Baloma 14

Mutapi kaambo Bakilisitonyoko

1Amumutambule ooyo uutanasima mulusyomo, mutakazyanyi anguwe azyamizeezo yakwe. 2Muntu umwi ulasyoma kuti ulakonzya kulya kufumbwa cintu. Pele umwi uutanasima mulusyomo ulya buyo cisyumani amicelo. 3Ooyo uulya kufumbwa atasampauli mweenzinyina uutalyi. Ayooyo uulya buyo cisyumani atasampauli mweenzinyina nkaambo Leza wamuyanzya. 4Ani nduweni oopa kaambo kumubelesi wa Mwami? Mwami wakwe alikke nguukonzya kuziba kuti naa wacita kabotu naa wakacilwa. Lino ndizi kuti uyoocita kabotu nkaambo Mwami ulakonzya kumugwasya.

5Muntu umwi ulayeeya kuti buzuba bumwi buli kabotu kukomba Leza kwiinda bumwi. Pele umwi ulayeeya kuti mazuba oonse aleelene buyo. Aboobo muntu amuntu acite mbuli mbwayeeya mumoyo wakwe. 6Ooyo uubamba buzuba bumwi ulacita oobo mukulemeka Mwami. Ayooyo uulya kufumbwa, ulacita oobo mukulemeka Mwami. Kayi ulumba Leza nkaambo kazilyo. Alimwi ayooyo uulya cisyumani, ulacita oobo mukulemeka akulumba Leza. 7Nkaambo taakwe muntu akati kesu naba omwe uuliponena mwini nikuba uulifwida. 8Nitupona, tuponena Mwami, nitufwa, tufwida Mwami. Aboobo nitupona naa kufwa, tuli ba Mwami. 9Nkaambo Kilisito wakafwa akupona alimwi kuti abe Mwami waboonse baumi abafu.

10Ino yebo umupeda nzi kaambo Mukilisitonyoko? Ayebo umusampawida nzi Mukilisitonyoko? Kayi toonse tuyoobetekwa a Leza. 11Nkaambo Malembe alati,

“Leza waamba kuti, ‘Lwangu nde mwini,

bantu boonse bayoondivuntamina akuzumina kuti ndime Leza.’”

12Aboobo umwi aumwi wesu uyoolyaambilila kuli Leza zyoonse nzyaakacita.

Mukilisito mbwateelede kulebya mweenzinyina

13Lino Mukilisito atapi kaambo mweenzinyina. Pele acenjele kuti ataciti cimwi cinga cilalebya umwi kuti abisye. 14Ndilizi cakutadonaika mu Mwami Jesu kuti taakwe cintu niciba comwe cibisya muntu pe. Pele kumuntu uuciyeeyela kuti ncibi, ncibi ncobeni. 15Naa ncolya calebya munyoko, nkokuti tocili aaluyando. Ncolya citanyonyoozyi ooyo Kilisito ngwaakafwida. 16Amucenjele kuti mutapi bantu kaambo kakusampaula lwaangunuko ndomujisi. 17Nkaambo bwami bwa Leza mbwabululami, luumuno alutangalo luletwa a Muuya Uusalala, pele tabuli bwakulya akunywa pe. 18Ooyo uubelekela Kilisito munzila eeyi, ubotya Leza, eelyo bantu balazumina kuti mmubelesi wa Kilisito ncobeni.

19Aboobo atucite eezyo zikonzya kuleta luumuno eelyo tuyumizyanye. 20Utamwayi milimo ya Leza akaambo kanzyolya. Ncobeni zilyo zyoonse zilakonzya kuligwa, pele Mukilisito ulabisya nalya eeco cinga calebya mweenzinyina. 21Ncibotu kuliimya kulya nyama, naa kunywa cikola nikuba kucita cimwi cintu cinga calebya munyoko. 22Eezyo nzyosyoma azintu eezi azibe akati kako a Leza. Ulilelekedwe ooyo uutadonaiki nacita eezyo nzyazi kuti zileelede kucitwa. 23Pele ooyo uudonaika naalya cintu wabisya kale, nkaambo eezyo nzyacita tazili nzyasyoma kuti zileelede kucitwa. Aboobo kufumbwa muntu ncacita katasyomi kuti cili luleme, ncinyonyoono.

Currently Selected:

Baloma 14: Tonga96

Highlight

Copy