2 इतिहास 6
6
सुलैमानै दैनअ परज़ा लै भाषण
(1 राज़ै 8:12-21)
1राज़ै सुलैमानै किई बिधाता सेटा एही अरज़,
“बिधाता, तंऐं बोलअ इहअ,
2‘मुंह रहणअ नटिप्प न्हैरै बादल़ा जैंदरी।’
ऐबै बणाअं मंऐं ताल्है रहणा लै महान भबन
एथ लोल़ी तूह जुगै-जुगै तैणीं रहअ।”
3तिधी आऐ दै सोभ इज़राईली तै तिधी खल़्हुऐ दै, तेखअ फिरअ राज़अ सुलैमान तिन्नां बाखा लै संघा मांगी तेऊ तिन्नां लै बिधाता का इहअ बोली बर्गत, 4“इज़राईले परमेशर बिधाते लोल़ी सदा ज़ै-ज़ैकार हुई! तेऊ ज़ुंण ज़बान मेरै बाब दाबेदा लै दैनी ती, सह किई आझ़ तेऊ पूरी। तेऊ बोलअ त इहअ, 5‘ज़धू मंऐं आपणीं परज़ा मिसर देशा का काढी आणी, तधा ओर्ही आझ़ तैणीं निं मंऐं इज़राईले कोही गोत्रा मांझ़ै आप्पू लै एही कोहै नगरी छ़ांटी ज़िधी मेरी पूज़ा-गाज़ा करना लै भबन बणांए। नां कुंण मणछ मेरी परज़ा प्रैंदै राज़ करदअ छ़ांटअ। 6पर ऐबै छ़ांटी मंऐं एरुशलेम नगरी ज़िधी मेरी पूज़ा-गाज़ा होए अर आपणीं परज़ा इज़राईली प्रैंदै राज़ करना लै छ़ांटअ मंऐं तूह दाबेद।’”
7आजू बोलअ सुलैमानै इहअ, “मेरअ बाब दाबेद राज़अ च़ाहा त बिधाता लै एक भबन बणाणअं ताकि तैहा ज़ैगा एछी सोभ इज़राईली माथअ टेक्के। 8पर बिधाता बोलअ राज़ै दाबेदा लै, ‘ज़ुंण तूह मुल्है भबन बणाणां लै सोठा, सह सोठ आसा तेरी भली, 9पर ताह निं सह बणाणअं भेटणअ, पर तेरै शोहरू बणाणअं आजू मुल्है भबन।’
10“अह ज़ुंण बैण बिधाता बोलअ त, सह किअ तेऊ ऐबै पूरअ। हुंह बेठअ आजू आपणैं बाब दाबेदे ज़ैगा इज़राईल देशो राज़अ अर बिधाता लै भबन बी हेरअ मंऐं बणाईं। 11बिधाते करारे मणशू डाहणां लै बी बणाईं मंऐं भबना भितरी ज़ैगा। तेथ भितरी आसा दूई पात्थरे शिला बिधाते हाम्हां इज़राईली संघै सह करार ज़ुंण बिधाता म्हारै दादा-बाबा संघै मिसर देशा का एछदी बारी सीनाई धारा किई ती।”
राज़ै सुलैमाने अरज़
(1 राज़ै 8:22-53)
12तेखअ डेऊअ सुलैमान तिधी सोभी इज़राईली नदरी बिधाते बेदी सेटा संघा किई आपणैं हाथ उझै सरगा बाखा करी एही अरज़। 13राज़ै सुलैमानै ती तिधी एक पांज़ हाथ लाम्मी, पांज़ हाथ बिरली अर चअन हाथ उछ़टी च़ौकी बणाईं दी संघा ती सह बिधाते भबना आजू मांझ़ा-मांझ़ी खोल़ै डाही दी। सुलैमान त इज़राईली सम्हनै तैहा च़ौकी प्रैंदै खल़्हुअ द संघा किई तेऊ ज़ान्हूंए ज़ोरै बेशी सरगा बाखा हाथ करी एही अरज़, 14“हे इज़राईले परमेशर बिधाता, नां स्वर्गै ताह बराबर कुंण आथी अर नां उंधै धरती दी कुंण देअ ताह बराबर आथी! तूह झ़ूरा आपणीं परज़ा लै अर तूह करा तिन्नां लै आपणीं करार पूरी ज़ुंण तेरै बधान अर बिधी मनणा लै शुचअ-पाक्कअ रहा। 15तंऐं ज़ेही मेरै बाब दाबेदा लै ज़बान दैनी ती, तेतो किअ तंऐं आझ़ आपणअ एक-एक बैण पूरअ। 16ऐबै हे इज़राईले परमेशर बिधाता होर बी ज़ुंण गल्ला तंऐं आपणैं दास दाबेदा का आसा बोली दी, तिन्नां बी करै पूरी। तंऐं आसा मेरै बाबा लै बोलअ द, ‘तेरी आद-लुआदा मांझ़ै ई हणअ एक ज़ण्हअ इज़राईला प्रैंदै सदा लै राज़अ, ज़ै तिंयां ताह ज़िहै ई मेरै बधान अर बिधी मने।’ 17ऐबै हे इज़राईले परमेशर बिधाता, ज़ुंण तंऐं मेरै बाब दाबेदा का आसा बोलअ, ऐबै लोल़ी तिंयां सोभै गल्ला तेही ई निभी।
18“हे परमेशर, ऐबै ताह सच्च़ी रहणअ धरती दी मणछा संघै? ताल्है पल़ा सारअ भ्रमंड बी थोल़अ, तेखअ मेरअ बणाअं द अह होछ़अ ज़िहअ भबन किधी च़ाल्लअ ताल्है पूरअ पल़ी! 19हे मेरै परमेशर बिधाता, हुंह आसा तेरअ दास, ज़ीबाण, तूह शुण मेरी अरज़ ज़ुंण आझ़ हुंह ताखा करा। 20अह भबन छ़ांटअ तंऐं आप्पू लै कि इधी तेरी पूज़ा-गाज़ा होए। तूह रहै धैल़ी-राची एता भाल़अ लागी अर ज़ेभै हुंह एथ बाखा मोहरअ करी अरज़ करूं, तेता शूणैं तूह। 21हुंह आसा तेरअ दास, अर इज़राईली सारी परज़ा बी आसा तेरी। तेरी इज़राईली परज़ा बी ज़ेभै तेरै भबना बाखा भाल़ी अरज़ करे, तूह शूणैं तेता स्वर्गा का संघा करै म्हारै पाप माफ।
22“ज़ै कहा मणछा दुजै मणछा लै ज़ुल्म करनैओ दोश होए, अर ज़ै सह मणछ तेरै भबनै तेरी बेदी सेटा एछी सोह खाए कि तेऊओ निं किछ़ै कशूर आथी, 23तै हे बिधाता, तूह करै आपणैं दासो नसाफ स्वर्गा का। तूह दैऐ दोशी लै आप्पै सज़ा अर नर्दोश लोल़ी राज्ज़ी-राम्बल़अ रहअ।
24“ज़ै तेरी परज़ा इज़राईली ताल्है पाप करनै पिछ़ू दुशमणा का हारे, तेखअ ज़ै तिंयां तेरै भबना लै एछी लेर-पकार पाई ताखा माफी मांगे, 25तूह शूणैं स्वर्गा का तिन्नें अरज़ संघा करै आपणीं इज़राईली परज़े पाप माफ। तेखअ आणै तिन्नां तैहा ज़ैगा लै बापस फरेऊई ज़ुंण तंऐं तिन्नें दादा-बाबा लै आसा दैनी दी।
26“ज़ै तेरी परज़ा ताल्है पाप करनै पिछ़ू तूह ज़ै तिन्नां लै सरगा का पाणीं हणअ बंद करे, तेखअ ज़ै तिंयां पाप करनअ छ़ाडे अर तेरै भबना बाखा फिरी ताखा अरज़ करे, 27हे बिधाता, तूह शूणैं तिन्नें अरज़ स्वर्गा का संघा करै राज़ै अर इज़राईलीए पाप माफ, तूह दैऐ तिन्नां लै भलै करने शिक्षा। हे परमेशर, तेखअ दैऐ तूह आपणीं ऐहा ज़ैगा सरग हणैं ज़ुंण तंऐं सदा लै आपणीं परज़े ज़ैदात आसा बणाईं दी।
28“ज़ै केभै एऊ देशै नकाल़, कि मरी, नाज़ा लै शुक्कअ पल़े, रैट्टै, कि नाज़ा लै गाल़्ही लागे, कि तेरी परज़ा दुशमण गोटे, कि तेरी परज़ा लै आफ़त पल़े कि किज़ै रोग लागे, 29तेभै ज़ै तेरी परज़ा इज़राईली दिला का माल़ी च़ेते कि तिन्नें भलै हुई गलती अर ज़ै तिंयां मणछ ताह सेटा एऊ भबना बाखा बाह फुआरी अरज़ करे, 30तेभै शूणैं तूह तिन्नें अरज़ स्वर्गै आपणैं घअरै संघा छ़ाडै तिन्नां लै माफी। तिन्नां लै दैऐ ज़सरै मन्नैं ज़िहअ होए तिहअ फल। किल्हैकि मणछे मन्नैं किज़ै आसा, एतो थोघ हआ सिधअ ताखा ई। 31ताकि तैहा ज़ैगा ज़ुंण तंऐं तिन्नें दादा-बाबा लै दैनी ती, तेथ रहणअ तिन्नां आपणीं ज़िऊंदी ज़िता तेरी डरा हेठै अर तिन्नां करनअ ज़िहअ तूह बोला तिहअ।
32“तेखअ ज़ै तेरी इज़राईली परज़ा छ़ाडी ज़ै कुंण होर दूर परदेसा का तेरअ नाअं अर तेरै महान कामें बारै शूणीं ताह सेटा लै एछे अर सह तेरै एऊ भबना बाखा फिरी अरज़ करे, 33तूह शूणैं तेऊए अरज़ स्वर्ग आपणैं बसेरै का। तूह करै तेऊए दिला-मन्नें पूरी ताकि संसारे सोभी लोगा का तेरअ थोघ लागे अर तिंयां बी तेरी परज़ा इज़राईली ज़िहै तेरी डरा हेठै रहे। तेखअ लागणअ तिन्नां सोभी का थोघ कि ज़ुंण मंऐं ताल्है भबन बणाअं, अह ज़ैगा आसा तेरी पूज़ा-गाज़ा करने।
34“हे बिधाता, ज़ै केभै तूह आपणीं परज़ा दुशमणा संघै मकाबलै करदै ज़िधा लै बी छ़ाडे, तिंयां ज़िधी बी होए अर ज़ै तिंयां खास्सै दूर हई बी तंऐं आप्पू लै छ़ांटी दी ऐहा नगरी अर मंऐं ताल्है बणाऐं दै एऊ भबना बाखा आपणअ मोहरअ करी ताह बिधाता सेटा अरज़ करे, 35तूह शूणैं तिन्नें अरज़ स्वर्गै संघा दैऐ तिन्नां लै तिन्नें दुशमणा का ज़ीत।
36“हे बिधाता, एही ता आसा सोभ मणछ पापी, पर ज़ै तेरी परज़ा ताल्है पाप करे, अर तेता पिछ़ू ज़ै तूह इहअ रुश्शे कि तेरी परज़ा दुशमणा का हारे अर दुशमण तिन्नां होरी देशा लै कैद करी निंए, च़ाऐ सह देश केतरअ बी दूर किल्है निं होए, 37तूह शूणैं आपणीं परज़े अरज़ तेथ बी। ज़ेऊ देशै तिंयां कैद करी होए निऐं दै, ज़ै तेथ तिंयां ताह सेटा लेर-पकार पाई बोले, ‘हे म्हारै बिधाता, हाम्हैं किअ घोर पाप, हाम्हैं आसा खास्सै कदुष्ट अर हाम्हैं किअ बेघै कदुष्ट काम।’ 38तेखअ ज़ै तिंयां दिला का माल़ी च़ेते अर तिंयां दूर दुशमणे देशा का बी तैहा ज़ैगा ज़ुंण तंऐं तिन्नें दादा-बाबा लै दैनी ती, ऐहा नगरी ज़ुंण तंऐं आप्पू लै छ़ांटी अर भबन ज़ुंण मंऐं ताल्है बणाअं, एथ बाखा मोहरअ करी ताखा अरज़ करे, 39तूह शूणैं तिन्नें अरज़ स्वर्गै आपणैं बसेरै का। संघा करै तिन्नां लै झींण अर तूह करै आपणीं परज़े सोभ पाप माफ।
40“ऐबै हे परमेशर बिधाता, तूह शूणैं तेभै म्हारी ज़ेभै हाम्हैं एऊ भबनै एछी ताखा अरज़ करे।
41ए म्हारै परमेशर बिधाता, ऐबै एछ तूह आपणैं नऊंऐं घअरा लै
संघा बस्सै इधी सदा लै, तेरै ज़ोरे नशाणी तेरअ करारो मणशू आसा हाम्हैं तिधी डाही हेरअ द।
तूह दैऐ प्रोहते सोभी कामां लै बर्गत, तेरी सारी परज़ा लोल़ी तेरी भलाई करै सदा खुश रही।
42हे परमेशर बिधाता, ज़ुंण राज़अ तंऐं छ़ांटअ, तेऊ निं शोटी डाही।
तूह डाहै सदा आद कि तूह आपणैं दास दाबेदा लै किहअ झ़ूरा।”
Currently Selected:
2 इतिहास 6: OSJ
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
