प्रकाशन 4
4
स्वर्गे दर्शण
1इना गल्ला भाल़णैं का बाद शुझुअ मुखा स्वर्गै एक घुआल़ी दुआर। तेखअ शूणअ मंऐं कि मुल्है आसा कुंण बोल्दअ लागअ द अर सह थिअ सह ई ज़ुंणी मुंह संघै पैहलै गल्ला किई ती अर ज़सरै बोल नादा ज़िहै तै। तेखअ बोलअ तेऊ मुल्है, “उझै एछ इधा लै, अर मुंह रहैऊंणीं ताखा तिंयां गल्ला, ज़ुंण आजू पाक्कै दी हणीं।”#4:1 प्रका. 22:6
2तेभी ज़ाण्हुंअ मुखा कि हुंह किअ परमेशरे आत्मां आपणैं बशै अर मंऐं कै भाल़अ कि स्वर्गै आसा एक राज़गाद्दी अर तैहा राज़गाद्दी दी आसा कुंण बेठअ द।#1 राज़. 22:19
3ज़ुंण तेथ प्रैंदै बेठअ द आसा, सह शुझिआ किम्मती पात्थर यशब अर मानिक ज़िहअ अर तैहा राज़गाद्दी फेर शुझुई च़ऊ बाखा मरकते किम्मती पात्थरा ज़ेही फणैरी।#एज. 1:28
4संघा तैहा राज़गाद्दी च़ऊ बाखा आसा च़ौबी राज़गाद्दी होर अर तिन्नां राज़गाद्दी दी आसा च़ौबी विश्वासी टोलीए सैणैं शेतै झिकल़ै बान्हीं बेठै दै अर तिन्नें मुंडै आसा सुन्नें मुगट।#प्रका. 11:16
5राज़गाद्दी का आसा बिज़ल़ी अर गुल़ूबिज़ल़ू ज़ेही छ़ेल़ लागी दी अर राज़गाद्दी सम्हनै आसा आगीए सात मसाल्लै लागै दै ज़ल़दै, ईंयां आसा परमेशरे सात आत्मां।#जक. 4:2
6तैहा राज़गाद्दी आजू आसा, सह ज़ाण्हिंआं शिश्शै ज़िहअ आर पार शुझणैं आल़अ समुंदर।
राज़गाद्दी मांझ़ा-मांझ़ी अर च़ऊ बाखा आसा च़ार प्राणीं, तिन्नां आजू पिछ़ू आसा आछी ई आछी।#एज. 10:12
7पैहलअ प्राणीं आसा सिहा ज़िहअ, अर दुजै प्राणींओ मुंह आसा बाछ़ू ज़िहअ अर चिऊथै प्राणींओ मुंह आसा मणछा ज़िहअ अर च़ौथै प्राणींओ मुंह आसा गरली ज़िहअ।#एज. 1:10; 10:14
8तिन्नां च़ऊ प्राणींए आसा छ़ह फैंख अर च़ऊ बाखा आसा आछी ई आछी, अर तिंयां रहा राची धैल़ी, बाझ़ी बशैघ किऐ इहअ बोल्दै लागी,#ईशा. 6:2-3
“पबित्र, पबित्र, पबित्र परमेशर बिधाता, सर्वशक्तिमान
ज़ुंण आझ़ आसा, ज़ुंण आझ़ा का आजी त अर आजू बी आसा एछणैं आल़अ।”
9तिंयां च़ार प्राणीं करा तेऊए ज़ै-ज़ैकार, अदर अर शूकर ज़ुंण तैहा राज़गाद्दी प्रैंदै बेठअ द आसा। अह आसा सह ई ज़ुंण सदा-सदा ज़िऊंदअ रहा।#दान. 12:7 10ज़ेभै-ज़ेभै तिंयां च़ार प्राणीं इहअ करा, तेभै पल़ा तिंयां च़ौबी सैणैं तेऊ सम्हनै उटी बाखा माथै टेक्कदै ज़ुंण जुगै-जुगै ज़िऊंदअ आसा। अर तिंयां काढा आपणैं मुंडा मुगट राज़गाद्दी सम्हनै ज़ोरै-ज़ोरै इहअ बोल्दी धरनीं कि#भज. 47:8
11“म्हारै परमेशर बिधाता,
तूह ई आसा प्रतप्प, अदर, अर शगती जोगी।
किल्हैकि तंऐं ई आसा सोभै गल्ला बणाईं दी
अर इना बणाणैं पिछ़ू ती तेरी ई मरज़ी।”
Currently Selected:
प्रकाशन 4: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
