स्याणेया रा ज्ञान 7

लोका खे क्या अच्छा ए

1जाणे-मानेया रा नाओं कीमती इत्रो ते खरा ए, ओर जम्मणे रे दिनो ते खरा ए मरने रा दिन।

2जेते कअरो दे त्यार ऊणे लगी रा तिदे जाणे ते खरा ए तेते कअरो दे जाणा जेते कअरो दे मरने रा शोक चली रा, कऊँकि सबी माणूंआ रा अन्त येई ए ओर जो जिऊँदा ए तेस इजी रे बारे मन लगाई की सोचणा।

3आसणे ते खरा ए दु:खी रणा, आसे बऊत गल्ला आपणे जीवनो रे बारे दे सीखूँए जेबे आसे दु:खी ऊँए।

4एक अक्लमंद माणूं मरने रे बारे दे सोचोआ। पर एक मूर्ख माणूं ये सोचोआ कि किंयाँ आपणे जीवनो दे मजा करी सकूँए।

5मूर्खो रे गाणे सुणने ते अक्लमंदो रा थिड़कणा सुणना खरा ए।

6कऊँकि मूर्खो री आस्सी आँडिया निठे आगी दे बल़दे ऊए कांडेया री चड़चड़ाहटा जेड़ी ओई, ये बी बेकार ए।

7अक्लमंद माणूं बी अन्देरो रिया बजा ते पक्का पागल ऊई जाओआ ओर रिश्वत बुद्धिया खे बी नाश करी देओई।

8केसी कामो री शुरूआता ते तिजी रा अन्त देखणा मनो खे खरा लगोआ ओर सब्रखोर माणूं कमण्डी माणूंए ते खरा ए।

9जल्दबाजिया रे रोष नि करो, मूर्ख एड़ा ई करोए। तिना बुरेया कामा खे पूलणे री कोशिश करो जो लोके तुसा साथे करी राखे।#7:9 याकूब 1:19

10ये नि बोलणा कि आजो रे दिनो ते बितेया रा दिन ठीक था, कऊँकि एड़ा बोलणा अक्ला री गल्ल नि ऊँदी।

11बुद्धि बाओ रिया जायदाता ते अच्छी ओई, बल्कि जिऊँदे रणे वाल़ेया खे बऊत फायदेमंद ए। 12बुद्धिया पैसेया जेड़ी तुसा री रक्षा करनी; ज्ञानो साथे समजा तुसे आपणे जीवनो रिया तरफा खे लई जाणे।

13परमेशरे रे कामो खे देख, जो चीज तिने टेडी बणाई राखी, तिजी खे कोई बी सीदा नि करी सकदा। 14सुखो रे दिना दे मजे करो ओर जेबे दु:ख आओ; तेस बखते से गल्ल याद राखणी कि परमेशर ई सुख ओर दु:खो रा कारण ए, ओर माणूंआ खे कदी बी पता नि चलणा कि आगे क्या ऊणे वाल़ा ए।

15आपणियां बेकार जिन्दगिया रे मैं ये सब कुछ ऊँदे ऊए देखी राखेया, कि कोई तार्मिक माणूं आपणे तार्मिकता रे काम करदे ऊए नाश ऊई जाओआ ओर बुरा माणूं बुरे काम करोआ तेबे बी तेसरी उम्र बढ़दी जाओई। 16इजी री खातर ये नि सोचो कि तुसे बऊत तर्मी ए ओर ये बी नि सोचो कि तुसे बऊत समजदार ए, कऊँकि जे तुसे तिना चीजा खे सोचोए, तो तुसे आपू खे नाश करोए। 17ना तो जादा दुष्ट बण ओर ना ई मूर्ख बण, नई तो तूँ आपणे बखतो ते पईले ई मरी जाणा। 18लगातार बुराई करने ओर मूर्ख बणने ते बचो; परमेशरो रा सदा आदर करी की तिना दूई चीजा खे करने ते बचो।

19एक अक्लमंद माणूं शईरो रे दसा परदाना ते जादा तागतबर ओआ।

20तरतिया पाँदे पक्का कोई एड़ा तर्मी माणूं नि ए जो बस पलाई ई करो ओर जेसते कोई बी पाप नि ऊई रा ओ।#7:20 रोमी 3:10

21जितणिया गल्ला बोलिया जाओईया तिना सबी पाँदे त्यान नि देणा, एड़ा नि ओ कि तूँ सुणे कि तेसरा दास ताखे ई स्राप देयोआ। 22कऊँकि तूँ आपू जाणेया कि तैं बी कई बार ओरी खे स्राप देई राखेया।

23मैं आपणे आपू ते बोलेया, “आऊँ उशयार ऊई जाणा ओर इना सबी गल्ला खे समजणे री कोशिश करनी,” पर ये माखे बऊत कठण था। 24बुद्धि मांते बऊत दूर लगोई; कोई नि ए जो सच्चो खे ई सब कुछ समजी सकोआ। 25इजी री खातर मैं जितणा ऊई सको से सब सिखणे रा फैंसला कित्तेया ताकि आऊँ बुद्धिमान ऊई की जीवनो रे बारे दे सब कुछ समजी सकूँ। ओर ये बी समजणा चाऊँ था कि मूर्ख बणना बेवकुफी कऊँ ए,

26ओर मैं मौता ते बी जादा एक दु:ख देणे वाल़ी चीज देखी, मतलब से जवाणस जेसा रा मन फन्दा ओर जाल़ ए ओर जेसा रे आथ अथकड़िया ए जेस माणूंए ते परमेशर खुश ए सेई तेसा ते बचणा, पर पापी माणूं तेसा रा शिकार ऊणा। 27ये सेई आ जो मैं सिखी राखेया ए; मैं चीजा रे बारे दे जादा ते जादा जाणने री कोशिश कित्ती ताकि सबी किजी री बजा जाणने री कोशिश करी सकी ए, 28ओर आऊँ जादा जाणने री कोशिश करदा रया, पर आऊँ सबी खे टोल़णे लगी रा था नई मिलेया। पर एक गल्ल जो माखे पता चली से ये थी कि एक ह्जार लोका दे माखे एक तर्मी माणूं मिलेया, पर माखे एक बी तर्मी जवाणस नि मिली। 29पर मैं एक गल्ल सीखी; जेबे परमेशरे लोका खे बणाया, तो सेयो तर्मी थे, पर तिने बुरे काम करने रे कई तरीके टोल़े।

Currently Selected:

स्याणेया रा ज्ञान 7: BGH

Highlight

Copy

Compare