ईशायाह 44
44
सिधअ बिधाता ई आसा परमेशर
1बिधाता बोला इहअ,
“मेरै दास याकबे आद-लुआद मेरी परज़ा,
मेरी छ़ांटी दी परज़ा इज़राईलीओ, ऐबै शूणां!
2हुंह आसा सह बिधाता ज़ुंणीं तम्हैं बणाऐं दै आसा,
हुंह आसा थारी माए ओदरा ओर्ही तम्हां सभाल़दअ लागअ द।
तम्हैं निं डरी आथी, तम्हैं आसा मेरै दास,
मंऐं आप्पू लै छ़ांटी दी परज़ा ज़हा लै हुंह खास्सअ झ़ूरा।
3किल्हैकि मुंह बरशाऊंणअ रुखी ज़ैगा लै पाणीं अर
शुक्की ज़ैगा काढणीं मुंह पाणींए गाडा।
थारै लान्हैं लै पाणीं मुंह आपणीं आत्मां अर
थारी आद-लुआदा लै दैणीं मुंह खास्सी बर्गत।#प्रका. 21:6; जोए. 2:28
4तिंयां बझ़णै पणैल्ही ज़ैगे अर
गाडे बाढै लागै दै घाहा मांझ़ै मधनूंए बूटा ज़िहै।
5होरी लोगा बी बोल़णअ कई इहअ, ‘हुंह बी आसा बिधातो।’
तिंयां बी ज़ुल़णै मेरी परज़ा याकबे आद-लुआदा संघै।
तिन्नां सोभी डाहणअ आपणैं हाथै खेल़ी करै लिखी, ‘हुंह आसा बिधातो।’
तिंयां बी हणैं इज़राईली संघै मेरी परज़ा अर तिन्नां बी करनी मेरी ई पूज़ा-गाज़ा।”
6इज़राईली प्रैंदै करा स्वर्गे सारी सैनो मालक बिधाता राज़, तिन्नें फाज़त बी करा सह ई।
बिधाता ज़हा का सारी शगती आसा, सह बोला इहअ,
“सोभी का आजी आसा हुंह अर खिरी बी रहणअ हुंह ई,
मुखा सुआई निं होर कोहै परमेशर आथी।#प्रका. 1:17; 21:6; 22:13
7मुंह ज़िहअ कुंण आसा? ज़ाथी निं कोहै! ज़ै आसा, सह बोले।
तेऊ दैआ खोज़णैं कि ज़धा ओर्ही मंऐं आपणीं परज़ा बणाईं, तधा ओर्ही किज़ै-किज़ै हुअ अर
सह इहअ बी खोज़े कि आजू किज़ै हणअ।
8तम्हैं मेरी परज़ा निं डरी आथी!
तम्हां का आसा पैहलकै ज़मानै ओर्ही आझ़ तैणीं थोघ कि
मंऐं त पैहलै ई हेरअ द बोली कि आजू हणअ इहअ अर
तम्हैं आसा ऐहा गल्ले मेरै शाजत।
तम्हैं भाल़अ कि मुंह सुआई कुंण होर परमेशर आसा बी?
ज़ाथी निं कोह आथी! मुखा सुआई निं होर टोल्ह ई आथी। ज़ाथी निं मंऐं एकी देअए बारै बी शूणअ।”
मुहुर्ती पूज़ा निं ठीक आथी
9ज़ुंण बी मुहुर्ती बणाआं, तिंयां आसा बृथा अर तिंयां मुहुर्ती बी आसा बृथा ज़ेता तिंयां खास्सै मना। ज़ुंण तिन्नां मुहुर्ती पूज़ा तिंयां आसा आप्पू ई कांणै अर नां तिन्नां का किज़ै थोघ आथी! तिन्नां पल़णअ शर्मिंदै हणअ। 10देअए मुख-मैहरै बणाईं अर तिन्नां पूज़ी करै निं किछ़ै भलअ हंदअ! 11ज़ुंण बी इना मुहुर्ती पूज़ा, तिन्नां पल़णअ शर्मिंदै हणअ। ज़ुंणीं तिंयां मुहुर्ती बणाईं, तेते कारीगीर आसा मणछ ई। तिन्नां दैआ सोभी बी एछणैं अर पांच़ी पाणै! तिन्नां छ़ुटणीं काम्मणीं संघा पल़णअ शर्मिंदै हणअ।
12लुहार करा धातूए एक ठेल्ली आरनैं आगी जैंदरी लाल संघा काढा ठोल्लू करै टिप्पी तेथ नाक-मुंह। खिरी फिरा तेऊ भुख-चिश संघा थका।
13छदाण नापा काठ सूत लाई। संघा दैआ काठा दी रेखा, तेखअ बणाआं सह तेऊ काठा न्हैंण बैहली करै आदमी ज़िहै नाका मुंहां आल़ै ताकि लोग तेता आपणैं देहुरै डाहे। 14हई सका कि सह तेता लै बणां का केल़ुई काटे, कैलीए अर बाना-महरूए बूट काटे। इहअ बी सका हई कि सह तेता लै आपणैं खेचै केल़टी रोहे अर तेता बझ़णा लै सरगा का पाणीं न्हैल़ै। 15मणछ आणा डाल़ा-बूटे झ़ुका झाल़ी अर देअआ बणाणां लै आणा काठ। एकी बाखा ज़ाल़ा सह नैथणां अर रोटी चाणना लै आग अर डाल़ा-बूटे तिन्नां ई काठा करै बणाआं तिंयां मुहुर्ती संघा टेक्का तेता सेटा माथअ! 16काठा ई करै ज़ाल़ा तिंयां आग संघा सटेऊआ तेथ शिखा। तेथ भुज़ी दी शिखा खाई करै रज्ज़ा सह संघा बोला आगी सेटा नैथुई करै, “ज़ाथी लागअ बधिया घमास्स! आग भाल़ केही बधिया ज़ल़ी!” 17बाकी काठा करै बणाआं सह एक मुहुर्ती, संघा करा तेता सेटा माथअ टेक्की पूज़ा! तिंयां करा तेता सेटा अरज़, “तूह आसा मेरअ देअ, तूह बच़ाऊ हाम्हां!”#शधा. 17:29
18ईंयां इहै मणछ आसा ज़ाथी पठ ऐडै, तिन्नां निं ज़ाथी किछ़ थोघ आथी। तिन्नैं आसा सत्त भाल़णैं का आपणीं आछी कांणी डाही दी करी अर अक्ल आसा तिन्नैं ढोपी डाही दी कि तिन्नां का निं सत्त शुझदअ ई आथी! 19तिन्नां निं एही सोर-समझ़ ई एछदी कि तिंयां आप्पू ऐहा गल्ला भुझ़े, “एकी बाखा दहै मंऐं डाल़ा-बूटे काठ झ़ुका लै अर तेथ बणाईं मंऐं रोटी अर खाणां लै शिखा बी भुज़ी! दुजी बाखा बणाईं मंऐं तिन्नां ई डाल़ा-बूटे काठा करै च़िल़्हखरी मुहुर्ती अर तेथ सेटा आसा हुंह माथै टेक्कदअ लागअ द!”
20इहअ मुहुर्ती बणाणैं आल़अ आसा छ़ारा खाणैं ज़ेही ऐडी गल्ल! मणछो इहअ दमाग करा तेऊ बरैबाद ई! सह निं आप्पू बच़ाऊई ई सकदअ। सह निं आप्पू लै इहअ बोल़णें अक्ल बी आथी, “ज़ुंण मुहुर्ती मंऐं आपणैं खाणैं हाथै आसा ढाकी दी सह निं असली दी किछ़ बी आथी!”
बिधाता ई आसा बणाणैं अर बच़ाऊंणै आल़अ
21बिधाता बोला इहअ,
“इज़राईलीओ, तम्हैं डाहै इना गल्ला आद कि
तम्हैं आसा मेरै दास।
तम्हैं याकबे आद-लुआद आसा मंऐं आपणीं च़ाकरी करना लै बणाऐं दै,
हुंह निं तम्हां कधि बिस्सरी डाहंदअ।
22मंऐं किऐ थारै पाप सरगै बादल़ा ज़िहै दूर।
तम्हैं एछा मुंह सेटा फिरी, सह आसा हुंह ई ज़ुंणी तम्हैं बच़ाऊऐ।”
23हे सरग! ज़ोरै-ज़ोरै बोल गिहा!
किल्हैकि अह काम किअ बिधाता!
हे पृथूईए डुघी ज़ैगो! ज़ै-ज़ैकार करा,
उछ़टी-उछ़टी धारा अर बणैं सोभी डाल़ा-बूटो, ज़ोरै-ज़ोरै करा ज़ै-ज़ैकार!
बिधाता हेरी आपणीं परज़ा बच़ाऊई करै रहैऊई
कि सह किहअ महान आसा।#भज. 69:34,35; ईशा. 49:13
24बिधाता बोला इहअ,
इज़राईलीओ, हुंह आसा थारअ बिधाता,
तम्हां लै ज़िन्दगीओ मूल़ आसा हुंह,
सह आसा हुंह ज़ुंण अह उझै सारअ भ्रमंड आसा छ़ैअ द,
धरनीं धरती दी सोभी गल्ला बणाणैं आल़अ बी आसा हुंह ई।
25कई गूर आसा इहै ज़ुंण असली निं आथी,
हुंह खोज़ा तेता कि तिन्नैं जोतषी खोज़ै दै नछ़ैण आसा झ़ुठै।
हुंह करा तिन्नों ज्ञैन बृथा ज़ुंण आप्पू लै अक्ली आल़ै समझ़ा।
हुंह निं तिन्नें अक्ल किछ़ू कामें छ़ाडदअ।#आयू. 5:12-14; 1 करि. 1:20
26पर ज़ेभै मेरअ दास आजू हणैं आल़ी गल्ला खोज़ा,
ज़ेभै हुंह मेरी गल्ला खोज़णा लै दूत छ़ाडा,
हुंह करा इहअ कि तिंयां गल्ला निभा तेही ई शुची ज़िहअ तिन्नैं खोज़अ।
मंऐं डाहअ एरुशलेम नगरी लै खोज़ी कि तेथ बस्सणै लोग भिई,
यहूदा मुल्खे होर नगरी बी बस्सणी भिई।
ज़ुंण तिंयां बरैबाद किई दी नगरी आसा, तिंयां च़िणनी भिई।
27मेरै एकी बैणा करै शुक्का बडै-बडै समुंदर।#जेर. 51:36
28हुंह आसा सह ज़ुंण फारसी राज़ै कुस्रूए बारै बोला, “सह आसा मंऐं फुआल डाहअ द, तेऊ करनअ ज़िहअ हुंह च़ाहा तिहअ,
तेऊ करनअ एरुशलेम नगरी भिई च़िणनेओ हुकम अर
मेरै भबने आथरी बी पल़णीं।”#एज्रा 1:1-3
Currently Selected:
ईशायाह 44: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
