प्रकाशन 5
5
मोहर लाई बंद कताब अर मिम्मूं
1तेखअ ज़ुंण राज़गाद्दी दी त बेठअ द, मंऐं भाल़ी तेऊए दैहणै हाथै एक कताब, सह थिई भितरा अर बागा दुही बाखा लिखी दी अर सह थिई सात मोहरा लाई करै बंद किई दी।#एज. 2:9-10
2तेखअ भाल़अ मंऐं बडअ जोधअ स्वर्ग दूत। सह थिअ ज़ोरै-ज़ोरै इहअ बोल्दअ लागअ द, “ऐहा कताबा खोल्हणैं अर एते मोहरा चोल़णैं जोगी कुंण आसा?” 3पर नां स्वर्गै अर नां पृथूई दी अर नां पृथूई हेठै कुंण ऐहा कताबा खोल्हणैं अर एता दी भाल़णैं जोगी निखल़अ।
4तेखअ लागअ हुंह हिंह करै लेरा लांदअ किल्हैकि तैहा कताबा खोल्हणैं आल़अ अर तेता भाल़णैं आल़अ निं कोहै भेटअ। 5तेखअ बोलअ तिन्नां सैणैं मांझ़ै एकी मुखा इहअ, “लेरा निं लाऐ, भाल़, यहूदे गोत्रा का आसा सह सिह, दाबेदे आजू लुआद गअ राख्सा का ज़िती! सह आसा तैहा कताबा खोल्हणैं अर साता मोहरा चोल़णैं जोगी हुअ द।”#मूल. 49:9; ईशा. 11:1,10
6तेखअ भाल़अ मंऐं तिन्नां तेऊ राज़गाद्दी अर च़ऊ प्राणीं अर तिन्नां सैणैं मांझ़ा-मांझ़ी, ज़िहअ एक बल़ी किअ द मिम्मूं खल़अ, तेऊए तै सात शींग अर सात आछी, ईंयां आसा परमेशरे सात आत्मां सारी पृथूई लै छ़ाडी दी।#जक. 4:10
7ज़ुंण राज़गाद्दी दी त बेठअ द, तेऊए दैहणै हाथा का ढाकी सह तेऊ मिम्मूं सह कताब ओर्ही।#प्रका. 5:1
8ज़ांऊं तेऊ सह कताब ढाकी, तिंयां च़ार प्राणीं अर च़ौबी विश्वासी टोलीए सैणैं पल़ै तेऊ मिम्मूं सम्हनै धरनीं माथै टेक्कदै अर तिन्नें हरेकी सैणें हाथै ती बींन, अर धूपा करै भरी दी सुन्नें लोहदी, ईंयां आसा पबित्र लोगे प्राथणां।#प्रका. 5:14; 19:4
9तिंयां लागै एही नऊंईं गिहा बोल्दै, “तूह आसा ऐहा कताबा खोल्हणैं अर एते मोहरा खोल्हणैं जोगी।
“किल्हैकि तंऐं लऐ आपणअ बल़ीदान दैई लोहू करै हर ज़ाती, हर भाषा का, अर हर रंगे लोगा अर हर देशा का लऐ छ़ुटकारअ दैई परमेशरा लै लोग मोलै।#प्रका. 5:12
10“तंऐं बणाऐं तिंयां इहै लोग ज़सरअ राज़अ परमेशर आप्पै आसा अर इहै प्रोहत ज़ुंण तेऊए च़ाकरी करा अर तिन्नां करनअ पृथूई दी राज़।”#प्रका. 1:6
11तेखअ भाल़अ भिई अर मंऐं शूणअ नभैऊशै लाखों-लाखों स्वर्ग दूतो बोल, तिंयां थिऐ एतरै खास्सै कि तिन्नां निं कुंण गणी सकदै। तिंयां थिऐ राज़गाद्दी अर तिन्नां ज़िऊंदै प्राणीं अर च़ौबी टोलीए सैणैं फेर।#दान. 7:10
12तिंयां थिऐ ज़ोरै-ज़ोरै इहअ बोल्दै लागै दै, “बल़ी किअ द मिम्मूं ई आसा स्तोती अर अदर करनै जोगी किल्हैकि,
“तेऊए शगती आसा महान। तेऊ आसा सोभी गल्लो ज्ञैन, तेऊ का आसा खास्सअ बल अर सह आसा असली दी सेठ।”#प्रका. 5:9
13तेखअ भाल़ै मंऐं स्वर्गै, पृथूई, पृथूई हेठै अर समुंदरे परमेशरै बणाअं द सारअ संसार, ज़ुंण बी तेथ आसा, तिंयां शूणैं मंऐं इहअ बोल्दै,
“ज़ुंण राज़गाद्दी दी आसा बेठअ द,
तेऊओ अर मिम्मूंओ शूकर,
अदर, प्रतप्प अर राज़ लोल़ी
जुगै-जुगै रहअ।”
14च़ऊ प्राणीं बोलअ, “एवमस्तू” अर विश्वासी टोलीए सैणैं टेक्कअ धरनीं पल़ी माथअ।
Currently Selected:
प्रकाशन 5: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
