ईशायाह 11
11
शांतीओ राज़
1ईशैईए शोहरू राज़ै दाबेदो खिंब आसा काटै दै बूटे डुंघा ज़िहअ, ज़ेही डुंघा का नऊंईं प्लीर निखल़ा, तिहअ ई निखल़णअ राज़ै दाबेदे आद-लुआदा#11:1 आद-लुआदा मसीहा ईशूओ दाद-बाब त राज़अ दाबेद। मांझ़ै एक नऊंअ राज़अ।#शधा. 13:23; प्रका. 22:16
2बिधाते आत्मां दैणीं तेऊ लै आपणीं परज़ा प्रैंदै राज़ करना लै
अक्ल अर सोर समझ़।
तेऊ नऊंऐं राज़ै का हणअ बिधातो थोघ अर तेऊ करनअ तेऊओ अदर।#इफि. 1:17; ईशा. 42:1
3सह रहणअ बिधातो हुकम मनणा लै खुश।
तेऊ निं सिधअ मणछो मुंह भाल़ी अर लोगे गल्ला शूणीं नसाफ करनअ।
4तेऊ करनअ रैनै-गरीबो शुचअ नसाफ,
तेऊ दैणअ हंतै दै मणछा लै नसाफ।
ज़ांऊं तेऊ हुकम करनअ, लोगा भेटणीं सज़ा,
अर कदुष्ट मणछ करनै तेऊ खतम।#2 थिस. 2:8; प्रका. 19:15
5तेऊ करनअ लोगा प्रैंदै धर्म अर शुचअ नसाफ डाही राज़।#ईशा. 59:17; इफि. 6:14
6तेऊ ज़मानै रहणैं तेऊए राज़ा दी रुहलै अर भेडा कठा,
च़राघ बेशणअ छ़ेल्हू संघै।
बाछ़ू, सिह अर बल्द रहणैं संघा अर
तिंयां छ़ेल़्हणै होछ़ै ज़िहै लान्हैं तोही।
7गाऊई अर भाल्लणी लागणीं कठा च़रदी,
तिन्नें होछ़ै बाछ़ू अर भाल्लणीए होछ़ै बच़ै बी रहणैं कठा सुत्ती।
सिहा बी खाणअ बल्दा ज़िहअ भुखलअ।
8होछ़ै लान्हैं पाणअ झ़रीलै शपैल़े खाढै हाथ,
तेथ नेल़ रहणअ तेऊ खेल्हदै लागी पर तेऊए निं किछ़ हान्नी हणीं।
9सियोन पबित्र धारा#11:9 सियोन पबित्र धारा बिधाते भबने ज़ैगा निं कोही ज़ीबा लै अर
कोही लै किछ़ हान्नी अर बूरअ हणअ।
ज़िहअ समुंदर पाणीं करै हआ भर्हुअ द,
तेही हणीं धरती तिन्नां मणछा करै भरी ज़ुंण बिधातो अदर करा।
इज़राईली हणैं भिई एक
10एक बगत एछणअ इहअ कि ज़हा लै ईशैईओ ज़लैल़अ#11:10 ज़लैल़अ राज़अ ज़ुंण राज़ै दाबेदे खिंबा का आसा बोला, सह हणअ फ्रहरै ज़िहअ, कि सह सोभी देशा कठा करे। तिंयां एछणैं तेऊ सेटा। तिन्नां करनअ ज़िहअ सह बोले तिहअ अर तेऊओ आपणअ देश हणअ खास्सअ मशूर।#रोम. 15:12 11ज़ेभै ईंयां धैल़ै एछे, तेभै आणनैं मालका आपणैं महान बला करै आपणीं परज़ा मांझ़ै बच़ै दै लोग बापस ज़ुंण अश्शूर, मिसर, पत्रोस, कूश, एलाम, शिनार, हमात अर मांझ़ समुंदरे टापू दी आसा। 12बिधाता दैणअ देशा-देशा लै फ्रहरअ खल़अ कि देशा-देशा का शुझिए कि तेऊ लाऐ च़ऊ दिशा का इज़राईल अर यहूदा मुल्खे लोग भिई कठा झाल़ी ज़ुंण पृथूईए बाढै तैणीं आसा छिंघुऐ दै। 13तेखअ निं इज़राईल मुल्खा यहूदा मुल्खा संघै ज़ीद डाहणीं अर नां यहूदा इज़राईल मुल्खो दुशमण हणअ। 14इज़राईल अर यहूदा मुल्खे परज़ा पल़णअ दुही एक्कअ करी इज़राईल पछ़मा बाखे पलिश्ती लै चुटी। तेखअ लुटणैं तिन्नां पुर्बा बाखा एदोम, मोआब अर अमोनी लोग, संघा करनअ तिन्नां इना लोगा प्रैंदै राज़। 15बिधाता शकेऊणअ मिसर देशा नेल़ समुंदर शुक्कअ, तेऊ छ़ाडणीं एप्रात दरैऊआ शेकेऊंणा लै बागरी, संघा बांडणअ सह सात होछ़ी-होछ़ी गाडा दी ताकि सोभ तेता पार टपी सके।#जक. 10:11 16तेखअ करनअ बिधाता इहअ कि ज़ुंण तेऊए परज़ा इज़राईली मांझ़ै अश्शूर देशै ज़िऊंदै हणैं बच़ै दै, तिन्नां लै हणीं अश्शूर देशा का निखल़णां लै खुल्ही बात ज़ेही तिन्नें दादा-बाबा लै मिसर देशा का निखल़दी थिई।
Currently Selected:
ईशायाह 11: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
