निर्गमन 11
11
जेठे बच्चेया री मौता री चेतावणी
1फेर यहोवे मूसे खे बोलेया, “एक आखरी मुसीबत मां फिरौन ओर मिस्र देशो पाँदे पाणी; तिजी ते बाद तेस तुसे एथा ते जाणे देणे ओर जेबे तेस जाणे देणे, तेबे तेस तुसे सब पक्का निकयाल़ी देणे। 2मेरी प्रजा खे मेरी ये आज्ञा सुणा कि एक-एक मर्द आपणे पड़ोसी ओर एक-एक जवाणस आपणियां पड़ोसणी ते सूईने चाँदिए रे गईणे मांगी लो।” 3यहोवे मिस्री लोका ते आपणी प्रजा रे लोका ते आदर दलाया ओर इजी ते जादा से मर्द मूसा मिस्र देशो रे फिरौनो रे काम करने वाले़या बीचे ओर आम माणूंआ री नजरा रे बऊत महान् था।
4तेबे मूसे बोलेया, “यहोवा ईंयाँ बोलोआ कि आदिया राती रे करीब मां मिस्र देशो बीचे चलणा। 5तेबे मिस्रो री राजगद्दिया पाँदे बैठणे वाल़े फिरौनो ते लई की चाक्की पीसणे वाल़ी दासिया तको रे हरेक परिवारो रे जेठे बच्चे; बल्कि डांगरा रे बी पईले बच्चे मरी जाणे। 6तेबे सारे मिस्र देशो रे बऊत ई जोरो ते रोणा सुणना, एथो तक कि तेड़ा ना कदी ऊआ ओर ना फेर ऊणा। 7पर इस्राएलिया रे खलाफ, क्या माणूं, क्या डांगर, केसी पाँदे बी कोई कुत्ता नि पूकणा#11:7 कुत्ता नि पूकणा मतलब अचाणक कोई मुसीबत नि आऊणी, जेते की तुसा जाणी लणा कि मिस्री ओर इस्राएलिया बीचे यहोवा फर्क करोआ। 8तेबे तेरे सब काम करने वाल़ेया मांगे आयी की मांगे माथा टेकी की माखे ये बोलणा, ‘मईरबानी करी की आपणे सबी लोका समेत निकल़ी जा।’ तिजी ते बाद मां निकल़ी जाणा।” ये बोली की मूसा बड़े गुस्से रे ऊई की फिरौनो गे ते निकल़ी गा।
9यहोवे मूसे खे बोली ता था कि फिरौनो तुसा री नि सुणनी, कऊँकि मेरी इच्छा ए कि मिस्र देशो रे बऊत सारे अचम्बे रे काम करुँ।
10मूसे ओर हारूणे फिरौनो सामणे यो सब अचम्बे रे काम कित्ते; पर यहोवे फिरौनो रा मन ओर काठा करी ता, तेबेई तो तिने इस्राएली आपणे देशो ते जाणे नि दित्ते।
Currently Selected:
निर्गमन 11: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
