1 कुरुन्थियों 2

क्रुसित मसीह यीशु रे बारे सुब बसेख

1ओ संगी विश्वासियों, मैं जां आई करी तुसा जो परमेश्वर रे सुब बसेख रा राज़ दस्सेया, तिस बेल्ले मैं तुसा सामणे समजदार लगणे तांइ बड़े वरी बुलंद शब्द नी इस्तेमाल कित्ते। 2किजोकी मैं ए ठाणी लित्ता थिया कि मैं तुसा लोक्कां बिच मसीह यीशु ते तिन्हेरे सुली पर जान दैणे रे अलावा होर कुसकी चीज रे बारे बिच गल्ल ना करां। 3ते मैं अपणी कमजोरी ते डर कने ते बड़ा कंमदे-कंमदे तुसा कने रेया। 4अते मेरे शिक्षा ते मेरे प्रचार बिच इन्सानी समझ वाले बड्डे बड्डे छैल शब्द नी थिये पर पवित्रात्मा ने तुसा जो इन्ने ताकतवर तरिक्के ए दिखाया कि जे बसेख मैं तुसा जो सुणाया थिया से सच थिया, 5ताकि तुसा रा विश्वास मणू रे ज्ञान पर नी, पर परमेश्वर री ताकत पर टिके रे।

परमेश्वर रा ज्ञान

6फिरी भी असी पक्के विश्वासियां रे बिच ज्ञान री गल्लां सुणान्दे हिन, पर ए ज्ञान कोई दुनियावी ज्ञान नी है ते ना ही इस जुग रे प्रधान लोक्कां रे ज्ञान जदेया है जे इक्क दिन नास होई जाणा। 7जिस ज्ञान रे बारे बिच असी दसदे से परमेश्वर रा ओ ज्ञान है जिस जो तिन्हा ने लुकाई करी रख्खेया। कोई भी तिसेरे बारे बिच नी जाणदा थिया। दुनिया बणाणे का पैल्ले का ही परमेश्वर ने ए फैसला कित्तेया कि तिन्हेरे ज्ञान असा रे आदरमान तांइ है। 8परमेश्वर री योजना रे तिस ज्ञान जो इस जुग रे प्रधान लोक्कां बिच का कुसकी ने भी नी समजेया थिया। जे अगर से समजी गेरे हुंदे तां महिमा रे प्रभु मसीह यीशु जो सुली पर नी चढ़ांदे। 9पर जिय्यां की पवित्रशास्त्र बिच लिख्खे रा है,

“जिन्हा गल्लां जो कुसकी ने नी दिख्खेया अते कुसकी ने नी सूणेया,

अते कुसकी ने तिन्हा ठीक गल्लां जो नी समजेया जे परमेश्वर ने अपणे प्यार करणे वालेयां तांइ तैयार कित्तेया।”

10पर परमेश्वर ने तिन्हा जो पवित्रात्मा रे जरिए असा पर जाहिर कित्तेया, किजोकी पवित्रात्मा सब गल्लां जो, बल्कि परमेश्वर री गहराई री गल्लां जो भी जांचदा। 11कुसकी रे मन री गल्लां जो तिस मणू रे अलावा होर कोई नी जाणी सकदा। तिय्यां ही पवित्रात्मा रे अलावा होर कोई भी परमेश्वर री गल्लां जो नी जाणी सकदा। 12पर परमेश्वर ने असा जो अपणी आत्‍मा दित्ते री है, इधेरे तांइ असी दुनिया रे लोक्कां सांई नी सोचदे। ते ए ही वजह है कि असी परमेश्वर री आशीषां जो समजी लिंदे। 13हर इक्क गल्ल जे असी बोलदे से असा जो इन्सान कने नी बल्कि परमेश्वर रे आत्‍मा रे जरिये सिखाया गे रा है। ते से ही आत्‍मा आत्मिक लोक्कां जो आत्मिक गल्लां सिखाणे तांइ असा री मदद करदा। 14पर कोई अविश्वासी मणू परमेश्वर रे आत्‍मा री शिक्षां जो नी अपणांदा, किजोकी से शिक्षां तिसेरी नजरां बिच बेवकूफी री गल्लां हिन, अते ना ही से मणू सही या गलत गल्लां बिच फैसला नी लेई पांदे। किजोकी से मणू आत्मिक गल्लां जो सिर्फ तां ही समजी सकदे जे अगर तिन्हा का पवित्रात्मा हो। 15जिन्हा मणूआं ने पवित्रात्मा जो पाए रा है से मणू सही ते गलत गल्लां बिच का सही फैसला लेई सकदे। पर जिन्हा लोक्कां का पवित्रात्मा नी है से मणू तिन्हा मणूआं रे विचारां जो नी समजी सकदे जिन्हा का पवित्रात्मा है। 16पर जिय्यां कि पवित्रशास्त्र बिच लिख्खे रा है,

“कोई भी नी जाणी सकदा कि परमेश्वर रे मन बिच कै है।

कोई भी तिन्हा जो सिखाई नी सकदा”

पर पवित्रात्मा ने असी विश्वासी लोक्कां जो मसीह रे मन जो समजणे री ताकत दित्ते री है।

Currently Selected:

1 कुरुन्थियों 2: CDHNT

Highlight

Copy

Compare