Zekaliya 4
4
Cilengaano cacikkazikilo calambe
1Mpoonya mungelo ooyo ngundakali kwaambaula aawe wakaboola kuzoondibusya, mbubonya mbuli businsimuka woona. 2Wakandibuzya kuti, “Ubwene nzi?”
Ndakaingula kuti, “Ndibwene cikkalilo calambe cangolida cijisi citililo camafuta ajulu, alimwi cilijisi malambe aali ciloba mulincico, kuli atubunda tuli ciloba twamalambe. 3Alimwi kuli misamu yaoliva yobilo kumbali aaco, umwi kubbazu lyalulyo lwacitililo akulumwensi lwaco.”
4Ndakabuzya mungelo ngundakali kwaambaula aawe kuti, “Ino nzinzi eezi osimalelo aangu?”
5Wakaingula kuti, “Sena tozizi eezi kuti ninzi?” Ndakaingula kuti, “Peepe nsizizi osimalelo wangu.” 6Mpawo wakati kulindime, “Ngaaya majwi Mwami Leza ngaambila Zelubbabeli ulati, ‘Uyoozunda kutali kunsana nomuba munguzu pe, pele kwiindila mu Muuya wangu.’ 7Ino nduweni ocilundu ciyumu? Uyooolwa kumbele lya Zelubbabeli akubambasikwa. Eelyo bbwe lyakucooko noliyoosimpwa, aawo bantu bakapozomoke bakati, ‘Leza aleleke! Leza aleleke! Cabota! Cabota!’”
8Majwi aa Mwami Leza akandisikila akuti, 9“Zelubbabeli nguwakasya ntalisyo yaŋanda ya Leza eeyi, alimwi nguwenya nguuyooimanizya. Ndendilyo nomuyooziba kuti Mwami Leza Singuzuzyoonse nguwakandituma. 10Nguni uusampaula buzuba bwazintu zisyoonto? Bantu bayoosekelela baakubona cipimyo mujanza lya Zelubbabeli. Eezi zili ciloba mmeso aa Mwami Leza aalanga munyika yoonse.”
11Mpawo ndakabuzya mungelo kuti, “Misamu yobilo yaoliva iimvwi kululyo akulumwensi lwacikkazikilo calambe eeci njanzi?” 12Ndakamubuzya alimwi kuti, “Ino njanzi eeyi mitabi yobilo yaoliva iili kumbali lyatupulo tobilo twangolida tugwisya mafuta aali mbuli ngolida?”
13Wakandiingula kuti, “Sena ulizizi eezi kuti ninzi?”
Ndakati, “Peepe osimalelo wangu.”
14Nkaako wakati, “Aaba mbabaabo bobilo bananikidwe kuti babelekele Mwami Leza munyika yoonse.”
Currently Selected:
Zekaliya 4: Tonga96
Highlight
Share
Compare
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
