बिधान 2
2
इस्राएलिया रा सुनसाण जगा रे पटकणा
1मूसे इस्राएलिया खे बोलेया यहोवे री तेसा आज्ञा रे मुताबिक जो तिने माखे दित्ती थी, आसे कूमी की चले ओर लाल समुद्रो रिया बाटा रिये सुनसाण जगा रिया तरफा खे चले ओर कई दिना तक सेईर पाह्ड़ो रे चऊँ कनारे कूमदे रये।
2तेबे यहोवे माखे बोलेया, 3“तुसा लोका खे एते पाह्ड़ो रे चऊँ कनारे कुमदे-कुमदे कई दिन बीतीगे, एबे कूमी की उत्तर दिशा रिया तरफा खे चलो 4ओर तूँ प्रजा रे लोका खे मेरी ये आज्ञा सुणा कि तुसे सेईरो रे रणे वाल़े आपणे पाई एसाव वंशिया रे बन्ने रे ऊई की जाणे वाल़े ए ओर सेयो तुसा ते डरी की पड़की जाणे। इजी री खातर तुसे बऊत चौकस रओ। 5तिना साथे लड़ाई नि करनी; कऊँकि तिना रे प्रदेशो बीचा ते मां तुसा खे पैर राखणे जोगी जगा तक नि देणी, कऊँकि मैं सेईर पाह्ड़ एसाविया रे अक्को रे करिता रा।#2:5 प्रेरित 7:5 6तुसे तिना ते रोटी मोले लई की खाई सकोए ओर पैसा देई की कुएँ ते पाणी पी सकोए। 7कऊँकि तुसा रा परमेशर यहोवा तुसा रे आथो रे सबी कामो रे बारे दे तुसा खे आशीष देंदा आई रा; इतणी बड़ी सुनसाण जगा दे तुसा रा चलणा-फिरना से जाणोआ; इना चाल़ी साला रे तुसा रा परमेशर यहोवा तुसा साथे-साथे रया ओर तुसा खे केसी बी चीजा री कमी नि ऊई।”
8ईंयाँ आसे सेईरो रे रणे वाल़े ओर आपणे पाई एसाव वंशिया गे ऊई की, अराबा रिया बाटा रे ओर एलत ओर एस्योनगेबेर शईरो खे पीछे छाडी की चले। तेबे आसे मुड़ी की मोआबो री सुनसाण जगा रिया बाटा रे ऊई की चले।
9तेबे यहोवे माखे बोलेया, “मोआबो रे लोक नि सताणे ओर ना ई युद्ध करना; कऊँकि मां तिना री जगा ते कुछ बी तुसा रे अक्को रे नि करना, कऊँकि मैं आर लूतो रे वंशो रे आथो रे करी राखेया।”
10इना ते पईले तेती एमी लोक बसी रे थे, जो अनाक वंशिया जेड़े तागतबर ओर लाम्बे-लाम्बे ओर गिणतिया रे बऊत जादा थे 11ओर अनाक वंशिया जेड़े सेयो बी रपाई गिणे जाओ थे, पर मोआबी लोक तिना खे एमी बोलो थे। 12इना ते पईले सेईरो रे होरी लोक बसी रे थे, पर एसाव वंशो रे लोके सेयो तेस प्रदेशो ते निकयाल़ी ते ओर आपू सामणे तिना रा नाश करी की तिना रिया जगा रे आपू बसी गे; जिंयाँ कि इस्राएलिए यहोवे री दित्ती री आपणे अक्को री जगा रे कित्तेया।
13एबे तुसे लोक एथा ते चली की जेरेद नदिया ते पार जाओ। तेबे आसे जेरेद नदिया ते पार आए। 14आसा रे कादेशबर्ने खे छाडणे ते लई की जेरेद नदी पार ऊणे तक 38 साल बीतीगे, तेते बीचे यहोवे रे वादे रे मुताबिक तेसा पीढ़िया रे सारे योद्धा डेरे बीचा ते नाश ऊईगे। 15जदुओ तक सेयो नाश नि ऊए तदुओ तक यहोवे रा आथ तिना खे डेरे बीचा ते खत्म करने खे तिना रे खलाफ उठेया रा था। 16जेबे सारे योद्धा लड़दे-लड़दे लोका बीचा ते नाश ऊईगे।
17तेबे यहोवे माखे बोलेया, 18“एबे मोआबो रा बन्ना, मतलब आर नाओं रे शईरो ते पार कर 19ओर जेबे तूँ अम्मोनिया रे बन्ने रे नेड़े पऊँचो, तेबे सेयो नि सताणे ओर ना ई सेयो युद्ध करने खे उकसाणे, कऊँकि मां अम्मोन वंशिया री जमीना बीचा ते कुछ बी तेरे अक्को रे नि करना, कऊँकि मैं से लूतो रे वंशो रे अक्को रे करी ता रा।”
20से देश बी रपाईया रा गिणेया जाओ था, कऊँकि पुराणे दिना रे रपाई लोक तेती रओ थे, पर अम्मोन वंशी तिना खे जमजुम्मी बोलो थे। 21सेयो बी अनाक वंशिया जेड़े तागतबर ओर लाम्बे-लाम्बे ओर गिणतिया रे बऊत थे; पर यहोवे सेयो अम्मोनिया रे सामणे ते नाश करीते ओर तिने सेयो तेसा जगा ते निकयाल़ी ते ओर तिना रिया जगा रे आपू रणे लगे। 22जिंयाँ तिने सेईरो रे रणे वाल़े एसाविया रे सामणे होरिये नाश कित्ते ओर तिने सेयो तेसा जगा ते निकयाल़ी ते ओर आजो तक तिना रिया जगा पाँदे सेयो आपू रओए। 23तेड़ा ई अव्वी लोक, जो गाजा शईरो तक गाँवो रे बसी रे थे, सेयो कप्तोरी लोके जो कप्तोर देशो ते निकल़े थे नाश करीते ओर तिना रिया जगा रे आपू रणे लगे।
24एबे तुसे लोक उठी की चलो ओर अर्नोनो रे नदिया ते पार चलो; देखो, आऊँ प्रदेशो समेत हेशबोनो रे राजा एमोरी सिहोनो खे तेरे वशो रे करी देऊँआ; इजी री खातर तेस प्रदेशो खे आपणे अक्को रे लणा शुरू कर ओर तेस राजे साथे युद्ध छेड़ी देओ। 25जितणे लोक तरतिया पाँदे रओए तिना सबी रे मनो रे मां आजके दिनो तेई तेरी बजअ ते डर ओर थुरनी पैदा करनी; सेयो तेरा समाचार सुणी की तेरे डरो रे मारे थरथराणे ओर पीड़ित ऊणे।
राजा सिहोनो री आर
26तेबे मैं कदेमोत नाओं री सुनसाण जगा ते हेशबोनो रे राजा सिहोनो गे मेल-मिलापो रिया यो गल्ला करने खे दूत पेजे।
27माखे आपणे प्रदेशो बिछिए ऊई की जाणे दे, मां राजपथो पाँदा ते चली जाणा ओर दाँणे या खूँजे आथे नि मुड़ूंगा। 28तैं पैसा लई की माखे खाणे रिया चीजा देणियां ताकि आऊँ खाऊँ ओर पाणी बी पैसा लई की माखे देणा ताकि आऊँ पीऊँ, बस माखे पैदल ई चली जाणे दे। 29जिंयाँ सेईरो रे रणे वाल़ेया एसावी लोक ओर आर नाओं रे शईरो रे रणे वाल़ेया मोआबी लोके मां साथे कित्तेया, तेड़ा ई तूँ बी मां साथे कर, ईंयाँ मां यरदन नदिया ते पार ऊई की तेसा जगा रे पऊँचणा, जेतेखे म्हारा परमेशर यहोवा आसा खे देणे वाल़ा ए। 30पर हेशबोनो रे राजे सिहोने आसे आपणियां जगा रिये ऊई की जाणे नि दित्ते; कऊँकि तुसा रे परमेशर यहोवा तेसरा मन सख्त ओर टीठ करिता था, ताकि तेसखे तुसा रे वशो रे करी देओ, जेड़ा कि से आज बी ए।
31तेबे यहोवे माखे बोलेया, “देख, आऊँ जगा समेत सिहोनो खे तेरे वशो रे करने वाल़ा ए; तेसा जगा खे आपणे अक्को रे लणा शुरू कर।”
32तेबे सिहोन आपणी सारी सेना समेत निकल़ी की आया ओर म्हारा सामणा करी की युद्ध करने खे यहस शईरो तक चढ़ी की आईगा। 33ओर तेबे म्हारे परमेशर यहोवा से म्हारे जरीये अराई ता ओर आसे से तेसरे पाऊआ ओर तेसरी सारी सेना समेत काई ता। 34तेस बखते ई आसे तेसरे सारे शईर लई ले ओर एकी-एकी शईरो रिया जवाणसा ओर बाल-बच्चेया समेत एथो तक नाश करिता कि कोई बी जिऊँदा नि रएया; 35पर डांगर आसे आपणे करीते ओर जो शईर आसे जीती ले थे तिना रे नगरा री लूट बी आसे लई ली। 36अरोएर शईर जो अर्नोन नदिया रे कनारे पाँदे ए ओर से शईर जो काअटिया ते गिलादो तक ए; तिना बीचा ते एड़ा कोई शईर निए जेतेखे यहोवे आसा रे वशो रे नि करी राखेया ओ। 37पर आसे अम्मोनिया रे प्रदेशो रे नेड़े, बल्कि यब्बोक नदिया ते इतणे पार जितणा देश ए ओर पाह्ड़ी प्रदेशो रे शईर जेती-जेती जाणे ते म्हारे परमेशर यहोवा ना कित्ती थी, तेती आसे नि गये।
Currently Selected:
बिधान 2: BGH
Highlight
Copy
Compare
Share
Want to have your highlights saved across all your devices? Sign up or sign in
This work is licensed under Creative Commons Attribution-ShareAlike 4.0 License.
