स्याणेया रा ज्ञान 8

1अक्लमंद माणूंए खे ई एते गल्ला रे बारे दे पता ओआ कि केत्ते गल्ला रा सई मतलब ऊणा चाईयो। बुद्धि तिना रिया सकला खे चमकाओ ई ओर नराजगिया खे दूर करोई।

राजे री आज्ञा खे मानो

2जेड़ा राजा बोलोआ: तेड़ा ई करना, ना जल्दबाजिया दे परमेशरो ते कोई कसम खाणी।

3राजे खे ना करने खे जल्दबाजी नि करनी। ओर तिना लोका साथे नि मिलणा जो तेसरे खलाफ बिद्रोह करना चाओए, कऊँकि से जो कुछ करना चाओआ, से तेड़ा ई करोआ।

4कऊँकि राजे रिया गल्ला रे तागत ओई ओर तेसखे कोई नि बोली सकदा कि तूँ क्या करने लगी रा?

5जे राजे री आज्ञा खे मानोगे तो तुसे मुसीबता दे नि पड़ने, इजी री खातर उशयार रओ ओर ये जाणो कि क्या करना ए ओर कदी करना ए।

6जबकि लोका खे कईया परेशानिया रा अनुभव ओआ, चीजा खे करने रा सई बखत ओर सई तरीका ओआ।

7आऊणे वाल़ेया दिना दे क्या ऊणे वाल़ा ए तेतेरे बारे दे कोई नि बताई सकदा?

8कोई बी माणूं मौता ते नि बची सकदा, ये एक एड़ा युद्ध ए जेसखे कोई तोखा देई कि बची नि सकदा।

9जितणे काम तरतिया पाँदे कित्ते जाओए, तिना सबी खे त्यानो ते देखणे दे मैं ये सब कुछ देखेया ओर ये बी देखेया कि एक माणूं दूजे माणूंए पाँदे अधिकारी ऊई की आपू पाँदे नुकशाण ल्याओआ।

पापी ओर तर्मी

10मैं ये बी देखेया कि कई बार बुरेया माणूंआ रे मरने ते बाद, सेयो तिना शईरा दे लोका रे जरिये तिना रे आखरी संस्कारो दे बड़ा पारी आदर पाओए जेती तिने बुरे काम करी राखे थे। एड़ा लगो था कि एड़ा कऊँ ओआ। ये सब बेकार ए।

11बुरे काम करने वाल़ेया खे सजा री आज्ञा फटाफट नि देंदे; इजी बजा ते माणूंआ रा मन बुरे काम करने रिया इच्छा ते परेया रा रओआ।

12चाए पापी माणूं सौ बार पाप करी की आपणी उम्र बी बढ़ाओ, तेबे बी माखे निश्चा ए कि जो परमेशरो ते डरोए ओर तेसखे आपू सामणे जाणी की तेसरी इच्छा ते चलोए, तिना रा पला ई ऊणा।

13पर दुष्ट माणूंए रा पला नि ऊई सकदा ओर ना तेसरी उम्र बढ़ी सकदी, कऊँकि से परमेशरो ना डर नि मानदा।

14एक ओर बेकार गल्ल तरतिया पाँदे ओई, मतलब एड़े तर्मी ए जिना री तेड़ी दशा ओई जेड़ी दुष्टो री ऊणी चाईयो ओर एड़े दुष्ट ए जिना री एड़ी दशा ओई, जो तर्मिया री ऊणी चाईयो। आऊँ तो बोलूँआ कि ये बी बेकार ई ए।

15इजी री खातर माखे पक्का पता ए कि आसा खे मजा करना चाईयो, कऊँकि एते दुनिया दे माणूंआ खे खाणे-पीणे ओर मजा करने ते अलावा कुछ बी ठीक नि ए। आसे कम से कम ये तो करी ई सकूँए जेबे आसे एते जीवनो दे मईणत करूँए जो परमेशरे आसा खे देई राखेया ए।

16जेबे मैं बुद्धि लणे ओर सारे काम देखणे खे जो तरतिया पाँदे करोए, आपणा मन लगाया कि माणूं किंयाँ दिन-रात जागदे रओए;

17तेबे मैं परमेशरो रा सारा काम देखेया, जो तरतिया पाँदे कित्तेया जाओआ, तिजी री गईराई माणूं नि पाई सकदा। चाए माणूं तिजी री टोल़ा रे कितणी बी मईणत करो तेबे बी तेसखे नि जाणी सकदा; ओर अक्लमंद बोलो बी कि मां से समजणा, तेबे बी से तिजी खे जाणी नि सकदा।

Currently Selected:

स्याणेया रा ज्ञान 8: BGH

Highlight

Copy

Compare