया घटिया समान लाई करी घर पांदे। 13पर इक्क दिन पता लग्गी जाणा कुसने कदेया कम्म कित्ते रा है। किजोकी जिस दिन मसीह ने वापिस हटी करी आणा तां तिन्हा ने इस गल्ल जो साफ-साफ ज़ाहिर करी दैणा। ए सब किच्‍छ इदेया होणा कि सारेयां ने तिस घर जो बणाणे तांइ इस्तेमाल कित्ते रे समान जो आग्ग बिच पाई करी परखेया जाणा। तिन्हा ने ए दिखणा कि परमेश्वर रे हर इक्क सेवक ने कदेया कम्म कित्ते रा है, ते तिन्हा ने इस गल्ल फैसला करणा कि तिन्हेरा कम्म खरा है या बेकार। जिय्यां कोई आदमी घर बणाणे रे समान जो आग्ग कने परखी करी दिखदा कि से जादा समय तांइ चलणा या तौले ही फुकी जाणा। 14ते जे कम्म तिस मणू ने तिस नीं पर कित्ते रा है, जे अगर से कम्म नी फुकिंदा, तां तिसजो ईनाम मिलणा। 15जे अगर मसीह ए फैसला लेई लिंदे कि कुसकी रा कम्म बेकार है तां मसीह ने तिस मणू जो ईनाम ता नी दैणा पर तिस मणू ने अपणी हमेसा री जिन्दगी भी नी गुआणी जे परमेश्वर ने तिसजो दित्ते री है। 16तुसा ठीक तरिक्के कने जाणदे कि तुसा परमेश्वर रा मन्दिर हिन अते पवित्रात्मा तुसा रे बिच वास करदा। 17जे कोई मणू तुसा लोक्कां बिच, जे परमेश्वर रे मन्दिर सांई हिन फूट पाणे री कोसीस करगा तां परमेश्वर ने तिस मणू जो कड़ी सजा दैणी। किजोकी परमेश्वर रा मन्दिर पवित्र है ते से तुसा हिन। 18जे अगर तुसा बिच कोई अप्पु जो इस जुग रे लोक्कां री नजर बिच अप्पु जो समजदार समजे तां अप्पु जो इस जमाने रे लोक्कां री नजर बिच बेवकूफ भी समजे ताकि तुसा परमेश्वर री नजर बिच भी समजदार बणो। 19किजोकी परमेश्वर री नजर बिच इन्सानी ज्ञान बेवकूफी है, जिय्यां कि पवित्रशास्त्र बिच लिख्खे रा है,

“से ही (परमेश्वर) है,

जे ज्ञानी मणूआं जो तिन्हेरी चलाकी बिच फसाई दिंदा,”

20पवित्रशास्त्र बिच दुबारा इय्यां लिख्खे रा है,

“प्रभु ज्ञानी लोक्कां रे सोच-विचारां जो जाणदा, कि से फजूल हिन।”

21-23इधेरे तांइ कोई मणू जो अप्पु पर या कुसकी होर मणू पर घमंड नी होणा चाएदा, चाए पौलुस हो या अपुल्लोस या पतरस#3:21-23 पतरस रा दुआ नां कैफा है।, चाए दुनिया हो या जीणा-मरणा हो, चाये अज्ज री गल्लां हो या आणे वाले कल री गल्लां हो, ए सब किच्‍छ तुसा रा है, अते तुसा मसीह यीशु रे हिन, अते मसीह यीशु परमेश्वर रा है।

Currently Selected:

1 कुरुन्थियों 3: CDHNT

Highlight

Copy

Compare