निर्गमन 10
10
आठी मुसीबत–टिड्डिया रा अमला
1फेर जिंयाँ ई ओल़े बरसणे बन्द ऊईगे तेबे यहोवे मूसे खे बोलेया, “फिरौनो गे जा, कऊँकि मैं ई तेसरा ओर तेसरे काम करने वाले़या रा मन इजी री खातर काठा करी राखेया ताकि आपणे नऊखे-नऊखे चिह्न तिना बीचे दखाऊँ 2ओर तुसे लोक आपणे माठेया ओर पोतेया गे इजी रे बारे दे बताओ कि मैं यहोवे मिस्रिया साथे कोई प्यार नि दखाया ओर आपणे क्या-क्या नऊखे चिह्न तिना बीचे कित्ते, जेते साथे तुसा ये जाणी लणा कि आऊँ ई यहोवा ए।” 3तेबे मूसे ओर हारूणे फिरौनो गे जाई की ये बोलेया, “इस्राएलिया रा परमेशर यहोवा ताखे ईंयाँ बोलोआ कि तां कदुओ तक मेरी गल्ल मानणे ते ना करनी? मेरी प्रजा रे लोका खे जाणे दे, ताकि सेयो मेरी आराधना करो। 4जे तूँ मेरी प्रजा खे जाणे नि देगा तो देख, काल मां तेरे देशो रे टिड्डिया ली आऊणियां। 5सेयो तरतिया पाँदे इतणियां आई जाणिया कि तिने की तरती नि दिशणी ओर तुसा रा जो कुछ ओल़ेया साथे बची गा रा, से तिना खाई जाणा ओर तुसा रे जितणे डाल़ मैदानो रे लगी रे ओर डोरूआ रे जो कुछ ऊगी रा से सब बी तिना खाई देणा। 6सेयो तेरे ओर तेरे सारे काम करने वाल़ेया रे ओर एथो तक कि सारे मिस्रिया रे कअरा रे परी जाणिया; इतणियां टिड्डिया तेरे बाओ-दादेया ओर तिना रे बुजुर्गे जदुओ ते तरतिया पाँदे जम्मे तदुओ ते आजो तक कदी नि देखिया ऊगिया।” ये गल्ल बोली की से मूँ फेरी की फिरौनो रे सामणे ते बारे निकल़ी गा 7तेबे फिरौनो रे काम करने वाल़े तेसखे बोलणे लगे, “से माणूं कदुओ तक आसा खे फन्दा बणेया रा रणा? तिना माणूंआ खे जाणे दे, ताकि सेयो आपणे परमेशर यहोवे री आराधना करो, क्या ताखे एबुए तक पता नि लगेया कि सारा मिस्र नाश ऊईगा रा?” 8तेबे मूसा ओर हारूण फिरौनो गे फेर बुलाए ओर फिरौने तिना खे बोलेया, “चली जाओ, आपणे परमेशर यहोवे री आराधना करो, पर जो जाणे वाल़े ए, सेयो कुण-कुण ए?” 9तेबे मूसे बोलेया, “आसे तो माठे-बेटिया, पेडा बाकरिया, गाय-बल़द, बल्कि बच्चेया ते लई की स्याणेया तक सब जाणे, कऊँकि आसा यहोवे खे त्योआर मनाणा।” 10फिरौने तिना खे ईंयाँ बोलेया, “यहोवा तुसा साथे रओ जबकि आऊँ तुसा खे बच्चेया समेत जाणे देणे लगी रा, देखो, तुसा रे मनो रे बुराई ए। 11कदी, एड़ा नि ऊई सकदा, तुसे मर्द ई जाई की यहोवे री आराधना करो, तुसे येई तो चाओ थे।” तेबे फिरौने मूसा ओर हारूण आपणे सामणे ते निकयाल़ी ते। 12तेबे यहोवे मूसे खे बोलेया, “मिस्र देशो पाँदे आपणा आथ बढ़ा ताकि टिड्डिया मिस्र देशो रे चढ़ी की जमीना पाँदे जितणा नज्ज बगैरा ओल़ेया ते बची गा रा सब खाई जाओ।” 13तेबे मूसे आपणी सोठी लई की मिस्र देशो पाँदे ऊबे चकी, तेबे यहोवे पूरा दिन ओर पूरी रात देशो रे पूर्वो री तरफा ते अवा चलाई ओर प्याग ऊणे तक तेते अवा साथे टिड्डिया आईया। 14ओर टिड्डिये अमला करी की मिस्र देशो रे सारी जगा रे बसेरा करी ता, तिना रा चूण्ड बड़ा पारी था, बल्कि ना तो तिना ते पईले इतणिया टिड्डिया आईया थिया ओर ना ई तिना ते बाद इतणिया आऊणियां। 15सेयो तो पूरी तरतिया पाँदे फैली गिया, एथो तक कि देशो रे न्हेरा ऊईगा ओर तिना रा पूरा नज्ज बगैरा ओर डाल़ा रे सारे फल, मतलब जो कुछ ओल़ेया ते बची रा था, सब तिने खाई ला। एथो तक कि पूरे मिस्र देशो रे ना तो केसी डाल़ो रे कोई अरयाली रयी ओर ना ई डोरूआ रे नज्ज रया। 16तेबे फिरौने फटाफट मूसा ओर हारूण बुलाए ओर तिना खे बोलेया, “मैं तो तुसा रे परमेशर यहोवे रा ओर तुसा रा बी पाप करी राखेया। 17इजी री खातर एस बार मेरा ये पाप माफ करो ओर आपणे परमेशर यहोवे ते बिनती करो कि से बस मां पाँदा ते एसा मौता री सजा खे दूर करो।” 18तेबे मूसे फिरौनो गे ते निकल़ी की यहोवे ते बिनती कित्ती। 19तेबे यहोवे बऊत तेज पच्छमा री तरफा ते अवा चलाई की टिड्डिया ऊड़ाई की लाल समुद्रो रे सेटी तिया ओर मिस्रो रे केसी बी जगा रे एक बी टिड्डी नि बची। 20पर यहोवे फिरौनो रा मन काठा करी ता, जेते की तिने इस्राएली जाणे नि दित्ते।
नवीं मुसीबत–न्हेरा
21फेर यहोवे मूसे खे बोलेया, “आपणा आथ सर्गो रिया तरफा खे बढ़ा ताकि मिस्र देशो पाँदे न्हेरा छाई जाओ, एड़ा न्हेरा कि लोक तोपणे लगो।”
22तेबे मूसे आपणा आथ सर्गो रिया तरफा खे बढ़ाया ओर सारे मिस्र देशो रे तिंऊँ दिना तक अन्दकूप न्हेरा रया। 23मिस्री लोके तिंऊँ दिना तक ना तो कोई देखेया ओर ना कोई आपणी जगा ते उठेया; पर सारे इस्राएलिया रे कअरे प्रयासा रया।
24तेबे फिरौने मूसे खे बुलाई की बोलेया, “तुसे लोक जाओ; यहोवे री आराधना करो; आपणी जवाणसा ओर बाल-बच्चेया खे बी साथे लई जाओ, बस आपणियां पेडा-बाकरिया ओर गायी बल़दा खे छाडी जाओ।”
25मूसे बोलेया, “ना! ताखे आसा खे मेलबलिया खे ओर होमबलिया खे डांगर बी देणे पड़ने, जिना खे आसे आपणे परमेशर यहोवे खे चढ़ाऊँ। 26इजी री खातर म्हारे डांगर बी आसा साथे जाणे, तिना रा एक खुर तक नि रणा, कऊँकि तिना बीचा तेई आसा खे आपणे परमेशर यहोवे री उपासना रा समान लणा पड़ना ओर आसे जदुओ तक तेती नि पऊँचो, तदुओ तक नि जाणदे कि क्या-क्या लई की यहोवे री आराधना करनी पड़नी।”
27पर यहोवे फिरौनो रा मन टीठ करी ता, जेते की तिने सेयो जाणे नि दित्ते।
28तेबे फिरौने मूसे खे बोलेया, “तूँ मेरे सामणे ते चली जा ओर चौकस रओ, माखे आपणा मूँ फेर कदी नि दखाणा; कऊँकि जेस दिने तां आपणा मूँ माखे दखाणा, तेस ई दिने तूँ मारेया जाणा।”
29मूसे बोलेया, “तैं ठीक बोलेया; मां तेरा मूँ फेर कदी नि देखणा।”
Currently Selected:
निर्गमन 10: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
