Zekaliya 2
2
Cilengaano calutambo lwakupimya
1Mpawo ndakalanga, eelyo ndakabona muntu kumbele lyangu wakajisi lutambo lwakupimya mujanza lyakwe! 2Ndakabuzya kuti, “Ino uya kuli?” Wakandiingula kuti, “Ndiya kukweeleka Jelusalemu, ndizibe naa ulampa buti mubwamba amubulamfu bwawo.”
3Mpoonya mungelo ooyo ngundakali kukanana aawe wakainka, eelyo kwakaboola mungelo uumbi kuzoomucingauzya, 4wakati kulinguwe, “Zuzaana ambila mukubusi uulya kuti, ‘Jelusalemu unooli munzi uutakwe bwaanda akaambo kakuvula kwabantu azivubwa mulinguwo. 5Mebo lwangu ndiyooba lukwakwa lwamulilo kuuzinguluka,’ mbwaamba Mwami Leza, alimwi ndiyooba bulemu bwawo mulinguwo.”
6“Ee buya! Ee buya! Amutije muzwe munyika yakunyika, mbwaamba Mwami Leza, nkaambo ndamumwaila kumyuuwo yone yakujulu. Mbwaamba Mwami Leza.
7“Amutije nobamu Ziyoni! Amutije nomukkala mumunzi wa Babuloni! 8Kayi mboobu mbwaamba Mwami Leza Singuzuzyoonse ulati, ‘Lino naakamana kundilemeka akundituma kuyoolwana misyobo eeyo yakamusaala, nkaambo kufumbwa ooyo uumulwana ulwana nceyandisisya. 9Kasimpe mebo ndiyoobalwana cakuti bazike babo bayoobasaala. Ndendilyo nomuyooziba kuti Mwami Leza Singuzuzyoonse nguwakandituma.’
10“Koongolola, utangale omunzi wa Ziyoni. Ndilaboola ndizookkale akati kako, mbwaamba Mwami Leza. 11Misyobo minji iyooboola ku Mwami Leza mubuzuba oobo, nkabela bayooba bantu bangu. Ndizookkala akati kanu, ndendilyo nomuzooziba kuti Mwami Leza Singuzuzyoonse nguwakandituma. 12Mwami Leza uyookona cisi ca Juda mbuli caabilo calukono lwakwe munyika iisalala, uyoosalala munzi wa Jelusalemu alimwi. 13Amuumune kumbele lya Mwami Leza nobantu baansi nyoonse, nkaambo wanyamuka abusena bwakwe busalala.”
Currently Selected:
Zekaliya 2: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
