लुआह 12
12
ऊवार्णे थैरे बारै
1मिसर देशै बोलअ तेखअ बिधाता मोसा अर हारणा लै,#लेब. 23:5; गण. 9:1-5; 28:16; बधा. 16:1-2 2“अह भिन्नअ लोल़ी तम्हां लै सालो पैहलअ भिन्नअ हुअ। 3सोभी इज़राईली मणछा का खोज़ इहअ कि एऊ भिन्नें दसुई धैल़ी छ़ांटै आपणैं दादा-बाबे खिंबे सोभी टोले सैणैं मिम्मूं कि छ़ेल्हू।
4-5“ज़ै कसरै धख ज़िहै टबर होए अर बल़ी किऐ दै गाभू या छ़ेल्हू पठी नांईं खाई सके, सह बांडै तेता आप्पू नेल़ दुजै टोला लै। भेड़ या बाकरी निं, पर छ़ांटै सिधअ गाभू या छ़ेल्हू अर सह लोल़ी एकी सालो हुअ अर नां तेथ किज़ै खोट लोल़ी हुई।
6“तेखअ रहै सोभै तेऊ छ़ांटै दै चैणैं एऊ भिन्नें च़ौदुई धैल़ी तैणीं धाचदै लागी। तेखअ च़ौदुई धैल़ी ज़ांऊं धैल़अ उडे, तेभै पाऐ सोभै इज़राईलीए सोभै टोल आपणैं-आपणैं तेऊ छ़ांटी करै ज़ुदै धाचै दै चैणैं काटी।
7“तेऊ चैणें लोहू का लाऐ धख लोहू दुआरे दोहरै खल़ै द्रींडा दी मुंडै, हर घअरै ज़हा-ज़हा घअरै तिंयां चैणैं काटै अर खाणैं। 8तेऊ चैणैंओ मास्स खाऐ आगी जैंदरी भुज़ी करै भोज़न अर कल़ुऐ शागे भाज़ी संघै।
9“तेऊ चैणैंओ मूंड, आंज-पोट अर मूरै खाऐ सोभै भुज़ी करै, नां तेता का काच्च़अ खाई अर नां पाणीं जैंदरी सटेऊई करै लागी खांदै। 10तेऊ चैणैं खाऐ बैल़ी पठी, ज़ै तेता का दोत्ती लै किज़ै छ़ुटे बी तेता पाऐ दुजै धैल़ै दोत्ती पठी दहई।
11“तेभै रोटी खाणें बी आसा एही बिधी कि आपणीं कुछी लोल़ी गाची हुई बान्हीं दी, खूरै लोल़ी पोलल़ै हुऐ बान्हैं दै अर हाथै लोल़ी शोठी संघा खाऐ तेता झ़टपटै छ़ेक्कै-छ़ेक्कै#12:11 छ़ेक्कै-छ़ेक्कै डेऊणा लै तैर्हुऐ दै। अह हणअ मुंह बिधाता खुश करना लै ऊवार्णैओ थैर#12:11 ऊवार्णैओ थैर एऊ थैरा मनाऊंआं तैहा गल्ले आदगारी लै कि प्रल़या करनै आल़अ दूत डेऊअ इज़राईली छ़ड़ैऊंदअ।
12“किल्हैकि तैहा राची दैणीं मुंह मिसर देशै हांढ, संघा पाणै मुंह मणछा मांझ़ै ज़ेठै मर्ध अर डागै-धणा मांझ़ै बी पैहलै सोए नर पशू मारी, तेखअ मिसर देशै ज़ेतरै बी देअ-देबी आसा, तिन्नां लै बी दैणीं मुंह सज़ा#12:12 सज़ा ताकि अह गल्ल सोभै समझ़े कि मिसर देशे सोभ देअ-देबी आसा शल़ैघा। हुंह आसा बिधाता।
13“ज़ुंण दुआरे द्रींडा दी तम्हैं मिम्मूं काटी लोहू लाअ, सह हणअ ऐहा गल्लो नछ़ैण कि तिधी रहा तम्हैं। ज़िधी मुखा सह लोहू शुझिए तिधा का डेऊणअ मुंह प्रैंदी पोर्ही अर थारी निं किछ़ हान्नी हणीं। ज़िहै मुंह मिसर देशे लोग मारनै, सह आफ़त निं तम्हां लै एछणी।
14“ऐहा धैल़ी डाहै तम्हैं आद अर एऊ थैरा मनाऊंऐं पोस्ती दर पोस्ती सदा इहअ ई।#लुआ. 23:15; 34:18; लेब. 23:6-8; गण. 28:17-25; बधा. 16:3-8
आखरै रोट-लुच़ी
15“साता धैल़ी तैणीं निं सज़ेल़ै आल़ी रोटी खाई। इना साता धैल़ीए सोभी का पैहली धैल़ी करै सारै घअरो सज़ेल़अ दूर। ज़ै तम्हां इज़राईली मांझ़ै कुंण एऊ थैरे बगती सज़ेल़ै आल़ी किज़ै च़ीज़ खाए सह निं तेखअ आजू लै मेरअ आपणअ रहणअ।
16“थैरे पैहली धैल़ी अर सातुई धैल़ी हऐ तम्हैं मेरअ भज़न करना लै कठा, इना पबित्र धैल़ी निं खाणां लै रोटी बणाणैं का सुआई किछ़ै काम करी।
17“ऐहा गल्ला आद करना लै मनाऊंऐं तम्हैं आखरै रोट-लुच़ी बणाईं भोज़ना खाणेंओ थैर कि ऐहा धैल़ी आसा मंऐं तम्हैं सोभै इज़राईली ज़ातीए लोग मिसर देशे गलामी का काढै दै, तैही मनाऊंऐं एऊ थैरा आजू पोस्ती दर पोस्ती सदा लै।
18“नऊंईं साला च़ौदा च़ैत्रा सान्हां पोर्ही इक्की च़ैत्र सान्हां तैणीं खाऐ तम्हैं आखरै रोट-लुच़ी चाणी भोज़न। 19इना साता धैल़ी तैणीं निं लोल़ी कोहिए घअरै सज़ेल़अ हुअ। च़ाऐ सह इज़राईली या तिन्नां मांझ़ै बस्सअ द परदेसी होए, ज़ै तम्हां मांझ़ै कुंण सज़ेल़ै आल़ी रोटी खांदअ शुझिए तेऊ करै आपणीं टोली मांझ़ा का दूर।
20“तम्हैं च़ाऐ ज़िधी बी रहे, इना साता धैल़ै निं तम्हां लै सज़ेल़ै आल़ी रोटी खाणें ज़ाज़त आथी।”
ऊवार्णे थैरे शुरूआत
21तेखअ किऐ मोसा इज़राईली टोलीए सोभै सैणैं कठा संघा बोलअ तिन्नां लै इहअ, “सोभी इज़राईली टोली दी छ़ांटा सोभै टोल हेल़्ही जैंदरा का एक-एक मिम्मूं कि छ़ेल्हू, संघा काटा तेऊ ऊवार्णै लै। इहअ करै मनाऊंआं तम्हैं ऊवार्णैओ थैर।
22“ज़ुफे डाल़ीए बणाऐं एक काशी संघा डबेओऐ तेता डबरै दी मिम्मूंए लोधल़ै जैंदरी। तेखअ लाऐ धख-धख लोधल़अ आपणैं दुआरे दोहरै द्रींडे मुंडै। तेखअ रहै सोभ टबर पांडा भितरी।
23“किल्हैकि बिधाता दैणीं सारै मिसर देशै हांढ, संघा पाणै तेऊ मिसर देशे लोगे हर घअरे ज़ेठै शोहरू मारी। ज़सरै दुआरे दुही खल़ै द्रींडा दी मिम्मूंओ लोधल़अ होए लागअ द, तिधी निं बिधाता तेऊ मारनै आल़ै दूता डेऊणैं दैणअ। तेऊ घअरा का डेऊणअ सह मारनै आल़अ दूत प्रैंदी पोर्ही।#इब्रा. 11:28
24-25“ऐहा गल्ला डाहै तम्हैं आद कि बिधाता ज़ेऊ देशै हाम्हां निंणे करार आसा किई दी, तिधी पुजी बी करै तम्हैं एऊ सूले साबै हर साल एऊ थैरा पोस्ती दर पोस्ती इहै ई मनाऊंईं पूरै।
26“ज़ै केभै आजू थारी आद-लुआद इहअ पुछ़े, ‘हाम्हैं एऊ थैरा किल्है मनाऊंआं?’
27“तेभै खोज़ै तम्हैं तिन्नां का इहअ, ‘खास्सी साला पैहलै ज़धू हाम्हैं मिसर देशे गलामी दी थिऐ, तधू दैनी बिधाता सारै मिसर देशै हांढ, तेऊ पाऐ तै सारै मिसर देशे लोगे हर घअरै ज़ेठै शोहरू मारी, पर म्हारै शोहरू-माठै लै निं तेऊ किछ़ हान्नी दैनी हणैं। तधा ओर्ही मनाऊंआं हाम्हैं हर साल मिम्मूंए बल़ी करी बिधाता लै ऊवार्णैओ थैर।’”
ज़ांऊं मोसा इना गल्ला खोज़ी-बोली मुक्कअ, तेखअ टेक्कअ सोभी इज़राईली मणछै बिधाता सेटा माथअ।
28तेखअ ज़िहअ-ज़िहअ बिधाता मोसा अर हारणा लै हुकम किअ त, सोभी इज़राईली किअ तिहअ ई।
दसुई आफ़त-ज़ेठै मणछ अर पैहलै सोए नर पशूए मौत
29तेखअ हुअ बी तिहअ ई, आधा राची पाऐ बिधाता सारै मिसर देशे लोगे हर घअरे ज़ेठै शोहरू मारी। मिसर देशे माहा राज़ेए ज़ेठै शोहरू ओर्ही कैद किऐ दै गलाम मणछे ज़ेठै शोहरू बी निं बच़ी सकै, इधी तैणीं कि मिसर देशे लोगे डागै-चैणैं जैंदरी बी ज़ुंण पैहलै सोए नर पशू थिऐ तिंयां बी पाऐ मारी।#लुआ. 4:23
30तैहा राची पल़अ सारै मिसर देशै मखाण। माहा राज़अ, तेऊए कार-करिंदै अर मिसर देशे सोभै लोग लागै हिक्का पटाक्की ज़ोरै-ज़ोरै लेरा लांदै, किल्हैकि मिसर देशै निं एक बी घअर इहअ आथी त ज़िधी कुंण मूंअ निं आथी त।
31तेखअ शादै मिसर देशे माहा राज़ै तैहा ई राची भितरी मोसा अर हारण, संघा बोलअ तिन्नां लै, “तम्हैं सोभ इज़राईली निखल़ा हाम्हां जैंदरा का म्हारै एऊ देशा का दूर! ज़िहअ तम्हैं बोला तिहै लागा आपणैं बिधाते च़ाकरी करदै डेऊंदै।
32“आपणीं भेडा-बाकरी, गाऊई-बल्द, गाधै-गाधी, ऊँटे हेल़्ही अर सारी ज़ैदात आसा तेता निंयां आप्पू संघा, पर मुल्है करा डेऊंदी-डेऊंदी आपणैं बिधाता का एही अरज़ कि सह मुल्है बर्गत दैए।”
33सोभी मिसर देशे लोग लागै इहअ करदै कि ज़ेतरअ छ़ेक्कै हई सके ईंयां इज़राईली लोल़ी एऊ देशा का डेऊऐ, तिंयां लागै बोल्दै, “ज़ीबाण, तम्हैं डेओआ छ़ेक्कै पोर्ही, नांईं ता तम्हां पिछ़ू मरनै हाम्हैं सोभै।”
34इज़राईली मुछ़अ झ़टपटै पिठअ, पर सज़ेल़अ निं तेथ तिन्नैं पाअ। तेखअ निंईं तिन्नैं तिंयां आपणीं-आपणीं आरी कनाल़ी संघी पल़ेटी करै कान्हा आप्पू संघा।
35ज़िहअ तिन्नां लै मोसा बोलअ त कि आपणैं ओर्ही-पोर्ही संघा रहणैं आल़ै मिसरी लोगा का मांगै सुन्नैं-च़ंदीए गैहणैं अर झिकल़ै, अह काम त इज़राईली मणछै पैहलै ई डाहअ द करी।#लुआ. 3:21,22
36बिधाते दौलती हुऐ इज़राईली संघा रहणैं आल़ै मिसर देशे लोग भलै कि इज़राईली मणछै ज़ुंण बी च़ीज़ तिन्नां का मांगी, तिन्नैं निं तेता लै नांह किअ। इहअ करै निंईं इज़राईली मिसर देशा का डेऊंदी बारी मिसर देशे लोगा का खास्सी धन-माया बी आप्पू संघा।
इज़राईली निखल़ै मिसर देशा का
37तेखअ लागै इज़राईली रामसेस नगरी का सक्कोत नगरी बाखा लै हांढदै। इज़राईली तै छ़ह लाख मर्ध ई मर्ध, बेटल़ी अर माठै निं तिन्नां संघै आथी गणै दै। 38होर बी डेऊऐ तिन्नां संघै खास्सै मणछ अर तिन्नां संघै थिई खास्सै, डागै-चैणैं, गाधै-गाधी, ऊँटे हेल़्ही बी।
39तिन्नां त मिसर देशा का निखल़णेंओ इहअ छ़ेक्कअ लागअ द कि तिन्नैं निं बाता खाणां लै रोटी बी आणी चाणी। ज़ुंण बाझ़ी सज़ेल़े आरी तिन्नैं मुछ़ी ती आणी दी, तेखअ बणाऐं तिन्नैं तेते लुच़ी-रोट चाणी भोज़न।
40-41ज़धू इज़राईली मणछ मिसर देशा लै आऐ तै, तधा का ठीक च़ार शौ तिहा साला बाद काढै बिधाता आपणैं इज़राईली मणछ मिसर देशा का।#मूल. 15:13; गल. 3:17
42तैहा राची बाद काढै इज़राईली मणछ मिसर देशा का, बिधाते अह राच लागा इज़राईली पोस्ती दर पोस्ती ज़रूर मनणी।
ऊवार्णे थैरा मनाऊंणे बिधी
43तेखअ बोलअ बिधाता मोसा अर हारणा लै, “एऊ थैरा मनाऊंणे बिधी आसा एही कि ऊवार्णे थैरो भोज़ निं इज़राईली का सुआई होर कोहै खाई।
44“पर ज़ै इज़राईली मांझ़ै कुंण ढब्बै करै मोलै लअ द गलाम होए अर तेऊओ खतैर किअ द होए, सह सका तिन्नां संघै एऊ भोज़ा खाणां लै साझ़ू हई। 45पर कोई परदेसी मज़दूर ज़ुंण तम्हां सेटा काम करा सह निं एता का खाई सकदअ। 46सारअ भोज़ खाऐ शिखा अर रोटी संघी तैहा ई पांडा ज़िधी सह बणाअं। ज़ुंण चैणअ ऊवार्णे थैरा लै बल़ी किअ, तेऊओ निं एक हाडकअ बी लोल़ी चोल़अ अर नां तेऊए शिखा बागा लै निंईं।#गण. 9:12; जोह. 19:36
47“हर इज़राईलीए सोभै टोल मनाऊंऐं एऊ थैरा ज़रूर।
48“ज़ै कुंण मणछ इज़राईली नांईं होए अर सह बी एऊ थैरा मनाऊंणा लै तम्हां संघै साझ़ू हणअ च़ाहे, सह करै आपणैं टबरो लान्हैं का प्रोढै तैणीं सोभिओ खतैर तेखअ सका तिंयां ऊवार्णे भोज़ा दी इज़राईली संघै साझ़ू हई। ज़ुंणी मणछै खतैर निं होए किअ द, सह निं ऊवार्णे भोज़ा का खाई।
49“अह बधान आसा इज़राईली अर तिन्नां मांझ़ै बस्सै दै परदेसी दुही लै एक्कै ज़िहअ।”
50इज़राईली लै मोसा अर हारणा का बिधाता ज़िहअ हुकम दैनअ त, तिन्नैं किअ तिहअ ई। 51ठीक तैहा ई धैल़ी किऐ बिधाता इज़राईली मणछ मिसर देशे गलामी का आज़ाद।
Currently Selected:
लुआह 12: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
