लुआह 13
13
ज़ेठै शोहरू पैहलै सोए नर पशू बिधाता लै
1तेखअ बोलअ बिधाता मोसा लै इहअ, 2“इज़राईली मांझ़ै हर घअरै ज़ल्मैं दै ज़ेठै शोहरूए डाहै एही मानत कि ईंयां आसा बिधाता लै पबित्र, च़ाऐ तिंयां मणछ होए या डागै-चैणैं मांझ़ै पैहलै सोए नर पशू होए।”#गण. 3:13; लूक. 2:23
आखरै रोट-लुच़ीओ थैर
3-4मोसा बोलअ सोभी इज़राईली लै, “च़ैत्रे#13:3-4 च़ैत्रे इब्रानी दी अबीब भिन्नें ऐहा तिथी डाहै तम्हैं आद। ऐहा धैल़ी किऐ बिधाता तम्हैं आपणीं महान शगती करै मिसर देशे गलामी का आज़ाद। ऐहा धैल़ी निं तम्हैं सज़ेल़ी रोटी खाई आथी।
5“बिधाता आसा थारै दादा-बाबा का एही करार किई दी कि तेऊ पजैल़णैं तम्हैं कनानी, हित्ती, अमोरी, हिब्बी अर जबेशी ज़ातीए देशै ज़ेथ रज़दी-पज़दी ज़िम्मीं#13:5 रज़दी-पज़दी ज़िम्मीं इब्रानी दी आसा ज़िधी दुधा घिऊए गाडा बगा ज़ैगा आसा। ज़ेभै तम्हैं तेऊ देशै पुजे, तिधी मनाऊंऐं तम्हैं एऊ थैरा नऊंईं साले पैहलै भिन्नैं च़ैत्रै।
6“साता धैल़ै तैणीं निं सज़ेल़ी रोटी खाई अर सातुऐ धैल़ै मनाऊंऐं बिधातो अदर करना लै एऊ थैरा। 7इना साता धैल़ै खाऐ तम्हैं आखरी रोटी चाणी भोज़न, इधी तैणीं कि थारै सारै देशै निं लोल़ी किधी धख ज़िहअ सज़ेल़अ बी घअरै हुअ डाहअ द।
8“ज़ांऊं थैर शुरू होए, तेभै खोज़ै-बोलै तम्हैं आपणैं शोहरू-माठै का, ‘बिधाता आणै तै हाम्हैं ऐहा धैल़ी मिसर देशै गलामी का छ़ड़ैऊई, तैही मनाऊंआं हाम्हैं एऊ थैरा बिधाता लै।’
9“अह थैर मनाऊंणअ हणअ तम्हां लै नल़ै अर माथै लाऐ दै नछ़ैणा ज़िहअ। एता करै रहणअ तम्हां पोस्ती-दर पोस्ती बिधाता खोज़अ द बधान आद, ज़ुंणी आपणीं महान शगती करै तम्हैं मिसर देशा का काढै।
10“एऊ बधाना करै तम्हैं हर साल ऐहा ई तिथी दी पोस्ती दर पोस्ती।
ज़ेठैओ बधान
11“बिधाता पजैल़णैं तम्हैं कनानी लोगे देशै, ज़ेही तेऊ थारै दादा-बाबा का करार आसा किई दी। ज़ेभै सह तम्हां तिधी पजैल़ी हेरे, 12तेभा पोर्ही दैऐ तम्हैं आपणैं ज़ेठै शोहरू अर सोभी पशूए पैहलै सोए नर पशू बिधाता लै किल्हैकि थारै हर ज़ेठै आसा बिधाते।#लुआ. 34:19,20; लूक. 2:23
13“पैहलै सोए नर गाधै सका तम्हैं तेते बदल़ै मिम्मूं बल़ीदान#13:13 गाधै सका तम्हैं तेते बदल़ै मिम्मूं बल़ीदान गाधैओ बल़ीदान करने ज़ाज़त निं आथी ती। करी बच़ाऊई, ज़ै तम्हां गाधअ नांईं बच़ाऊंणअ होए, तै सका तम्हैं तेऊ काटी। पर आपणैं ज़ेठै मणछ लागणै तम्हां बदल़अ दैई बच़ाऊंणै ई।
14“आजू सका केभै तम्हां का थारै शोहरू-माठै इहअ बी पुछ़ी, ‘अह इहअ किज़ै बधान आसा?’ तम्हैं खोज़ै तेभै तिन्नां का इहअ, ‘बिधाता आणै हाम्हैं आपणीं महान शगती करै मिसर देशे गलामी का छ़ड़ैऊई। 15तधू निस्सअ त मिसर देशो माहा राज़अ हाम्हां गलामी का छ़ाडी अर तधू पाऐ तै बिधाता मिसर देशे लोगे मणछ अर पशूए सोभ पैहलै सोए नर पशू मारी। तैही करा हाम्हैं आपणैं सोभी पशूए पैहलै सोए नर पशू बिधाता लै बल़ीदान। इहअ करै बच़ाऊआ हाम्हैं आपणैं ज़ेठै शोहरू।’
16“अह हणअ तम्हां लै नल़ै अर माथै लाऐ दै नछ़ैणा ज़िहअ। एता करै रहणअ तम्हां पोस्ती-दर पोस्ती आद कि बिधाता आपणीं महान शगती करै तम्हैं मिसर देशा का किहै आणै बच़ाऊई।”
बिधाता निंयैं आपणैं लोग
17खिरी ज़ांऊं मिसर देशे माहा राज़ै इज़राईली मणछा डेऊणैं दैनअ, पलिश्ती लोगे देशा बाती ती नेल़ बात। पर बिधाता निं इज़राईली मणछा तेस्सी बाती इहअ सोठी डेऊणैं दैनअ, “इहअ निं हआ कि इज़राईली मणछ आप्पू संघै जुध हंदअ भाल़ी तिन्नां मिसर देशा लै बापस फिरनें सोर फिरे।” 18तैही निंयैं बिधाता फेर दैई लाल समुंदरे रेगीस्ताने बाता।
इहअ करै निखल़ै इज़राईली मिसर देशा का अर तिंयां थिऐ जुधा करना लै आपणैं-आपणैं गोत्रे साबै तैर#13:18 तैर ज़धू इज़राईली मिसर देशा का निखल़ै, तिंयां निखल़ै सपाहीए दला ज़िहै।।
19मोसा निंयैं युसुफे हस्तू बी संघा। किल्हैकि युसुफै त मरदी बारी इहअ डाहअ द बोली, “ज़ेभै बिधाता आपणैं इज़राईली मणछा एऊ देशा का काढी निंए, तेभै निंयैं मेरै हस्तू बी आप्पू संघा।”#मूल. 50:25; ज़ैह. 24:32
20इज़राईली मणछ लागै सक्कोत ज़ैगा का हांढदै, संघा पाऐ तिन्नैं एताम ज़ैगा मिसर देशे सिऊंआं दी रेगीस्ताना नेल़ डेरै।
बादल़ो थाम्ह अर आगीओ थाम्ह
21-22धैल़ी हांढा त बिधाता खास्सै घणैं बडै थाम्हा ज़िहै बादल़ा दी तिन्नां आजू-आजू अर राची हांढा त ज़ल़दी आगीए बडै थाम्हा दी तिन्नां आजू-आजू, ताकि तिंयां धैल़ी अर राची हांढी सके।
Currently Selected:
लुआह 13: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
