1 कुरुन्थियों 4

मसीह यीशु रे प्रेरित

1असा जो मसीह रे से सेवक समझो जिन्हा जो परमेश्वर रे बसेख रे राज़ जो फैलाणे रा कम्म दित्ते रा है। 2ते तिस बारे बिच फिरी परमेश्वर रे बसेख रा राज़ जिन्हा लोक्कां रे हवाले कित्ते गे रा है, तिन्हा तांइ जरुरी है कि से भरोस्सेमंद रैह्ण। 3मेरे जो इस गल्ल री कोई फिकर नी है कि तुसा या कोई अधिकारी अपणे इन्सानी तौर-तरिक्के कने मेरा हिसाब-किताब करे। मैं ता अप्पु अपणा हिसाब-किताब नी करदा। 4किजोकी मेरा विवेक साफ है, फिरी भी मैं बेकसूर नी है, किजोकी मेरे जो परखणे वाला मेरा प्रभु है। 5इधेरे तांइ, पैल्ले ही कुसकी गल्ल रा हिसाब कताब मत करेया करो, बल्कि जां तांइ प्रभु नी आंदे तां तांइ रुकी रेयो। किजोकी तिन्हा ने लोक्कां री दिल री लुके री गल्लां रे बारे बिच साफ-साफ दसणा जिन्हा रे बारे बिच कोई नी जाणदा। तिन्हा ने लोक्कां रे दिल रे लुके रे इराद्देयां जो साफ-साफ ज़ाहिर करणा। तां फिरी परमेश्वर ने सारेयां री तारिफ करणी। 6ओ संगी विश्वासियों, मैं इस गल्ल-बात बिच अपणा ते अपुल्लोस रा ज़िकर इधेरे तांइ कित्तेया ताकि तुसा असा रा उदारण लेई सको ते तुसा इसेरे मतलब जो समजी सको जिसेरे बारे बिच पवित्रशास्त्र बिच ए लिख्खे रा है,

“पवित्रशास्त्र बिच लिख्खे री गल्लां का बधी करी होर किच्‍छ ना सोच्चो।”

अते ए गल्ल ठीक नी है कि तुसा इक्क कने आदरमान कने रेयो ते दूए रे खिलाफ होई करी तिसेरी बेज़ती करो। 7किजोकी तेरे बिच ते दूए बिच कुण फरक करी सकदा, तेरे का अपणा कै है जे तिज्जो दित्तेया ही नी गेया? अते जां तिज्जो सब किच्‍छ कुसकी का मिल्ले रा है, तां फिरी तू इय्यां घमंड किय्यां करी सकदा कि जिय्यां तिज्जो मिल्लेया ही नी? 8तुसा का अपणी आत्मिक जरुरत रे हिसाब कने सब किच्‍छ है, तुसा इय्यां सोचदे कि तुसा का पवित्रात्मा रे सारे वरदान हिन। तुसा जो इय्यां लगदा कि असा रे बगैर ही रे राज्जेयां सांई राज करणा सुरु करी दित्ते रा है। जे अगर तुसा राज्जेयां सांई राज करेया करदे हुंदे ता ए असा तांइ बड़ी खुसी री गल्ल होणी थी, किजोकी तां फिरी असा भी तुसा कने राज करणा थिया। 9पर मेरे जो इय्यां लगदा कि परमेश्वर ने असी प्रेरितां जो मरणे वाले कैदियां सांई आखिर बिच रख्खे रा है। असी सारे दुनिया तांइ इक्क तमाशा बणी गेरे हिन, इत्ते तिकर स्वर्गदूत ते सारे मणू असा जो दिखदे। 10मणू असा जो बेवकूफ समजदे किजोकी असी मसीह यीशु रे बारे बिच प्रचार करदे, पर तुसा जो इय्यां लगदा कि तुसा बड़े वरी समजदार विश्वासी हिन। मते लोक्कां जो लगदा कि असा का कोई हक नी है, पर तुसा बड़े घमंड कने बोलदे कि तुसा जो परमेश्वर का हक मिल्ले रा है। मणू असा री इज्जत नी करदे, पर से तुसा री बड़ी इज्जत करदे। 11असी अज्ज रे दिन तिकर असी भूखे-प्यासे अते फटे-पुराणे चिथड़े बिच हिन, अते लोक्कां का कुट्ट खांदे हिन ते बेघर हिन, 12अपणे हत्थां कने मैहनत-मजदूरी करदे हिन, जां मणू असा जो बुरा-भला बोलदे तां असी तिन्हा जो आशीष दिंदे, से असा जो तंग करदे अते असी तिन्हा जो सहन करदे। 13जां मणू असा जो बदनाम करदे, तां भी असी मीठा बोलदे, मणू हल्ले तिकर भी असा री इज्जत नी करदे, से सोचदे कि असी बिल्कुल ही बेकार हिन।

चितौणी

14मैं तुसा जो शर्मिंदा करणे तांइ ए गल्लां नी है लिखदा, पर मैं तुसा जो सिखाणे तांइ बोल्लेया करदा है किजोकी तुसा मेरे बच्चेयां सांई हिन जिन्हा कने मैं बड़ा वरी प्यार करदा। 15मसीह यीशु रे पीच्छे चलणे तांइ तुसा जो सिखाणे वाले शायद दस हजार मणू भी होई सकदे, पर सिर्फ मैं ही तुसा तांइ इक्क प्यो सांई है, किजोकी मैं ही सबका पैल्ले तुसा जो सुब बसेख सुणाया, जिसेरा अंजाम ए होया कि अवे तुसा मसीह यीशु बिच विश्वास करदे। 16इधेरे तांइ मैं तुसा रे छंदे करदा कि तुसा मेरे सांई जिन्दगी जियो। 17इधेरे तांइ मैं तीमुथियुस जो जे प्रभु बिच मेरा प्यारा अते भरोस्सेमंद पुत्तर सांई है, तुसा का भेज्जेया। तिन्ने तुसा जो दसणा कि इक्क मसीही मणू रे तौर पर मैं किय्यां जिन्दगी जिया करदा है, जदेया कि मैं हर इक्क जगाह् ते हर इक्क कलीसिया बिच दसदा भी। 18तुसा बिच किच्‍छ मणू ए सोच्ची करी घमंड कने भरी गेरे हिन कि मैं तुसा का कदी हटी करी नी आणा। 19पर जे अगर प्रभु री मर्जी होई तां मैं तुसा का जरुर आणा, ते फिरी दिख्खी लिंगा कि इन्हा घमंडिया बिच किन्नी ताकत है। 20किजोकी परमेश्वर रा राज सिर्फ बड़ी वरी गल्लां नी हिन, पर ए परमेश्वर री ताकत रे मुताबिक जीणा है। 21तुसा कै चाह्‍ंदे कि मैं तित्ते पूज्जी करी तुसा कने किय्यां बर्ताव करां? कै मैं डंडा लेई करी तुसा का आ, या प्यार ते निम्तेपन कने?

Currently Selected:

1 कुरुन्थियों 4: CDHNT

Highlight

Copy

Compare