निर्गमन 9
9
पाँजी मुसीबत–डांगरा री मौत
1तेबे यहोवे मूसे खे बोलेया, “फिरौनो गे जाई की बोल कि इस्राएलिया रा परमेशर यहोवा तुसा खे ईंयाँ बोलोआ कि मेरिया प्रजा रे माणूंआ खे जाणे दे, ताकि सेयो मेरी आराधना करो 2ओर जे तूँ तिना खे जाणे नि देगा ओर एबे बी पकड़ी की राखेगा 3तेबे तूँ सुण, तेरे जो कोड़े, गह्दे, ऊँट, गाय-बल़द, पेडा-बाकरिया बगैरा मैदानो रे ए, तिना पाँदे यहोवे रा आथ एड़ा पड़ना कि एक खतरनाक डांगरा री बमारी फैलणी। 4पर यहोवे इस्राएलिया रे डांगरा बीचे ओर मिस्रिया रे डांगरा बीचे एड़ा फर्क करना कि जो इस्राएलिया रे डांगर ए, तिना बीचा ते कोई पनि मरना।” 5फेर यहोवे ये बोली की एक बखत ठराया, “मां ये काम एते देशो रे काल करना।”
6दूजे दिने यहोवे एड़ा ई कित्तेया ओर मिस्री लोका रे तो सारे डांगर मरीगे, पर इस्राएलिया रा एक बी डांगर नि मरेया। 7ओर फिरौने लोक पेजी की पता लगाई ला था कि इस्राएलिया रे डांगरा बीचा ते एक पनि मरी रा था। तेबे बी फिरौनो रा मन काठा ऊईगा ओर तिने सेयो लोक जाणे नि दित्ते।
छठी मुसीबत–फल़फे ओर फोड़ेया रा निकल़ना
8तेबे यहोवे मूसा ओर हारूणो खे बोलेया, “तुसे दोनो पट्ठिया बीचा ते एक-एक मुट्ठी स्वाई री लई लो ओर मूसा तिजी खे फिरौनो सामणे सर्गो खे ऊड़ाई देओ। 9तेबे से छोटी-छोटी तूड़ ऊई की सारे मिस्र देशो रे माणूं ओर डांगर दुँईं रेया बदनो पाँदे फल़फे ओर फोड़े बणी जाणे।”
10इजी खे सेयो पट्ठिया री स्वा लई की फिरौनो सामणे खड़े ऊईगे ओर मूसे से सर्गो रिया तरफा खे उड़ाईती ओर से माणूं ओर डांगर दुँईं पाँदे फल़फे ओर फोड़े बणीगे। 11तिना फोड़ेया रिया बजअ ते जादूगर मूसे सामणे खड़े नि रयी सके, कऊँकि सेयो फोड़े जेड़े मिस्रिया रे तेड़े ई जादूगरा रे बी निकल़े थे। 12तेबे यहोवे फिरौनो रा मन काठा करी ता ओर जेड़ा यहोवे मूसे खे बोलेया था, तिने तेसरी नि सुणी।#9:12 रोमी 9:18
साती मुसीबत–ओल़ेया री बर्खा
13तेबे यहोवे मूसे खे बोलेया, “प्यागा उठी की फिरौनो रे सामणे खड़ा ऊई जा ओर तेसखे बोल, ‘इब्रिया रा परमेशर यहोवा ईंयाँ बोलोआ कि मेरी प्रजा रे लोका खे जाणे दे, ताकि सेयो मेरी आराधना करो। 14नई तो एबकी बार मां तां पाँदे, तेरे काम करने वाल़ेया पाँदे ओर तेरी प्रजा पाँदे सब प्रकारा रिया मुसीबता पाणिया, जेते की तां जाणी लणा कि सारी तरतिया पाँदे मां जेड़ा दूजा कोई निए। 15एबुए तक तो मां आपणा आथ बढ़ाई की तूँ ओर तेरी प्रजा महारिया साथे काई देणी थी ओर तूँ तरतिया पाँदा ते नाश ऊई जाणा था, 16पर मैं सच्ची तूँ इजी बजअ ते जिऊँदा राखेया ताकि आऊँ ताखे आपणी सामर्थ दखाऊँ जेते कि मेरे नाओं रा प्रचार सारी तरतिया रे ओ।#9:16 प्रकाशित 9:17 17क्या तूँ एबे बी मेरी प्रजा रे लोका सामणे आपणे आपू खे कमण्ड करी की बड़ा समजेया ओर तिना खे जाणे नि देंदा? 18इजी खे देख, काल मां एस ई बखते एड़े पारी-पारी ओल़े बरसाणे कि तिना जेड़े मिस्र देशो रे शुरूओ ते लई की एबुए तक कदी नि पड़े ओगे। 19इजी री खातर एबे लोका खे पेजी की आपणे डांगर ओर मैदानो रे जो कुछ तेरा ए सबी खे फुर्तिया रे लकोई दे, नई तो जितणे डांगर या माणूं मैदानो रे रणे ओर कअरे कट्ठे नि करो, तो तिना पाँदे ओल़े पड़ने ओर सेयो मरी जाणे।’ ” 20तेबे फिरौनो रे काम करने वाल़ेया बीचा ते जो लोक यहोवे रे वचनो रा डर मानो थे, तिने आपणे-आपणे नौकर ओर डांगर कअरे समाल़ी की राखी ते। 21पर जिने यहोवे रे वचन नि माने, तिने आपणे नौकर ओर डांगर मैदानो रेई रणी ते।
22तेबे यहोवे मूसे खे बोलेया, “आपणा आथ सर्गो रिया तरफा खे बढ़ा, ताकि सारे मिस्र देशो रे माणूं, डांगर ओर डोरूआ री सारी फसला पाँदे ओल़े पड़ो।” 23तेबे मूसे आपणी सोठी सर्गो रिया तरफा खे चकी ओर यहोवे रिया सामर्था साथे बादल़ गिड़ने लगे ओर ओल़े बरसणे लगे ओर आग तरतिया तक आऊँदी रयी। ईंयाँ यहोवे मिस्र देशो रे ओल़े बरसाए। 24जो ओल़े पड़ो थे तिना साथे आग बी ओरे-पोरे चमकणे लगी री थी ओर सेयो ओल़े इतणे खतरनाक थे कि जदुओ ते मिस्र देश बसेया था, तदुओ ते पूरे मिस्र प्रदेशो रे एड़े ओल़े कदी नि पड़े थे।#9:24 प्रकाशित 8:7, प्रकाशित 11:19 25तेबे पूरे मिस्र देशो रे डोरूआ रे, क्या माणूं, क्या डांगर, जितणे बी थे सब ओल़ेया साथे मरीगे ओर ओल़ेया साथे डोरूआ री सारी फसल खराब ऊईगी ओर मैदानो रे सारे डाल़ टूटी गे। 26पर गोशेन देशो रे जेती इस्राएली रओ थे ओल़े नि पड़े।
27तेबे फिरौने मूसा ओर हारूण बुलाए ओर तिना खे बोलेया, “एस बार मैं पाप करी राखेया, यहोवा तर्मी ए, आऊँ ओर मेरी प्रजा पापी ए। 28बादल़ा रा गिड़ना ओर ओल़ेया रा बरसणा बऊत ऊईगा, एबे परमेशरो ते बिनती करो, तेबे मां तुसे जाणे देणे ओर आगो खे तुसे मां नि रोकणे।” 29मूसे फिरौनो खे बोलेया, “शईरो ते निकल़ी की मां यहोवे री तरफा खे आथ फैलाणे तेबे बादल़ा रा गिड़ना बन्द ऊई जाणा ओर ओल़े फेर नि पड़ने। इजी ते तां जाणी लणा कि तरती यहोवे री ए। 30तेबे बी आऊँ जाणूंआ कि ना तो तां ओर ना तेरे काम करने वाल़ेया यहोवा, परमेशरो रा डर मानणा।”
31अल़सी ओर जौ तो ओल़ेया साथे खत्म ऊईगे, कऊँकि जौ रे सिल्ले निकल़ी गे थे ओर अल़सिया रे फूल लगी रे थे। 32पर कणक ओर लाल रंगो री कणक जो बढ़ी नि रये थे, इजी बजअ ते सेयो खत्म नि ऊए।
33जेबे मूसे फिरौनो गे ते शईरो ते बारे निकल़ी की यहोवे रिया तरफा खे आथ फैलाए, तेबे बादल़ा रा गिड़ना ओर ओल़ेया रा बरसणा बन्द ऊईगा ओर तेबे तरतिया पाँदे बर्खा बी बन्द ऊईगी। 34जेबे फिरौने ये देखेया कि बर्खा, ओल़े ओर बादल़ा रा गिड़ना बन्द ऊईगा तेबे तिने ओर तेसरे काम करने वाल़ेया फेर आपणा मन काठा करी की पाप कित्तेया। 35ईंयाँ फिरौनो रा मन टीठ ऊँदा गया ओर तिने इस्राएली जाणे नि दित्ते, जेड़ा कि यहोवे मूसे रे जरीये बुलवाया था।
Currently Selected:
निर्गमन 9: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
