प्रकाशन 8

सातुई मोहर, नाद अर सुन्‍नेंओ धनैरअ

1ज़ांऊं मिम्मूं सातुई मोहर खोल्ही, स्वर्गै हुऐ थोल़ी घल़ी सोभ च़ुप्पी। 2मंऐं भाल़ै तिंयां सात स्वर्ग दूत ज़ुंण परमेशरा सम्हनै खल़ै रहा, मुखा शुझुअ इहअ कि तिन्‍नां लै दैनी सात नादा।

3तेखअ आअ एक होर स्वर्ग दूत सुन्‍नें धनैरै लई संघा खल़्हुअ सह बेदी नेल़ अर तेऊ दैनअ तिधी धूप कि सोभी पबित्र लोगे प्राथणां संघै सह तैहा सुन्‍नैं करै महल़ी बेदी दी ज़ुंण राज़गाद्दी सम्हनै आसा धूप दैए।#प्रका. 5:8

4ज़ांऊं तेऊ स्वर्ग दूतै इहअ कि, धनैरै का डेऊअ धूपो धूँ परमेशरे पबित्र लोगे प्राथणां सम्हनै परमेशरा सम्हनै।#भज. 141:2 5तेखअ ढाकअ स्वर्ग दूतै धनैरअ अर सह भरअ बेदी प्रैंदा का ज़ल़दै कोयलै करै संघा तरैल़अ सह पृथूई दी। तेता करै लागै गुल़ूबिज़ल़ूए छ़ेल़, बिज़ल़ी च़मकदी अर बेघै बडी ज़ाज़री हंदी।#प्रका. 4:5

साता बारी नाद बाज़णीं

6तिंयां सात स्वर्ग दूत, ज़हा का सात नादा ती, तिंयां हुऐ तेता बाज़दै तैर।

पैहली नाद बाज़णीं

7पैहलै स्वर्ग दूतै बाज़ी नाद अर तेता का निखल़ै लोहू राल़ै दै शरू अर आग, अर सह पाई पृथूई दी, अर पृथूईओ चिऊथअ निसब हुअ दझ़ी करै खतम अर चिऊथअ निसब हुऐ पृथूई दी डाल़-बूट खतम अर सारअ हरअ घाहा बी दझ़अ।#एज. 38:22

दुजी नाद बाज़णीं

8तेखअ बाज़ी दुजै स्वर्ग दूतै नाद, इहअ ज़ाण्हुंअ कि आगीए ज़ल़दी-ज़ल़दी गाड पाई समुंदरै अर समुंदरै बी हुअ पाणींओ चिऊथअ निसब लोहू ज़िहअ।#लुआ. 7:17; जेर. 51:25

9समुंदरे चिऊथअ निसब अर तेथ बणाईं दी सोभ ज़िऊंदी च़िज़ा। तिंयां मूंईं सोभ अर समुंदरै पाणीं दी हांढणै आल़ै ज़हाज़ो बी हुअ चिऊथअ निसब खतम।

चिऊथी नाद बाज़णीं

10ज़ांऊं चिऊथै स्वर्ग दूतै नाद बाज़ी, एक बडअ तारअ ज़ुंण आगीए मसाल्‍लै ज़िहअ ज़ल़ा त, सह चुटअ स्वर्गा का अर सह पल़अ गाडा, नदीए चिऊथै निसबा अर पाणींए सोबल़ा दी।#प्रका. 6:13

11तेऊ तारै करै हुअ पाणींओ चिऊथअ निसब नागदौण ज़िहअ झ़रीलअ अर खास्सै मणछ मूंऐं तेऊ कल़ुऐ पाणीं झुटी करै अर तैही पल़अ तेऊ तारै नाअं “नागदौण।” #जेर. 9:15

च़ौथी नाद बाज़णीं

12च़ौथै स्वर्ग दूतै ज़ांऊं नाद बाज़ी, सुरज़ो चिऊथअ निसब अर ज़ोथो चिऊथअ निसब अर तारे चिऊथै निसबा लै आई खरी, एतो नतिज़अ हुअ इहअ कि धैल़ी हुअ सुरज़ो प्रैश्शअ चिऊथै निसबा बराबर न्हैरअ अर राची हुई ज़ोथ अर तारे च़मक चिऊथै निसबा बराबर न्हैरी।#ईशा. 13:10; जोए. 2:10

13ज़ांऊं मंऐं भिई भाल़अ, मुखा शुझुई सरगै एक बडी गरल डेऊंदी, सह ती ज़ोरै-ज़ोरै इहअ बोल्दी लागी दी, “तिन्‍नां चिई स्वर्ग दूता ज़हा अज़ी नाद बाज़णीं आसा रही दी, तेता करै पल़णीं पृथूईए सोभी मणछा लै आफ़त! आफ़त! आफ़त!”

Currently Selected:

प्रकाशन 8: OSJ

Highlight

Copy

Compare