यशायाह 60

सिय्योनो दे परमेशरो री महिमा

1ओ यरूशलेम शईरो रे लोको, उठो, सामर्था साथे परी जाओ; ओर यहोवे रा वैभव तुसा पाँदे उदय ऊई रा।#60:1 इफि. 5:14 2देखो आज तरतिया पाँदे तो न्हेरा ओर राज्य-राज्य रे लोका पाँदे अन्दकूप न्हेरा छायी रा; पर तुसा पाँदे यहोवे रा प्रकाश ऊणा ओर तेसरे उपस्थित ऊणे री चमक तुसा पाँदे प्रगट ऊणी।#60:2 यूह. 1:14, प्रका. 21:23 3तेस बखते सारे देशो रिया जातिया-जातिया रे लोक ओर राजा तुसा पाँदे ऊए रे नवें दिनो री शुरूआत देखणे आऊणे।#60:3 प्रका. 21:24 4आपणे चऊँ कनारे देख कि क्या ऊणे लगी रा; तेरे चऊँ कनारे सेयो सारे के सारे कट्ठे ऊई की तांगे आऊणे लगी रे; तेरे पाऊ दूरा ते आऊणे लगी रे ओर तेरी बेटिया आथो-आथ पऊँचाईया जाणे लगी रिया। 5तेबे तुसा ये देखणा ओर तुसा रा मूँ चमकणा, तुसा रा मन डरी जाणा ओर खुशिया साथे परी जाणा; कऊँकि समुद्रो रा सारा तअन ओर जातिया-जातिया री सारी सम्पत्ति तुसा खे मिलणी।#60:5 यिर्म. 33:9, योए. 2:26, यशा. 61:6 6तेरे देशो रे ऊँटा रे चूण्ड ओर मिद्यान ओर एपा देशो रिया साँड़णिया कट्ठिया ऊणिया; शेबा जगा रे सारे लोका आई की सूईना ओर लोबान पेंट ल्याऊणी ओर लोका यहोवे री महिमा खुशिया साथे सुनाणी।#60:6 पज. 72:10, मत्ती 2:11 7केदार जगा रिया सब पेडा-बाकरिया कट्ठिया ऊई की तेरिया ऊई जाणिया, नबायोत जगा रे खाडू तेरी सेवा करने रे कामे आऊणे; सेयो मेरी बेदिया पाँदे ग्रहण करे जाणे ओर मां आपणा सुन्दर मन्दर ओर बी प्रतापी करी देणा।#60:7 मत्ती 21:13 8इना लोका खे देखो! ये तेरे नेड़े एड़े छोड़ आऊणे लगी रे जो बादल़ो जेड़े ओर आपणे कोलेया री तरफा खे उडदे ऊए कबूतरो जेड़े आऊणे लगी रे? 9जरूर द्वीपा रे लोका मेरी ई बाट देखणी पईले तो तर्शीश शईरो रे जाह्ज दूर देशो ते सूईने-चाँदिए समेत तुसा रे माठे बेटिया ल्याऊणे परमेशर यहोवा मतलब इस्राएलो रे पवित्र परमेशरो रे नाओं रिया खातर दूरा ते पऊँचाओ, कऊँकि तिने तूँ इज्जतदार करी राखेया। 10यहोवा यरूशलेमो रे लोका खे बोलोआ, “परदेशी लोका तुसा री दवाल चकणी ओर तिना रे राजेया तुसा री सेवा टईल करनी; कऊँकि मैं गुस्से दे आई की तुसा खे दु:ख दित्तेया था, पर एबे तुसा ते खुश ऊई की तुसा पाँदे दया करी राखी। 11तुसा रे शईरो रे बड़े द्वार सदा खुले दे रणे; सेयो रात-दिन कदी बी बन्द नि करे जाणे जेते कि जातिया-जातिया री तअन-सम्पत्ति ओर तिना रे राजा बन्दी ऊई की तुसा गे पऊँचाए जाओ।#60:11 प्रका. 21:24,26 12कऊँकि जेसा जातिया रे ओर राज रे लोक तुसा री सेवा नि करोगे सेयो नाश ऊई जाणे, आ एड़िया जातिया पूरी तरअ ते नाश ऊई जाणिया। 13लबानोनो रे जंगल़ो रा वैभव मतलब सनौबर ओर देवदार ओर चीला रे डाल़ एक साथे तांगे आऊणे ताकि मेरे मन्दरो खे सजाओ ओर मां आपणे पैरा री जगा खे महिमा देणी।” 14सेओ ई लोक जो पईले तुसा खे दु:ख देया करो थे तां सामणे सिर चुकाई की आऊणे ओर जिने तुसा री बेज्जती कित्ती, सबी तुसा रे पैरा पाँदे पड़ी की माथा टेकणा; तिना तुसा रा नाओं यहोवे रा शईर, इस्राएलो रे पवित्र परमेशरो रा सिय्योन राखणा। 15तुसे जो बेज्जत कित्ते ओर घृणित ठईरे, एथो तक कि कोई बी तुसा रे शईरो रे ऊई की नि जाओ था, इजी रे बदले मां तुसे सदा रे कमण्ड ओर पीढ़िया-पीढ़िया री खुशिया री बजा ठराणे। 16देशा ओर राजेया तेरी देखपाल़ करनी, ता राजेया रिया छातिया चुशणीया ओर तुसा खे पता लगी जाणा कि आऊँ यहोवा तुसा रा उद्धार करने वाल़ा ओर तेरा छुड़ाणे वाल़ा, याकूबो रा सर्वशक्‍तिमान परमेशर ए। 17मां पीतल़ी रे बदले सूईना, लोए रे बदले चाँदी, लकड़िया रे बदले पीतल़ ओर पात्थरो रे बदले लोआ ल्याऊणा। मां तुसा रे परदान मेल-मिलाप ओर तेरे सरदार धार्मिकता ठराणे। 18तुसा रे देशो रे फेर कदी उपद्रव ओर तुसा रे बन्ने रे पीतरे उत्पाद या अन्देरो री चर्चा नि सुणनी; पर तुसा आपणी दवाला रा नाओं उद्धार ओर आपणे शईरो रे बड़े द्वारा रा नाओं यश राखणा। 19तेबे दिने तुसा खे सूरजो प्रयासा नि देणा ओर ना राती चाँदो चाँदणी देणी, पर यहोवे तुसा खे सदा रा प्रयासा ओर तुसा रा परमेशर तुसा री शोभा ठईरना।#60:19 प्रका. 21:123, प्रका. 22:5 20तुसा रा सूरज फेर कदी नि डूबणा ओर ना तुसा रे चाँदो री चाँदणी काल़ी ऊणी; कऊँकि यहोवा तुसा री सदा री जोति ऊणी ओर तुसा रे दु:खो रे दिन खत्म ऊई जाणे। 21तुसा रे सारे के सारे लोक तर्मी ऊणे; सेयो सदा देशो रे अधिकारी रणे। सेयो मेरे लगाए रे पौधे ओर मेरे आथो रा काम ठईरने, जेते कि मेरी महिमा प्रगट ओ।#60:21 प्रका. 21:27, इफि. 2:10, 2 पत. 3:13 22छोटे ते छोटा 1,000 ऊई जाणा ओर सबी ते कमजोर एक सामर्थी जाति बणी जाणा। आऊँ यहोवा ए; जेबे ठीक बखत आऊणा, तेबे ये फटाफट पूरा करना।

Currently Selected:

यशायाह 60: BGH

Highlight

Copy

Compare