निर्गमन 8
8
दूजी मुसीबत–मिनकेया रा अमला
1तेबे यहोवे फेर मूसे खे बोलेया, “फिरौनो गे जाई की बोल कि यहोवा तुसा खे ईंयाँ बोलोआ कि मेरिया प्रजा रे माणूंआ खे जाणे देओ, ताकि सेयो मेरी आराधना करो। 2पर जे तूँ तिना खे जाणे नि देओगा तो देख, आऊँ मिनकेया पेजी की तेरे सारे देशो खे नुकशाण पऊँचाणे वाल़ा ए। 3ओर नील नदी मिनकेया साथे परी जाणी ओर सेयो तेरे भवनो रे ओर तेरे कमरे ओर माँजे पाँदे ओर काम करने वाल़ेया रे कअरे ओर तेरिया प्रजा पाँदे बल्कि तेरे तन्दूर ओर तेरे रोटी बनाणे रे पांडेया रे बी चढ़ी जाणे। 4ओर तां पाँदे, तेरिया प्रजा, ओर तेरे काम करने वाल़ेया ओर सबी पाँदे मिनके चढ़ी जाणे।”
5फेर यहोवे मूसे खे आज्ञा दित्ती, “हारूणो खे बोली दे कि नदिया, नईरा, ओर झीला पाँदे सोठिया साथे आपणा आथ बढ़ाई की मिनकेया खे मिस्रो प्रदेशो रे पेजी दे।” 6तेबे हारूणे मिस्रो रे पाणिए पाँदे आपणा आथ बढ़ाया ओर पूरा मिस्र देश मिनकेया साथे परी गा। 7ओर जादूगरे बी आपणे तंत्र-मंत्रो ते तिंयाँ ई मिस्र देशो पाँदे मिनके पेजी ते। 8तेबे फिरौने मूसे ओर हारूणो खे बुलाई की बोलेया, “यहोवे ते प्रार्थना करो कि तिना मिनकेया खे मांते ओर मेरिया प्रजा रे लोका ते दूर लई जाओ ओर मां इस्राएलिया रे माणूं जाणे देणे ताकि सेयो यहोवे खे बलिदान करो।”
9तेबे मूसे फिरौनो खे बोलेया, “इतणिया गल्ला खे तूँ माखे आज्ञा दे कि एबे आऊँ ताखे ओर तेरे काम करने वाल़ेया, ओर प्रजा रिया तँईं कदी प्रार्थना करुँ ताकि यहोवा तांगा ते ओर तेरे कअरो ते मिनके दूर करो ओर सेयो बस नील नदिया रेई रओ।” 10तेबे फिरौने बोलेया, “काल।” तो मूसे बोलेया, “तेरे वचनो रे मुताबिक ऊणा, जेते कि ताखे ये पता लगी जाओ कि म्हारे परमेशर यहोवे जेड़ा कोई दूजा परमेशर अया ई नि। 11ओर मिनके तांगा ते, तेरे कअरो ते, तेरे काम करने वाल़ेया गे ते ओर तेरी प्रजा ते दूर ऊई की बस नील नदिया रे रणे।”
12इजी ते बाद मूसा ओर हारूण फिरौनो गे ते निकल़ी गे ओर मूसे तिना मिनकेया रे बारे दे यहोवे ते प्रार्थना कित्ती, जो तिने फिरौनो पाँदे पेजे थे। 13ओर यहोवे मूसे रे कईणे रे मुताबिक कित्तेया ओर मिनके तिना रे कअर, आँगण ओर डोरूआ रे मरीगे। 14ओर लोके कट्ठे करी की तिना रे टेर लगाई ते ओर सारा देश सड़यानी साथे परी गा। 15पर जेबे फिरौने देखेया कि एबे मुसीबत टल़ीगी री, तेबे यहोवे रे कईणे रे मुताबिक फेर तिने आपणा मन काठा करी ता ओर मूसा ओर हारूणो री नि सुणी।
तीजी मुसीबत–पऊँरी रे चूण्ड
16फेर यहोवे मूसे खे बोलेया, “हारूणो खे आज्ञा दे कि तूँ आपणी सोठी बढ़ाई की तरतिया री तूड़ा पाँदे बा, जेते कि से तूड़ सारे मिस्र देशो रे पऊँरो बणी जाओ।” 17तेबे तिने तेड़ा ई कित्तेया; मतलब हारूणे सोठी आथो रे लई की बढ़ाई ओर जमीना री तूड़ा पाँदे बाई, तेबे माणूं ओर डांगरा दुँईं पाँदे पऊँरो ऊईगिया, बल्कि सारे मिस्र देशो रे जमीना री तूड़ पऊँरो बणीगी। 18तेबे जादूगरे चाया कि आपणे तंत्रो-मंत्रो रिया तागती पाँदे पऊँरो लई आऊँए, पर तिना ते ये ऊई नि सकेया ओर माणूं ओर डांगर दुँईं पाँदे पऊँरो बणी री रईया।
19तेबे जादूगरे फिरौनो खे बोलेया, “ये तो परमेशरो रे आथो रा काम ए।” तेबे बी यहोवे रे कईणे रे मुताबिक फिरौनो रा मन काठा ऊँदा गया ओर तिने मूसे ओर हारूणो री गल्ल नि मानी।
चौथी मुसीबत–माखा रा चूण्ड
20फेर यहोवे मूसे खे बोलेया, “प्यागा उठी की फिरौनो सामणे खड़े ऊणा, से तो नदिया रिया तरफा खे आऊणा ओर तेसखे बोलणा कि यहोवा ताखे ईंयाँ बोलोआ कि मेरी प्रजा रे लोका खे जाणे दे, ताकि सेयो मेरी आराधना करो। 21जे तैं मेरी प्रजा रे लोक जाणे नि दित्ते तो देख, मां तां पाँदे, तेरे काम करने वाल़ेया पाँदे, तेरी प्रजा पाँदे ओर तेरे कअरे चूण्डा रे चूण्ड़ माखा रे पेजणे ओर मिस्रिया रे कअर ओर जमीन बी माखा साथे परी जाणी। 22तेस दिने मां गोशेन प्रदेश जिदे मेरे लोक रओए, लग करने ओर तिदे माखा रे चूण्ड नि ऊणे, जेते कि तूँ जाणी लओ कि तरतिया पाँदे आऊँ ई यहोवा ए। 23ओर मां आपणी प्रजा रे लोका ओर तेरी प्रजा रे लोका बीचे फर्क ठराणा। ये चिह्न काल ऊणा।”
24ओर यहोवे तेड़ा ई कित्तेया जेड़ा मूसे फिरौनो ते बोलेया था कि फिरौनो रे भवन, तेसरे काम करने वाल़ेया रे कअरो रे ओर सारे मिस्र देशो रे माखा रे चूण्डा रे चूण्ड परी गे ओर तिने की सारा देश नाश ऊईगा। 25तेबे फिरौने मूसा ओर हारूणो खे बुलाई की बोलेया, “तुसे जाई की आपणे परमेशरो खे एस ई देशो रे बलिदान करो।”
26पर मूसे बोलेया, “एड़ा करना ठीक निए, कऊँकि आसे जो आपणे परमेशर यहोवे खे बलिदान चढ़ाऊँए, तिना डांगरा रे बलिदानो ते मिस्री लोक कृणा करोए ओर जे आसे तिना सामणे तिना रिया नफरता वाल़िया चीजा बलिदान करूँगे, तो क्या तिना आसा खे पात्थर नि बाणे? 27आसा सुनसाण जगा रे तिंऊँ दिना रे सफरो रे जाई की आपणे परमेशर यहोवे खे जेड़ा से आसा खे बोलोगा, तेड़ा ई बलिदान करना।”
28फिरौने बोलेया, “मां तुसे सुनसाण जगा रे जाणे देणे ताकि तुसे आपणे परमेशर यहोवे खे बलिदान करो, बस बऊत दूर नि जाणा ओर एबे माखे बिनती करो।” 29तेबे मूसे बोलेया, “देख, मां एथा ते बारे जाई की यहोवे ते बिनती करनी कि माखा रे चूण्ड तेरे ओर तेरे काम करने वाल़ेया ओर तेरी प्रजा रे लोका गे ते काल ई दूर ऊई जाओ; पर फिरौन आगो खे कपट करी की आसा खे यहोवे रिया तँईं बलिदान करने खे जाणे खे ना नि करो।”
30इजी खे मूसे मिस्रो रे राजा फिरौनो गे ते बारे जाई की यहोवे ते बिनती कित्ती। 31ओर यहोवे मूसे री बिनतिया रे मुताबिक माखा रे चूण्ड फिरौन, तेसरे काम करने वाल़ेया ओर तेसरी प्रजा रे लोका गे ते एड़े दूर करीते, एथो तक कि तेती एक पनि रया। 32पर फिरौने एस बार बी आपणा मन काठा कित्तेया ओर सेयो लोक जाणे नि दित्ते।
Currently Selected:
निर्गमन 8: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
