बिधान 1
1
होरेबो पाह्ड़ो ते जाणे री आज्ञा
1जो गल्ला मूसे सारे इस्राएली लोका खे यरदन नदिया ते पार सुनसाण जगा रे बोलिया, सेयो यो ए। से जगा सूफो रे सामणे अराबा रे, पारान, तोपेल, लाबान, हसेरोत ओर दीजाहाबो रे बीचे ए। 2होरेब पाह्ड़ो ते कादेशबर्ने तक सेईर पाह्ड़ो री बाटा रिये चली की सफर ग्यारा दिना रा ए।
3जो गल्ला इस्राएली लोका ते बोलणे री आज्ञा यहोवे मूसे खे दित्ती थी, तिजी रे मुताबिक मूसे सेयो गल्ला तिना ते चाल़िए साला रे ग्यारुए मीन्ने रे पईले दिने बोलिया। 4मतलब जेबे मूसे एमोरिया रा राजा हेशबोन शईरो रा रणे वाल़ा सिहोन ओर बाशानो रा राजा अशतारोत शईरो रा ओग एद्रेई शईरो रे काये।
5तिजी ते बाद यरदनो ते पार मोआब प्रदेशो रे मूसा बिधानो रे बारे दे ईंयाँ बताणे लगेया,
होरेबो ते चलणा
6म्हारे परमेशर यहोवा होरेब पाह्ड़ो पाँदे आसा खे ये बोलेया था, “तुसा लोका खे एते पाह्ड़ो पाँदे रंदे ऊए बऊत बखत ऊईगा रा; 7इजी री खातर एबे एथा ते चलो ओर एमोरिया रे पाह्ड़ी प्रदेशो खे ओर क्या अराबा रे, क्या पाह्ड़ा रे, क्या थालले देशा रे, क्या नेगेब प्रदेशो दे, क्या समुद्रो रे कनारे पाँदे, जितणे लोक एमोरिया गे रओए, तिना रे प्रदेशो खे, मतलब लबानोन पाह्ड़ो तक ओर फरात नाओं री नदिया तक रणे वाल़े कनानिया रे प्रदेशो तक बी चली जाओ। 8देखो, आऊँ तेस प्रदेशो खे तुसा सामणे करी देऊँआ; जेस प्रदेशो रे बारे दे यहोवे अब्राहम, इसहाक, याकूब ओर तुसा रे पितरा ते कसम खाई की बोलेया था कि मां ये तुसा खे ओर तुसा ते बाद तुसा रे वंशो खे देणा, तिदे जाई की एबे तिजी खे आपणे अक्को रे करी लओ।”
मूसे रे जरिये न्यायिया री नियुक्ति
(निर्गमन 18:13-27)
9तेबे तेसी बखते मूसे तिना लोका खे बोलेया, “जेबे आसे सीनै पाह्ड़ो गे थे तेबे मैं तुसा रे बुजुर्गा खे बोलेया कि आऊँ तुसा री जिम्मेबारी कल्ला नि चकी सकदा; 10कऊँकि तुसा रे परमेशर यहोवा तुसे एथो तक बढ़ाई राखे कि तुसे गिणतिया रे आज सर्गो रे तारेया जेड़े अणगिणत ऊईगे रे।#1:10 इब्रानी 11:12 11तुसा रे पितरा रा परमेशर तुसा खे ह्जार गुणा ओर बी बढ़ाओ ओर आपणे वादे रे मुताबिक तुसा खे आशीष बी देंदा रओ! 12पर तुसा रा चंजट, बोज ओर चगड़ेया खे आऊँ कल्ला केथो तक सईन करी सकूँआ? 13इजी री खातर तुसे आपणे एकी-एकी गोत्रो बीचा ते अक्लमंद ओर समजदार ओर जाणे-माणे रे मर्द चूणी लओ ओर मां सेयो तुसा पाँदे मुखिया ठराणे।”
14इजी रे जवाबो रे तुसे माखे बोलेया, “जो कुछ तूँ आसा खे बोलणे लगी रा तिजी खे करना अच्छा ए।”
15इजी री खातर मैं तुसा रे गोत्रा रे जाणे-माने रे लोका बीचा ते कामयाब माणूं चूणे ओर सेयो लोका रे मुखिया ओर न्यायी बणाए, मतलब ह्जार-ह्जार, 100-100, 50-50 ओर 10-10 लोका पाँदे ओर तुसा रे हर गोत्रो रे मुखिया ठराए। 16तेस बखते मैं तुसा रे न्याय करने वाल़ेया खे आज्ञा दित्ती, “तुसे आपणे पाईया बीचले चगड़ेया रा न्याय करेया करो ओर तिना बीचे, तिना रे पड़ोसिया बीचे ओर परदेशिया बीचे बी धार्मिकता साथे न्याय करेया करो।#1:16 यूह. 7:51 17न्याय करदे बखते केसी रा पक्ष नि करना, जिंयाँ बड़ेया री तिंयाँ ई छोटे माणूंआ री बी सुणनी; केसी माणूंए खे देखी की नि डरना, कऊँकि न्याय करना परमेशरो रा काम ए ओर जो मकद्दमा तुसा खे कठण ओ, तेस मांगे ली आओ ओर मां से सुणना।”#1:17 याकूब 2:9 18मैं तेसी बखते तुसा रे सारे फर्ज ओर काम तुसा खे बताई ते।
पेतिया रा पेजणा
(गिणती 13:1-33)
19आसे होरेबो ते चली की आपणे परमेशर यहोवे री आज्ञा रे मुताबिक तेसा डराऊणी सुनसाण जगा रिये चले, जो तैं एमोरिया रे पाह्ड़ी प्रदेशो री बाटा रे देखी ओर आसे कादेशबर्नो तक आए। 20तेती मैं तुसा रे बुजुर्गा खे बोलेया, “तुसे एमोरिया रे पाह्ड़ी प्रदेशो तक आईगे रे, जेतेखे म्हारा परमेशर यहोवा आसा खे देओआ। 21देखो, तेस प्रदेशो खे आसा रा परमेशर यहोवा आसा खे देई देओआ, इजी री खातर आपणे पितरा रे परमेशर यहोवे री आज्ञा रे मुताबिक तिजी पाँदे चलो ओर तिजी खे आपणे अक्को रे लई लो, तुसे डरना नि ओर ना ई निराश ऊणा।”
22तेबे सेयो सब मांगे आई की बोलणे लगे, “आसा आपू ते आगे मर्द पेजी देणे, जो तेते प्रदेशो रा पता लगाई की आसा खे ये सन्देशा देओ कि कुणजी बाटा रे ऊई की चलणा ऊगा ओर केस-केस शईरो रे जाणा पड़ना?” 23एते गल्ला ते खुश ऊई की मैं हर गोत्रो बीचा ते एक-एक मर्द चूणी ला, मतलब तिना बीचा ते बारा मर्द चूणी लये। 24तेबे सेयो पाह्ड़ो पाँदे चढ़ीगे ओर एशकोल नाओं री काअटिया रे पऊँची की तिने तेते प्रदेशो रा पेत लया। 25ओर सेयो तेते प्रदेशो रे फल़ो बीचा ते कुछ आथो रे लई की आसा गे लई आए ओर तिने आसा खे ये सन्देशा दित्तेया, “जो देश म्हारा परमेशर यहोवा आसा खे देओआ से जमीन बऊत ई अच्छी ए।”
इस्राएलिया रा परमेशरो रे खलाफ बिद्रोह
(गिणती 14:1-45)
26तेबे बी तुसा रे बुजुर्गे तेती जाणे ते ओर तेसा जमीना खे जितणे ते ना करी ती, बल्कि आपणे परमेशर यहोवे री आज्ञा रे खलाफ ऊई की, 27आपणे-आपणे डेरे रे ये बोली की शकाईत करने लगे, “यहोवा आसा साथे बैर राखोआ, इजी बजअ ते आसा खे मिस्र प्रदेशो ते निकयाल़ी की ल्याया, ताकि आसा खे एमोरिया रे वशो रे करी की म्हारा सत्यानाश करी देओ। 28आसे केई जाऊँ? म्हारे पाईए ये बोली की म्हारे मनो रे डर पैदा करिता रा कि तेथो रे लोक आसा ते जादा लाम्बे ओर तागतबर ए ओर तेथो रे शईर बड़े-बड़े ए ओर तेथो री दवाला बऊत ऊच्चिया ए ओर आसे तेती अनाकवंशी लोक बी देखे जो बऊत ई लाम्बे ओर तागतबर थे।”
29मैं तुसा रे बुजुर्गा खे बोलेया था, “तिना रिया बजअ ते डरो नि। 30आसा रा परमेशर यहोवा जो आसा ते आगे-आगे चलोआ, से आपू आसा रिया तरफा ते लड़ना, जिंयाँ तिने मिस्रो रे आसा रे देखदे ऊए आसा रिया तँईं कित्तेया; 31तुसे सुनसाण जगा रे बी येई देखेया कि जिंयाँ माणूं आपणे बच्चे खे गोदा रे चकी की लई चलोआ, तिंयाँ ई तुसा रा परमेशर यहोवा तुसा खे ल्याया। जदुओ तक तुसे एसा जगा रे नि पऊँचे तदुओ तक से तुसा खे तेसा सारिया बाटा रे चकी की ल्याया जिदे तुसे आए थे।”#1:31 प्रेरित 13:18
32एते गल्ला पाँदे बी तुसे आपणे परमेशर यहोवे पाँदे विश्वास नि कित्तेया, 33जो तुसा ते आगे-आगे इजी खे चलदा रया ताकि तुसा खे डेरे लगाणे रिया तँईं जगा टोल़ो ओर राती आगी रे ओर दिने बादल़ो जेड़ा ऊई की चलेया, ताकि तुसा खे से बाट दखाओ जिदे तुसा चलणा। 34पर तुसा रिया यो गल्ला सुणी की यहोवे रा कोप पड़की गा ओर तिने ये एलान कित्तेया, 35“जेसा जमीना खे मैं तिना रे पितरा खे देणे री कसम खाई थी एसा खरिया जमीना खे एसा बुरिया पीढ़िया रा एक बी माणूं नि देखी सकणा। 36सिर्फ यपुन्ने रे पाऊ कालेबो ई से देखणी ओर जेते जमीना पाँदे तेसरे पैर पड़ी रे से मां तेसखे ओर तेसरे वंशो खे बी देणी; कऊँकि से मां पीछे पूरी रीतिया ते चली रा।”
37ओर मां पाँदे बी यहोवा तुसा रिया बजअ ते गुस्से ऊआ ओर ये बोलेया, “तूँ बी तेसा जमीना पाँदे नि जाई सकणा; 38नूनो रा पाऊ यहोशू जो तेरे सेवको जेड़ा तां सामणे खड़ेया रा रओआ, से तो तेती जाणा, इजी री खातर तूँ तेसखे याओ दे, कऊँकि से जमीन इस्राएलिया रे अक्को रे तेस ई करनी।” 39तेबे यहोवे आसा सबी खे बोलेया, “तेबे तुसा रे बाल-बच्चे जिना रे बारे दे तुसे बोलोए कि यो लूटा रे चली जाणे ओर तुसा रे बाल-बच्चे जो खरे-बुरे रा पेत नि जाणदे, सेयो तेती जाणे ओर तिना खे मां से जमीन देणी ओर सेयो तेथो रे अक्कदार ऊणे। 40पर तुसे लोक कूमी की जाओ ओर नगल़ो रा समुद्रो रिया बाटा ते सुनसाण जगा रिया तरफा खे चली जाओ।”
41तेबे तुसे माखे ये उत्तर दित्तेया, “आसे यहोवे रे खलाफ पाप करी राखेया; एबे आसा आपणे परमेशर यहोवे री आज्ञा रे मुताबिक अमला करना ओर लड़ना।” तेबे तुसे आपणे-आपणे औजार लई की पाह्ड़ो पाँदे बिना सोचे-समजे चढ़ने खे त्यार ऊईगे कि ये लड़ाई आसान ऊणी।
42पर यहोवे माखे बोलेया, “तिना खे बोली दे कि तुसे नि चढ़ो ओर ना ई लड़ो, कऊँकि मां तुसा साथे नि रणा; केथी एड़ा नि ओ कि तुसे आपणे दुश्मणा ते आरी जाओ।”
43ये गल्ल मैं तुसा खे बोली ती, पर तुसे नि मानी, पर टीठ ऊई की यहोवे रिया आज्ञा खे नि मानी की पाह्ड़ी देशो पाँदे अमला कित्तेया। 44तेबे तेस पाह्ड़ी देशो रे रणे वाल़े एमोरिये तुसा रा सामणा करने खे निकल़ी की पँऊरी जेड़ा तुसा रा पीछा कित्तेया ओर सेईर प्रदेशो रे होर्मा तक तुसा रे सिपाईया खे कांदे-कांदे आईगे। 45तेबे तुसा रे बुजुर्ग वापस आई की यहोवे रे सामणे रोणे लगे; पर यहोवे तुसा रे बुजुर्गा री नि सुणी, ना तिना री गल्ला पाँदे त्यान कित्तेया। 46ओर तुसे कादेश प्रदेशो रे बऊत ई दिना तक पड़े रे रये।
Currently Selected:
बिधान 1: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
