गिणती 36
36
सलोफादो री बेटिया रा इस्सा
1फेर मनश्शे रे गोत्रो रे गिलादो रे वंशो रे कुलो रे पितरा रे कराने रे खास-खास मर्द मूसे रे नेड़े जाई की तिना परदाना रे सामणे, जो इस्राएलिया रे पितरा रे कराने रे खास मर्द थे, 2बोलणे लगे, “ओ म्हारे मालक, यहोवे तुसा खे आज्ञा दित्ती थी, कि तुसे ये देश चिट्ठी पाई की इस्राएलिया खे बांडी देओ। फेर यहोवे तुसा खे ये बी आज्ञा दित्ती थी कि आसा रे पाई सलोफादो रा इस्सा तेसरी बेटिया खे देणा। 3पर जे सेयो इस्राएलिया रे ओरी केसी गोत्रा रे मर्दा खे ब्याई जाओ, तो तिना रा इस्सा आसा रे पितरा रे इस्से ते छूटी जाणा ओर जेते गोत्रो रे से ब्याई जाओ तेसी गोत्रो रे इस्से रे मिली जाणा; ईंयाँ म्हारा इस्सा कअटी जाणा। 4ओर जेबे इस्राएलिया रा जुबली साल आऊणा, तेबे जेस गोत्रो रे से ब्याई जाओ तेसरे इस्से रे तिना रा इस्सा पुरिया तरअ ते मिली जाणा ओर से आसा रे पितरा रे गोत्रो रे इस्से ते सदा खे छूटी जाणा।”
5तेबे यहोवे ते आज्ञा पाई की मूसे इस्राएलिया खे बोलेया, “मनश्शे रे गोत्रो रे लोक ठीक बोलोए। 6सलोफादो री बेटिया रे बारे दे यहोवे ये आज्ञा देई राखी कि जो वर तिना री नजरा रे खरा लगो से तेसी साथे ब्याई जाओ; पर से आपणे बुजुर्गा रेई गोत्रो रे कुलो रेई ब्याई जाओ। 7कऊँकि हर एक इस्राएली लोका रे केसी गोत्रो रा इस्सा दूजे रे गोत्रो रे इस्से रे नि मिलो; इस्राएली लोक आपणे-आपणे बुजुर्गा रे गोत्रो री जमीना पाँदे टीके रे रओ। 8ओर इस्राएली लोका रे केसी बी गोत्रो रे केसी री बी बेटी ओ जो इस्सेदार ओ, से आपणे ई बुजुर्गा रे गोत्रो रे मर्दो साथे ब्याई जाओ, इजी खे इस्राएली आपणे-आपणे बुजुर्गा रे इस्से रे अक्कदार ओ। 9केसी गोत्रो री जमीन दूजे गोत्रो री जमीना दे नि मिलो; इस्राएलिया रे हर एक गोत्रो रे लोक आपणे-आपणे बुजुर्गा री जमीना पाँदे टीके रे रओ।” 10जेड़ी आज्ञा यहोवे मूसे खे दित्ती थी तेड़ा ई सलोफादो री बेटिए कित्तेया। 11इजी खे सलोफादो री बेटिये मतलब महला, तिर्सा, होग्ला, मिल्का ओर नोवा, इने आपणे चाचेया रे पाऊआ साथे ब्या कित्तेया। 12सेयो यूसुफो रे पाऊ मनश्शे रे गोत्रो रे कुलो रे ब्याईया ओर तिना री जमीन तिना रे बुजुर्गा रे कुलो रे गोत्रो रे अक्को रे बणी री रई। 13जो आज्ञा ओर नियम यहोवे मोआबो रे मैदानो रे यरीहो रे नेड़े यरदन नदिया रे कनारे पाँदे मूसे रे जरीये इस्राएलिया खे दित्ते सेयो येई ए।
Currently Selected:
गिणती 36: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
