Baloma 3

Zyabululami bwa Leza

1Lino Bajuda babainda buti bamasi? Ino akwalo kupalulwa kuli aampindu nzi? 2Kuli mpindu mpati kapati. Kayi kusaanguna, Leza wakapa Bajuda majwi aakwe. 3Ino kuti bamwi babo kabali tiibakali kusyomeka, sena kutasyomeka kwabo inga kwacita kuti Leza awalo atasyomeki? 4Peepe, embo pe! Pele bantu bazibe kuti Leza ulasyomeka, nikuba kuti bantu boonse mbabeji. Mbubonya mbuli mbokulembedwe kuti,

“Uzibwe kuti waamba ziluleme nokanana,

alimwi ulazunda nobeteka.”

5Pele naa kutalulama kwesu kutondezya kuti Leza uliluleme, ino twaambe buti? Sena tulakonzya kwaamba kuti Leza taluleme natusubula? Aawa ndaamba bwaamba bantu. 6Peepe, embo pe! Leza kuti kataluleme inga ulakonzya buti kubeteka bantu boonse?

7Umwi inga ulati, “Naa kuti kubeja kwangu kakutondezya kusyomeka kwa Leza akumuletela bulemu, ino nkaambo nzi ncembetekwa mbuli muntu sizibi?” 8Ambweni kuti sena tulakonzya kucita zibi kutegwa zibotu ziboneke? Nkobali bamwi batubejelezya kuti mbotwaamba oobo. Aabo bayoopegwa cisubulo cibeelede.

Bantu boonse tabaluleme

9Lino twaambe buti? Sena to Bajuda tulabainda bamasi? Peepe, tatubaindi abuniini, nkaambo twaamba kale kuti boonse mbaasizinyonyoono Bajuda abamasi mbubonya. 10Mbuli mbwaaamba Malembe kuti,

“Taakwe uululeme pe, naba omwe.

11Taakwe uuswiilila nikuba kuyandaula Leza.

12Boonse baleya, babisya boonse.

Taakwe uucita bubotu, taakwe naba omwe.

13Mutumeneno twabo muli ziyoosya mbuli cuumbwe cikwazeme.

Amilaka yabo bakanana buyo zyalweeno.

Amilomo yabo baamba majwi mabi mbuli buyoka bwanzoka.

14Mukanwa lyabo muzwa majwi aabukali aalusinganyo.

15Balafwambaana kuti bajaye beenzinyina.

16Balanyonyoona akupenzya kuli koonse nkobaya.

17Nzila yaluumuno tabiizi pe.

18Tabayoowi Leza naaceya pe.”

19Lino tulizi kuti zyoonse zyaamba Mulawo wa Leza zijatilizya baabo bali mu Mulawo, kutegwa babule cilitamizyo, eelyo Leza abazule boonse. 20Kayi kwiindila mumalailile aali mu Mulawo taakwe muntu naba omwe uukonzya kululama kuli Leza. Nkaambo Mulawo nguututondezya kuti tuli basizinyonyoono.

Leza mbwalulamika bantu

21Lino Leza watuyubunwida nzila njalulamikila bantu, nzila eeyi tiili yakubamba Mulawo pe. Naba Mozesi abasinsimi balazuminina anzila eeyi. 22Nzila Leza njalulamikila bantu boonse nkusyoma Jesu Kilisito. Taakwe lusalululo pe. 23Nkaambo boonse bakabisya, balela kuba aabusalali mbuli bwa Leza. 24Pele nkaambo kaluse lwakwe Leza ulabalulamika. Eeci ncipego buyo kwiindila muli Jesu Kilisito wakabanununa. 25Leza wakapa kuti mulufu lwakwe abe nzila yakulekelela zinyonyoono zyabantu bamusyoma. Eeci ncitondezyo cabululami bwa Leza. Kale-kale Leza wakali kuleka buyo zinyonyoono zyabantu nkaambo kalweengelelo lwakwe. 26Pele ono wapa Jesu kutondezya bululami bwakwe, kuti bantu bazibe kuti walo uliluleme abalo basyoma Jesu balalulamikwa kulinguwe.

27Sena muntu inga kalisumpula amakani alufutuko? Peepe, takonzyi. Nkaambo nzi? Nkaambo cintu cipati kuli Leza tiili milimo, ndusyomo. 28Aboobo tulaamba kuti muntu ulalulamikwa alusyomo, kutali mukubamba Mulawo. 29Sena Leza ngwa Bajuda balikke? Sena tali wabamasi abalo? Iiyi, abalo bamasi nguwabo. 30Mbubo, lino kuli Leza omwe buyo, uululamika Bajuda kwiindila mulusyomo, abamasi mbubonya. 31Sena caamba kuti tusowa Mulawo notuti kwiindila mulusyomo? Embo pe, tuyumya Mulawo.

Currently Selected:

Baloma 3: Tonga96

Highlight

Copy