2 इतिहास 5
5
1ज़ांऊं राज़ै सुलैमानै भबनो सारअ काम करी छ़ेक्कअ, तेऊ डाही सुन्नैं, च़ंदीए अर होर च़िज़ा बिधाते भबने भढारै ज़ुंण तेऊए बाब दाबेदै बिधाता लै ज़ुदी ती डाही दी।
बिधाते करारो मणशू पजैल़अ भबना भितरी
(1 राज़ै 8:1-9)
2तेखअ शादै राज़ै सुलैमानै सोभी गोत्र अर टोली का इज़राईली सैणैं एरुशलेम नगरी लै एही गल्ला करना लै कि बिधाते करारो मणशू निंणअ सियोन दाबेदपूर गहल़ा का बिधाता लै बणाऐं दै भबना लै। 3इज़राईली सोभ सैणैं हुऐ छ़ानींए थैरा बाती शऊजै कठा। 4ज़ांऊं तिधी सोभ इज़राईली सैणैं पुजै, लेबी च़कअ बिधाते करारो मणशू 5संघा पजैल़अ बिधाते भबना भितरी। प्रोहतै अर लेबी निंयैं करारे मणशू संघै तिंयां सोभ पबित्र भांडै अर सारअ समान ज़ुंण मेल़-ज़ोल़े खिम्भा दी थिऐ। खिम्भ बी निंयं तिन्नैं खोल्ही करै उझै। 6राज़अ सुलैमान अर इज़राईली टोली का ज़ेतरै बी लोग तिधी तै आऐ दै, तिंयां लागै करारे मणशू आजू हांढदै अर बाता काटै तिन्नैं एतरै खास्सै रिठ अर होर पशूए हेल़्ही कि तिन्नां निं कुंण गणी सकदअ त। 7तेखअ पजैल़अ प्रोहतै सह करारो मणशू बिधाता लै बणाऐं दै भबना भितरी तैहा ज़ैगा ज़ेता लै खास पबित्र ज़ैगा बोला तै। संघा डाहअ तिन्नां करूब नाओंए स्वर्ग दूते फैंखा हेठै बशैल़ी। 8तिंयां करूबे फैंख तै इहै कि करारो मणशू आअ तेते लोहल़ी संघी तेथ हेठै। 9करारे मणशू दी लाई दी लोहल़ी ती एही लाम्मी कि तिंयां जाआ ती भितरी खास पबित्र ज़ैगा आजू सम्हनै का शुझुई पर होर्ता का निं तिंयां किधी का शुझदी ती। तिंयां लोहल़ी आसा आझ़ तैणीं बी तिधी। 10करारे मणशू भितरी निं तिन्नां दूई पात्थरे शिला सुआई होर किछ़ै आथी त ज़ुंण तेथ होरेब धारा का एछी मोसा गूरै तधू डाही ती ज़धू बिधाता इज़राईली संघै मिसर देशा का एछदी बारी करार किई ती।
बिधातो प्रतप्प
11तेखअ डेऊऐ पबित्र ज़ैगा का सोभै प्रोहत। ज़ेतरै बी प्रोहत तिधी थिऐ तिंयां रहै बिधाता लै ज़ुदै च़ांगै-च़ोखै। संघा रहै आपणैं-आपणैं दले बारीए साबै बिधाते च़ाकरी लागी। 12ज़ेतरै बी लेबी बेदीए पुर्बा बाखा खल़्हुई गाज़ै-बाज़ै करै च़ाकरी करा तै, तिंयां थिऐ असाप, हमान, जदूतून, तिन्नें शोहरू अर होर भाई-बंध। तिन्नैं हआ तै बाछे च़ोल़ै बान्हैं दै अर तिंयां बाज़ा तै छ़छ़ाल़ा, दंतारै अर बींन। तिन्नां संघै हआ तै एक शौ बिह प्रोहत नर्शिंगची खल़्हुऐ दै। 13ज़ांऊं नर्शिंगची अर होर गाज़ै-बाज़ै आल़ै एकी ताला दी बाज़ी बिधातो शूकर अर ज़ै-ज़ैकार किई, घैरी बोली नर्शिंगै, छ़छ़ाल़ा अर होरी साज़ बाज़ा संघै गिह। तिन्नैं किई एही गिह बोली बिधाते स्तोती,
“बिधाता आसा भलअ अर
सह झ़ूरा हाम्हां लै सदा।”
तेखअ घोर्हुऐ बिधाते भबना फेर हेरा-हेरी घणैं बादल़। 14तिन्नां बादल़ा करै निस्सअ बिधाते भबनै च़ाकरी करनै आल़ै प्रोहते खल़ै टेखुई किल्हैकि बिधाते भबनै लागअ बादल़ा जैंदरी लागअ धुप्पै ज़िहअ झ़ामण अर तेथ लागी बिज़ल़ी ज़ेही झ़प्प-तल़प्पी।
Currently Selected:
2 इतिहास 5: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
