गिणती 35
35
लेविया रे शईर
1यहोवे यरीहो शईरो रे नेड़े यरदन नदिया रे कनारे मोआबो रे मैदानो रे इस्राएली लोका रे बारे दे मूसे खे बोलेया, 2“इस्राएली लोका खे आज्ञा दे कि तुसे आपणे-आपणे इस्से री जमीना बीचा ते लेविया खे रणे खे शईर देओ ओर शईरो रे चऊँ कनारे चराणे खे तिना खे देओ। 3शईर तो लेविया रे वंशो खे रणे खे ऊणे ओर चराईया तिना रे गाय-बल़द, ओर पेडा-बाकरिया बगैरा, तिना रे सबी डांगरा खे चरने खे ओ। 4ओर शईरो री चराईया, जो तुसे लेविया खे देओगे, से एकी-एकी शईरो री दवाला ते बारे चऊँ कनारे 1 ह्जार 500 फुट ओ। 5ओर शईरो रे बारे पूर्व, दक्खण, पच्छम ओर उत्तरा री तरफा खे दो-दो ह्जार आथ एते तरीके ते नापणा कि शईर बीचो बिछिए ओ; लेविया रे एकी-एकी शईरो री चराई इतणी ई जमीना री ओ। 6ओर जो शईर तुसे लेविया खे देओगे तिना बीचा ते छे शरण शईर ओ, जेती कोई खूनी आपू खे शरण लणे खे नठी सको ओर तुसे तिना खे इना शईरा ते अलावा 42 शईर ओर बी देणे। 7जितणे शईर तुसे लेवी वंशो खे देओगे सेयो सब 48 ओ, ओर तिजी साथे चराईया देणा। 8तुसे इस्राएली लोका री बरासता री जमीना बीचा ते लेविया खे आपणे-आपणे इस्से रे मुताबिक देओ मतलब जिना गोत्रा गे बऊत शईर ओ तिना ते ज्यादा ओर जिना गोत्रा रे कम ओ तिना ते कम लई की देणे, सब आपणे-आपणे शईरो बीचा ते लेविया खे आपणी-आपणी ई जमीना रे इस्से रे मुताबिक देओ।”
खूनिए खे शरण लणे रे शईर
(बिधान 19:1-13; यहोशू 20:1-9)
9फेर यहोवे मूसे खे बोलेया, 10“इस्राएली लोका खे बोलो कि जेबे तुसे यरदन नदिया ते पार ऊई की कनान प्रदेशो रे पऊँचो, 11तेबे आपू खे एड़े शईर ठराणे जो तुसा खे शरण लणे खे ओ, ताकि जो कोई केसी खे अणजाणे रे मारी की खूनी ठईरेया रा ओ से शरण लणे खे तेथो खे नठी जाओ। 12सेयो शईर तुसा खे बदला लणे वाल़े ते शरण लणे रे कामे आऊणे कि जदुओ तक खूनी न्याय रिया तँईं मण्डल़िया रे सामणे खड़ा नि ओ तदुओ तक से काया नि जाओ। 13ओर जो शईर तुसे देओगे, सेयो तुसा रे छे शरण शईर ऊणे। 14तुसे शरण लणे खे तीन शईर तो यरदन नदिया रे वारले कनारे ओर तीन कनान प्रदेशो रे देओ; शरण शईर इतणे ई रओ। 15ये छे शईर इस्राएली लोका रे ओर तिना बीचे रणे वाल़े परदेशिया खे बी शरणस्थान ऊणे, ताकि जो कोई माणूं केसी खे अणजाणे रे काई देओ से तेथो खे नठी जाओ।”
16पर जे कोई केसी खे लोए रे केसी अथियारे की एड़ा बाओ की से मरी जाओ तो से बाणे वाल़ा माणूं खूनी मानेया जाणा ओर से खूनी जरूर काया जाओ। 17ओर जे कोई एड़ा पात्थर आथो रे लई की, जेते की कोई मरी सकोआ, केसी माणूंए खे बाओ, ओर से मरी जाओ, तो से बाणे वाल़ा खूनी मानेया जाणा ओर से खूनी जरूर ई काया जाओ। 18या कोई आथो रे एड़ा डण्डा लई की, जेते की कोई माणूं मरी सकोआ, केसी खे बाओ ओर से मरी जाओ, तो से बाणे वाल़ा खूनी मानेया जाणा ओर से खूनी जरूर ई काया जाओ। 19मरे रे माणूंए रे नेड़ो रा पाई-बन्दु तेस खूनिए खे काओ; जेबे बी से मिलो तेबेई से तेसखे काई देओ। 20ओर जे कोई केसी खे दुश्मणिया री बजअ ते ताका देई देओ या तेसरी ताका रे बैठी की तेस पाँदे कुछ एड़ा सेटी देओ कि से मरी जाओ, 21या दुश्मणी राखी की तेसखे आपणे आथे की एड़ा बाओ कि से मरी जाओ, तो जिने से काई राखेया से जरूर ई काया जाओ; कऊँकि से खूनी मानेया जाणा; मरे रे माणूंए रे नेड़ो रे पाई-बन्दुए खे जेबे बी से खूनी मिली जाओ तेबुई से तेसखे काई देओ।
22पर जे कोई केसी खे बिना सोचे, ओर बिना दुश्मणी राखे ताका देओ या बिना ताका रे बैठे रे तेस पाँदे कुछ सेटो, 23या एड़ा कोई पात्थर लई की, जेते की कोई मरी सको, तेसखे बिना देखे तेस पाँदे सेटी देओ ओर से मरी जाओ, पर से ना तो तेसरा दुश्मण ओ ओर ना ई तेसरा तेसखे कोई नुकशाण पऊँचाणे रा इरादा ओ; 24तो मण्डल़ी काणे वाल़े ओर खूनो रा बदला लणे वाल़े रे बीचे इना नियमा रे मुताबिक न्याय करो;#35:24 गिण. 35:12, यहोशू 20:6 25ओर मण्डल़ी तेस खूनिए खे मरे रे माणूंए रे नेड़ो रे पाई-बन्दुए रे आथो ते बचाई की तेस शरणस्थानो रे जेते शईरो रे से पईले नठेया ओ वापस पेजी देओ ओर जदुओ तक से पवित्र तेलो ते अभिषेक कित्तेया रा बड़ा पुरोईत मरी नि जाओ तदुओ तक से तेथी रओ। 26पर जे से खूनी तेस शरणस्थानो री जगा रे बन्ने ते जिदे से नठीगा ओ बारे निकल़ी की ओर केथी चली जाओ, 27ओर मरे रे माणूंए रे नेड़ो रा पाई-बन्दु तेसखे शरणस्थानो रे बन्ने ते बारे पाई की काई देओ, तो से खून करने रा दोषी नि ठईरना। 28कऊँकि खूनिए खे बड़े पुरोईतो री मौत ऊणे तक शरण लणे रे शईरो देई रणा चाईयो ओर बड़े पुरोईतो रे मरने ते बाद से आपणी जमीना रे वापस आई सकोआ।
29न्याय रे ये रीति-रवाज तुसा री पीढ़िया-पीढ़िया रे तुसा रे सबी रणे री जगा रे मानणे ओगे। 30ओर जो कोई केसी माणूंए खे काओ से गवाह् रे बोलणे ते काया जाओ, पर एकी गवाह् री गवाईया ते कोई नि काया जाओ।#35:30 बिध. 17:6, मत्ती 18:16 31तुसे खूनिए ते जेसखे मौता री सजा सुणाई राखी ओ तेसते मौता री सजा रे बदले जुर्माना नि लणा; तेसखे जरूर मौता री सजा दित्ती जाओ। 32ओर जो केसी शरण लणे रे शईरो खे नठेया रा ओ तेसते बी आपणे देशो खे आऊणे रिया तँईं प्राश्चितो रा जुर्माना नि लणा, कि से बड़े पुरोईतो रे मरने ते पईले फेर आपणे रणे री जगा खे वापस आई जाओ। 33इजी खे जेस देशो रे तुसे रओ तिजी खे अशुद्ध नि करना; खूने बाह्णे री बजअ ते तो देश अशुद्ध ऊई जाओआ ओर जेते देशो रे जेबे खून कित्तेया जाओ तेबे बस खूनिए रा खून बाह्णे तेई तेस देशो रा प्राश्चित ऊई सकोआ।#35:33 बिध. 21:7 34आँऊ यहोवा तो इस्राएलिया बीचे रऊँआ इजी खे जेते देशो रे तुसे रओ से अशुद्ध नि करना।#35:34 लेवी. 18:24
Currently Selected:
गिणती 35: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
