ईशायाह 43
43
बिधाता बच़ाऊंणी आपणीं परज़ा
1इज़राईलीओ, बिधाता ज़ुंणीं तम्हैं बणाऐं दै आसा, सह बोला इहअ,
“तम्हैं याकबे आद-लुआद निं डरदै लागी, हुंह बच़ाऊं तम्हां,
मंऐं आसा तम्हैं नाअं बोली शादै दै, तम्हैं आसा मेरै।
2ज़ेभै तम्हैं डुघअ दरैअ टपे, हुंह हणअ तेभै तम्हां संघै,
हुंह निं तम्हां तेथ डुबणै दैंदअ।
ज़ै तम्हैं भकी दी आगी बाती डेओए, तेता करै निं हुंह तम्हां दझ़णैं दैंदअ,
तम्हैं निं धख बी झल़ुशणैं आथी।
3किल्हैकि हुंह ज़ुंण थारअ परमेशर बिधाता, इज़राईलो पबित्र परमेशर आसा,
मुंह बच़ाऊंणै तम्हैं आप्पै।
तम्हां बच़ाऊंणे बदल़ै छ़ाडणैं मुंह
मिसर देश, कूश देश अर सबा नगरी।
4थारी ज़िन्दगी बच़ाऊंणे पिछ़ू छ़ाडणैं मुंह सोभ देश,
किल्हैकि तम्हैं आसा मुल्है सोभी मणछा का खास अर किम्मती।
किल्हैकि हुंह झ़ूरा तम्हां लै खास्सअ अर हुंह करा थारअ अदर।
5तम्हैं निं डरी आथी, तम्हां संघै आसा हुंह आप्पै!
तम्हैं आणनैं मुंह पुर्ब-पछ़म दूरा-दूरा का
थारै घअरा लै बापस फरेऊई।#एज. 36:24; जक. 8:7
6मुंह बोल़णअ उतर दिशा लै, ‘इना छ़ाडा ओर्ही।’
दखण दिशा लै बोल़णअ मुंह,
‘इना रोक्कदै निं लागा।’
मेरै लान्हैं-सुन्हैं आणा पृथूईए पुंझ़ा ओर्ही झाल़ी।#भज. 107:2,3
7तिंयां आसा मेरै आपणैं,
मंऐं आसा तिंयां एते तैणीं बणाऐं दै कि तिन्नां करै मेरअ प्रतप्प प्रगट होए।”
इज़राईल आसा परमेशरो शाजत
8परमेशर बोला इहअ,
“मेरी परज़ा आणा ओर्ही मुंह सेटा लै।
तिंयां आसा आछी हंदी बी कांणै,
काना रहंदी बी आसा तिंयां टौणैं!
9ज़ाती-ज़ाती अर हर मुल्खे लोगा लै बोला कि मुंह सेटा करा झाल़अ,
तिन्नों कुंण ज़ण्हअ देअ सका खोज़ी कि आजू किज़ै हणअ?
ज़ुंण आझ़ आसा हंदअ लागअ द, सह तिन्नां मांझ़ै कुंणी त खोज़ी हेरअ द?
इना देअआ दैआ आप्पू संघै आपणैं शाजत बी आणनैं कि
तिंयां सबूत दैई सके कि तिंयां आसा शुचै,
ज़ै कुंणी शूणअ कि तिन्नैं खोज़अ किज़ै इहअ, तै शुणमैं हाम्हैं बी।
10इज़राईलीओ, मेरै शाजत आसा तम्हैं,
मंऐं आसा तम्हैं छ़ांटै दै कि तम्हैं मेरी च़ाकरी करे,
ताकि तम्हां का मुंह बिधातो थोघ लागे अर मुंह दी विश्वास करे,
ताकि तम्हां समझ़ एछे कि हुंह ई आसा परमेशर एक्कै।
मुंह छ़ाडी निं होर कोहै परमेशर आथी,
नां कुंण मुखा आजी थिअ अर नां आजू कुंण हणअ।#यहू. 1:7,8
11हुंह आसा बिधाता,
तम्हां सका सिधअ हुंह बच़ाऊई।
12हुंह बिधाता हेरा पैहलै ई खोज़ी कि आजू किज़ै हणअ,
तेखअ एछा हुंह तम्हां बच़ाऊंदअ।
ऐहा गल्ले आसा तम्हैं मेरै शाजत कि अह निं कोही
पाखलै देअ-देबी किअ।
13हुंह आसा परमेशर अर हुंह रहणअ सदा।
मुखा निं कोहै छ़ुटी सकदअ अर
ज़ुण मुंह करनअ, तेता लै निं मुंह कोहै रोक्की सकदअ।”#1 तिम. 1:17; रोम. 9:18,19
बाबेल देशा का बच़णअ
14इज़राईलो पबित्र परमेशर बिधाता ज़ुंणीं तम्हैं बच़ाऊऐ, सह बोला इहअ,
“तम्हां बच़ाऊंणा लै छ़ाडणीं मुंह बाबेल देशा लै सैना,
बाबेल देशे लोग काढणैं मुंह तिधा का दरल़ाऊई।
तिन्नां हणअ तिन्नें तिन्नां ई ज़हाज़ा का छ़ुटणअ कठण ज़ेतो तिन्नां घमंड आसा।
15हुंह आसा बिधाता, थारअ पबित्र परमेशर।
तम्हैं इज़राईली आसा मंऐं बणाऐं दै अर थारअ राज़अ आसा हुंह।
16सह थिअ हुंह बिधाता ई ज़ुंणीं लाल समुंदर दूई बाखा लै किअ
संघा बणाईं मांझ़ा-मांझ़ी शुक्की बात।
17सह आणी ती मंऐं मिसर देशे सैना थारै पिछ़ै करदी रथा-घोल़ै पाई,
संघा पाई सारी सैना समुंदरै डबेऊई मारी।
तिंयां पल़े तेथ लाम्मै अर तेखअ निं तिंयां भिई खल़ै उझ़ुऐ!
तिंयां हिठै लाटूए बाती ज़िहै।”
18पर बिधाता बोला इहअ,
“ज़ुंण गल्ला बिति गई तेता आद करदै निं लागा,
तेते सोठ निं डाह पाई।
19तिन्नां गल्ला भाल़ा ज़ुंण मंऐं ऐबै लाई करी।
तिंयां आसा हंदी गई दी लागी, तम्हां कै तिंयां शुझदी दी निं आथी?
मुंह बणाणीं रेगीस्ताना दी खुल्ही सल़क
अर तेथ काढणीं मुंह तम्हां लै पाणींए गाडा।#भज. 107:35
20बणें ज़ीबा तोही करनअ मेरअ अदर,
हुहल़ू अर शैल़ी-शैल़ठै बी करनीं मेरी ज़ै-ज़ैकार
ज़ांऊं मुंह आपणीं परज़ा लै पाणीं दैणा लै
रेगीस्तानै पाणींए गाडा बहाऊंणी।
21अह इज़राईली परज़ा आसा मंऐं आप्पू लै छ़ांटी दी,
तिन्नां करनीं गिहा बोली मेरी ज़ै-ज़ैकार।”#1 करि. 10:31; 1 पत. 2:9
इज़राईलो पाप
22बिधाता बोला इहअ,
“याकबे आद-लुआदो, तम्हैं रुंझ़ुऐ मुखा भाल़ी!
ऐबै छ़ाडअ तम्हैं इज़राईली हुंह पुछ़णअ बी!
23ऐबै निं तम्हैं मुल्है मिम्मूं काटी हूम करदै,
ऐबै निं तम्हैं बल़ीदान करी मेरअ अदर करदै!
मंऐं निं तम्हां लै ज़ोरा-ज़ोरी बोलअ कि तम्हैं करै मुल्है बल़ीदान
नां मंऐं ज़बरी तम्हां का धूप बझ़ैल़अ ज़ाल़णै।
24तम्हैं निं ढब्बै मोलै लई मुल्है धूप-दपोत ज़ाल़अ अर
नां तम्हैं एते तैणीं बल़ीदान किअ कि हुंह च़र्बीए धूँआं करै खुश होए!
हथू रुंझ़ुअ हुंह पै थारै पापा करै,
थारी गलत करनै का थक्कअ हुंह ऐबै।
25हुंह आसा सह ई परमेशर ज़ुंणीं थारै पाप माफ किऐ,
अह पल़अ मुंह करनअ किल्हैकि एता सका सिधअ हुंह ई करी,
मुंह निं थारै पाप आद डाहणैं।#इब्रा. 10:17; 8:12; जेर. 31:34
26च़ाल्ला हाम्हां पाणीं पांच़ी, संघा खोज़ा आपणीं गल्ला
ज़ेता करै तम्हैं शुचै सका निखल़ी!
27थारअ मूल़ मणछ#43:27 मूल़ मणछ याकब, आबराम कि आदम निखल़अ पापी,
ज़ुंण थारै सैणैं थिऐ, तिन्नैं बी किअ पाप,
28तम्हां प्रैंदै राज़ करनै आल़ै लाई मेरी पबित्र ज़ैगा छ़ोत।
तैही किअ मंऐं याकब पठी खतम,
तैही दैनअ मंऐं मेरी आपणीं परज़ा इज़राईली शर्मिंदै हणैं।”
Currently Selected:
ईशायाह 43: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
