Zekaliya 3
3
Cilengaano cabantu ncibakabona mupaizi mupati
1Mpoonya wakanditondezya Josyuwa mupaizi mupati wakaimvwi kumbele lyamungelo wa Mwami Leza, a Saatani kaimvwi kubbazu lyalulyo lwakwe kuti amutamikizye. 2Mungelo wa Mwami Leza wakati kuli Saatani, “Mwami Leza aakusubule O Saatani! Mwami Leza wakasala Jelusalemu, aakusubule! Sena muntu ooyu tali cisisi ciyaka casikkulwa mumulilo?”
3Lino Josyuwa wakasamide zisani zyatombe ciindi naakaimvwi kumbele lyamungelo. 4Mungelo ooyo wakati kulibaabo bakaimvwi kumbele lyakwe, “Amumusamunune zisani zyatombe.”
Mpawo wakati kuli Josyuwa, “Bona ndagwisya cinyonyoono cako, ndakusamika zisani zidula zyeebeka.”
5Aawo ndakati, “Amumusamike cingundu cisalala cibotu.” Mpawo bakamusamika cingundu cisalala cibotu kumutwe akumusamika zisani, mungelo walo wa Mwami Leza wakaliimvwi kumbali.
6Lino mungelo wa Mwami Leza wakalailila Josyuwa kuti, 7Mboobu mbwaamba Mwami Leza Singuzuzyoonse ulati, “Kuti naa kotobela nzila zyangu akucita nzendikwaambila, uyookonzya kweendelezya ŋanda yangu akubamba mabuwa aaŋanda yangu, ambebo nenjookukkazika akati kabaaba baimvwi waawa.
8“Lino swiilila Josyuwa omupaizi mupati, antoomwe abeenzinyoko aaba bakkede kumbele lyako, bali ncitondezyo cazintu ziyoocitika. Ndiyooleta mubelesi wangu zina uuitwa kuti ngu mutabi. 9Bona bbwe eelyo ndindaimika kumbele lya Josyuwa! Bbwe lyomwe eeli lilijisi meso aali ciloba, nkabela njoolemba malembo alindilyo, mbwaamba Mwami Leza Singuzuzyoonse, eelyo njoogwisya zinyonyoono zyanyika eeyi mubuzuba bomwe.
10“Mubuzuba oobo umwi aumwi wanu uyootamba mweenzinyina kuti azookkale munsi aamusaansa amukuyu wakwe, mbwaamba Mwami Leza Singuzuzyoonse.”
Currently Selected:
Zekaliya 3: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
