Baloma 4

Abulahamu mbwaakalulamikwa mulusyomo

1Lino inga tulaamba buti a Abulahamu sikale wesu to Bajuda? 2Nkaambo Abulahamu naakalulamikwa amilimo, naajisi cakulikankaizizya, pele kutaamba kuli Leza. 3Ino Malembe aamba buti? Aamba kuti, “Abulahamu wakasyoma Leza, aboobo Leza wakamwaamba kuti mululami.” 4Lino muntu wabeleka, ulabbadelwa, kubbadelwa ooku tacili cipego pe, nciceeco nceelede kutambula nkaambo kamulimo wakwe. 5Pele kuti muntu wasyoma buyo, mucilawo cakulikankaizya mumulimo wakwe, Leza uukonzya kwaambilizya basizinyonyoono kuti mbalulami, uyoomwaamba awalo kuti mululami mulusyomo lwakwe. 6Ncencico ncaakali kwaamba Devedi naakati ulilelekedwe muntu ooyo Leza ngwaambilizya kuti mmululami, kutali kaambo kamilimo. 7Ulati,

“Balilelekedwe aabo balekelelwa milandu yabo,

aabo bali aazinyonyoono zyavumbwa.

8Ulilelekedwe muntu ooyo Leza

ngwatabalili zinyonyoono.”

9Sena cileleko eeci cili buyo kubapalule balikke, naa abatapalwidwe abalo? Ncenciceeco ncotwaamba kuti Abulahamu wakasyoma, aboobo Leza wakamwaamba kuti mmululami. 10Ino ndilili naakaambwa boobo? Sena wakapalwidwe kale naa katanapalulwa? Taakanapalulwa pe. 11Abulahamu wakapalulwa musule aakooku mbuli cisinizyo citondezya kuti Leza wakamululamika nkaambo kalusyomo lwakwe. Aboobo Abulahamu ngowisi wabaabo basyoma boonse, nkaako Leza ubaamba kuti mbalulami nikuba kuti tabapalwidwe. 12Alimwi ngowisi wabaabo batapalwidwe. Kutali bapalwidwe buyo, pele beenda munzila yalusyomo yakajisi taata Abulahamu katana palulwa

13Leza wakasyomezya Abulahamu alunyungu lwakwe kuti bayoovuba nyika yoonse. Tiicakacitika nkaambo kakuti wakabamba Mulawo, pele wakasyoma Leza, nkaako Leza wakamwaamba kuti mululami. 14Kuti kakuli aabo babikka mizeezo yabo kukubamba Mulawo mbabayookona zisyomezya zya Leza balikke, ani kusyoma Leza nkwabuyo, alimwi kusyoma nzyasyomezya ncabuyo. 15Mulawo nguuleta cisubulo, pele ooko kunyina Mulawo tabuusotoki.

16Ncenciceeco lusyomo ndolupati mukuti bantu batambule nzyasyomezya Leza mbuli cipego buyo. Balunyungu lwa Abulahamu boonse balatambula ncobeni, teensi buyo baabo babamba Mulawo pe, pele abaabo basyoma bwakali kusyoma Abulahamu. Kayi ngotaata swebo notusyoma toonse. 17Mbubonya mbuli mbokulembedwe kuti, “Ndakucita kuti ube wisi wamisyobo yoonse.” Leza mwini nguwakaambila Abulahamu cisyomezyo eeci, Leza mwini ngwaakasyoma. Ngu Leza uubusya bafu, waamba zyazintu zitanacitika mbuli kuti zyacitika kale. 18Leza wakati, “Lunyungu lwako luyooba lunji.” Eelyo Abulahamu wakasyoma, nikuba kuti cakali kulangika aanga tacikacitiki pe, pele wakacili kusyoma. 19Wakali aafwiifwi kuba amyaka iili mwaanda, eelyo wakalizi kuti nguzu zyakwe ziya bumana, awalo Sala taakali kuzyala. 20Nikuba boobo taakazumbauzya naaceya. Pele wakali kusyoma cisyomezyo ca Leza anguzu akumulumbaizya. 21Wakazumina ncobeni kuti Leza ulakonzya kucita nzyaakasyomezya. 22Ncenciceeco “Leza ncaakamwaamba kuti mululami” nkaambo kalusyomo. 23Aaya majwi aaamba kuti, “Leza wakamwaamba kuti mululami,” taaambi buyo Abulahamu alikke. 24Pele aamba andiswe nitwaambwa kuti tuli balulami nkaambo tulasyoma Leza wakabusya Mwami Jesu kuzwa kubafu. 25Jesu ooyo wakajaigwa akaambo kazinyonyoono zyesu, nkabela wakabusigwa kuzwa kubafu kuti Leza atwaambe kuti tuliluleme.

Currently Selected:

Baloma 4: Tonga96

Highlight

Copy