Baloma 2

Lubeta lwa Leza

1Lino, yebo omuntu nobani, oobeteka bamwi, tojisi cilitamizyo. Sena tozi kuti mumakani ngobeteka umwi aayo ayebo ulalizula omwini, nkaambo ulacita mbubonya? 2Toonse tulizi kuti lubeta lwa Leza lululeme luzida ali baabo bacita milimo iili boobo. 3Ani uyeeya buti omuntu ooboteka bamwi bantu bacita milimo iili boobo kakuli ayebo ulaicita mbubonya buyo omwini? Sena yebo uyooeleba lubeta lwa Leza? 4Sena ulaubausya luzyalo lwa Leza lunji alweengelelo lwakwe? Sena tozi kuti Leza ulakufwida luzyalo mukuti weempe? 5Pele uli sicinguni uutayandi kusanduka, nkaako uliletela bukali Leza mbwayootondezya mubuzuba mbwayoobeteka bantu boonse mubululami. 6Mubuzuba oobo Leza uyoobweedezezya muntu omwe-omwe mbuli kumilimo yakwe. 7Aabo bacita ziluleme cabusungu, kuyandaula bulemu, kulelekwa, abuumi butamani, Leza uyoobapa buumi butamani. 8Pele aabo bakazya, bataswiilili njiisyo zya Leza zyabwini, pele bacita zitaluleme, Leza ulabanyemena mubukali bwakwe. 9Mapenzi amakatazyo ayoozida boonse aabo bacita bubi, kusaanguna Bajuda, kwamana bamasi. 10Pele uyoolemeka, kulumbaizya, akupa luumuno kuli boonse aabo bacita zibotu, kusaanguna Bajuda, kwamana bamasi. 11Nkaambo kakuti Leza talangi ciwa camuntu pe.

12Bantu boonse bakabisya kabatazi Mulawo bayoonyonyoonwa nikuba kuti tiibakuuzi Mulawo ooyo. Abalo aabo bakabisya kabazi Mulawo, Mulawo ooyo nguuyoobazula. 13Nkaambo bantu tabalulami kuli Leza mukuti bakamvwa Mulawo. Pele aabo babamba Mulawo, mbabaluleme kuli Leza. 14Bantu batali Bajuda banyina Mulawo, pele ciindi lwabo beni nobacita zyaamba Mulawo, batondezya kuti balijisi Mulawo mumyoyo yabo, nikuba kuti tabajisi Mulawo wa Mozesi. 15Zintu nzyobacita zilatondezya kuti Mulawo ooyo ulilembedwe mumyoyo yabo. Balizi kuti eezi nzyamasimpe nkaambo manjezeezya aabo alabakasya, alimwi zimwi ziindi alabazumizya. 16Mboziyooba mubuzuba oobo, Leza kwiindila muli Jesu Kilisito, uyoobeteka maseseke aali mumyoyo yabo, kweendelana a Makani Mabotu aaya ngekambauka mebo.

Paulu mbwaakakazyanya abasikuupa-upa aameso

17Pele yebo olyaamba kuti uli Mujuda, ulajatisya Mulawo akulikankaizya muli Leza. 18Ulizi Leza ncayanda kuti ucite, alimwi nkaambo kakuti wakuuiya Mulawo, ulizi kwaandaanya zintu ziluleme azibyaabi. 19Ulasyoma kuti uli musololi waboofu, amumuni wabo bali mumudima, 20mulailili wabafuba-fuba, amwiiyi wabataiide. Usyoma boobo nkaambo mu Mulawo ulajana busongo anjiisyo zyabwini. 21Ino yebo ookonzya kwiisya mweenzinyoko, sena tokonzyi kuliiisya omwini? Yebo okambauka kuti bantu batabbi, sena yebo ulabba? 22Ino yebo ooamba kuti bantu batalaliki, sena yebo ulalalika? Ino yebo oosesemwa kaambo kabaleza bapange, sena ulabba zyamuŋanda iipaililwa baleza bapange? 23Yebo oolikankaizya mu Mulawo wa Leza, sena tojazyi Leza buusu nosotoka Mulawo? 24Cili mbuli mbokulembedwe kuti, “Bamasi balasampaula Leza akaambo kandinywe.”

Bupalule bwamumoyo

25Lino kupalulwa kulagwasya kuti muntu wabamba Mulawo. Pele kuti kasotoka Mulawo nicali cibotu kuti natakapalulwa buyo. 26Kuti uutapalwidwe kabamba Mulawo wa Leza, sena tali buyo mbuli uupalwidwe kuli Leza? 27Nkaambo kaako kuti ooyo uutapalwidwe kabamba Mulawo uyookuzula yebo o Mujuda oopalwidwe alimwi oojisi Milawo ya Leza wamana uliisotoka. 28Mujuda mwini-mwini tali yooyo uulibonesya buyo mbuli Mujuda kubantu. Alimwi kupalulwa kwini-kwini takuli kooko bantu nkobacita kumubili pe. 29Mujuda mwini-mwini nguyooyo Mujuda mumoyo. Alimwi kupalulwa kwini-kwini nkukooko kwamumoyo, kucitwa a Muuya Uusalala. Takucitwi mukutobela zyaamba Mulawo pe. Uulumbaizya muntu ooyo ngu Leza, kutali bantunsi.

Currently Selected:

Baloma 2: Tonga96

Highlight

Copy