यशायाह 61

उद्धारो रा शुभ सन्देश

1भविष्यबक्ता यशायाह बोलोआ, “परमेशर यहोवे रा आत्मा मां पाँदे ए, कऊँकि यहोवे शुभ सन्देश सुनाणे खे मेरा अभिषेक कित्तेया ओर आऊँ इजी खे पेजी राखेया ताकि दु:खी मनो रे लोका खे शान्ति देऊँ ओर गुलामा खे आजादिया रा ओर कैदिया खे छुटकारे रा प्रचार करुँ।#61:1 मत्ती 11:5, प्रेरि. 10:38, मत्ती 5:3, प्रेरि. 26:18, लूक. 4:18 2ताकि यहोवे रे खुश रणे रे सालो रा ओर म्हारे परमेशरो रे बदला लणे रे दिनो रा प्रचार करुँ; ताकि सब दु:ख करने वाल़ेया खे शान्ति देऊँ।#61:2 लूक. 4:18,19, मत्ती 5:4 3ओर सिय्योनो रे दु:ख करने वाल़े लोका रे सिरो पाँदली दु:खो री स्वा दूर करी की सुन्दर पगड़ी बानूँ, ताकि तिना रा दु:ख दूर करी की खुशिया रा तेल लगाऊँ ओर तिना री उदासी दूर करी की यशो रा टखण टखाऊँ; जेते कि तिना खे तर्मो रे बाँजो रे डाल़ ओर यहोवे रे लगाए रे बोलेया जाओ ओर जेते कि तिना रा आदर प्रगट ओ।”#61:3 पज. 45:7; 30:11; लूक. 6:21 4तेस बखते यहूदा रे लोका सौ साल पईले बेबीलोनो रे लोका रे जरीये बर्बाद कित्ते दे शईर फेर बनाणे, पुराणे बखतो ते पड़े रे खण्डहरो रे फेर कअर बनाणे; उजड़े रे शईर जो पीढ़िया-पीढ़िया ते उजड़े रे सेओ फेर नये सिरे ते बसाणे। 5परदेशी आई की खड़े ऊणे ओर तुसा रिया पेडा-बाकरिया चराणिया ओर विदेशी लोका तुसा रे डोरूआ रे अल़ चलाणे ओर अंगूरा रे बगीचेया रे माली ऊणे; 6पर तुसा खे यहोवे रे पुरोईत बोलेया जाणा; तिना तुसा खे म्हारे परमेशरो रे सेवक बोलेया करना ओर तुसा जातिया-जातिया री तअन-सम्पत्ति खाया करनी, तिना री वैभवो रिया चीजा पाई की तुसा बडयाईया करेया करनिया।#61:6 1 पत. 2:5,9; प्रका. 1:6; प्रका. 5:10 7तुसा री बेज्जतिया रे बदले दो गुणा आशिर्वाद मिलणा, अनादरो रे बदले तुसा आपणे इस्से रिया बजा ते जयजयकार करनी; तुसे आपणे देशो रे दो गुणे इस्से रे अधिकारी ऊणे ओर सदा खुश रणे। 8यहोवा बोलोआ, “कऊँकि आऊँ यहोवा न्याय साथे प्यार राखूँआ, आऊँ अन्याय ओर चोरिया ते नफरत करूँआ; इजी री खातर मां आपणी सच्चाईया ते आपणे लोका खे वादा कित्तेया रा ईनाम देणा। 9तिना रा वंश जातिया-जातिया बीचे ओर तिना री ल्वाद देशो-देशो रे लोका बीचे मशूर ऊणी; हर कोई आदमी जितणेया सेयो देखणे, पछयाणी लणे कि ये से कराना ए जिना खे यहोवे आशीष देई राखी। 10आऊँ यहोवे रिया बजा ते बऊत खुश ऊणा, मेरे प्राण परमेशरो रिया बजा ते खुश रणे; कऊँकि यहोवे माखे उद्धारो रे टाल्ले पन्याए ओर तर्मो री चाद्दर एड़ी टखाई ती जेड़ा लाड़ा फूला री माल़ा साथे आपू खे सजाओआ ओर लाड़ी आपणे गईणेया साथे आपणा श्रृंगार करोई।#61:10 इब्रा. 3:18, रोम. 5:11, प्रका. 19:7-8 11कऊँकि जिंयाँ जमीन आपणी फसल जमाओई ओर बगीचे रे जो कुछ बाया जाओआ, से तिजी खे जमाओई, तिंयाँ ई परमेशर यहोवा सबी जातिया सामणे धार्मिकता ओर तन्यवाद बढ़ाणा।”

Currently Selected:

यशायाह 61: BGH

Highlight

Copy

Compare