Baloma 13

Zyakuswiilila baleli

1Bantu boonse beelede kuswiilila baleli bacisi. Nkaambo kunyina muntu uulaa bulelo butazwidi kuli Leza. Baleli baliwo Leza nguwakababikka. 2Nkaambo ooyo uutaswiilili baleli ukaka cakabikkwa a Leza. Nkabela uucita boobo uyoosubulwa. 3Baleli tabayoosyi kuli bacita zibotu pe, ccita kuli bacita zibi. Sena ulayanda kukkala aluumuno mucisi? Mbubo cita ziluleme, eelyo muleli uyookulumbaizya. 4Kayi muleli mutwanga wa Leza uukucitila zibotu. Pele kuti kocita zibyaabi, muyoowe, nkaambo ulijisi nguzu zyakukusubula. Muleli mutwanga wa Leza uusubula bacita zibi mubusena bwa Leza. 5Nkaambo kaako muleelede kuswiilila baleli, kutali buyo mukuti kamuyoowa bukali bwa Leza, pele nkaambo mulizi mumyoyo yanu nobeni kuti muleelede kucita boobo. 6Ncenciceeco ncomubaswiilila, nkaambo baleli babelekela Leza nibacita mulimo ooyu. 7Eelyo amutele mitelo njomweelede kubaleli akubalemeka.

Zyakuyandana

8Mutabi acikwelete kumuntu, ccita buyo cakumuyanda. Uuyanda mweenzinyina wabamba zyaamba Mulawo wa Leza. 9Milawo ilati, “Utaciti bumambe, utajayi, utabbi, utabi sibbivwe,” amilawo imwi yoonse ilajinka amulawo ooyu uuti, “Yanda mweenzinyoko mbubonya mbuli mboliyanda omwini.” 10Uuyanda mweenzinyina takonzyi kumubisizyae. Nkaako uuyanda mweenzinyina wabamba zyoonse zyaamba Mulawo.

Amucenjele

11Aboobo amucite eezi, nkaambo mulizi kuti ciindi cakubuka kuzwa muŋonzi casika. Ncobeni, ciindi cakuti tufutulwe cili aafwiifwi kwiinda mbocakabede nitwakasyoma. 12Busiku bwaumbuluka, buyanda kuca. Lino atuleke milimo yamumudima, tubweze zilwanyo zyamumuni. 13Tweende bweelede mbuli bantu beenda sikati. Kutabi busindya naa bukolwi, bwaamu naa busofwaazi, bulwani naa bbivwe. 14Amusiye buntunsi azisusi zyabo. Mwami Jesu Kilisito abe cilwanyo canu.

Currently Selected:

Baloma 13: Tonga96

Highlight

Copy