Baloma 11
11
Leza mbwaakafwida Baisilayeli lweengelelo
1Lino ndibuzya kuti, sena Leza wakaka bantu bakwe? Embo pe! Kayi mebo ndi Muisilayeli! Ncobeni, ndizwa kulunyungu lwa Abulahamu, kumusyobo wa Benjamini. 2Leza taabakaka bantu bakwe pe, bantu mbaakasala kale. Sena tamuzi Malembe mbwaamba a Elija naakakomba kuti Leza asubule Baisilayeli? 3Wakati, “Mwami Leza, bantu aaba bakajaya basinsimi bako, bakamwaya zipaililo zyako. Kwasyaala buyo ndime endikke, nkabela ambebo bayanda kundijaya.” 4Ino Leza wakamwiingula buti? Wakati, “Ndizandwide baalumi bali zyuulu zili ciloba batanakomba kuli Baali.” 5Mbubonya oobo amazuba aano. Nkobali Baisilayeli bace buyo Leza mbaakasala muluse lwakwe. 6Wakabasala nkaambo kaluse lwakwe, kutali kaambo kanzibakacita pe. Nikwakali boobo, nilwatacili luse.
7Ani tutyani? Tee kayi Baisilayeli tiibacijana ncibakali kuyanda, kutaamba baabo Leza mbaakasala. Bamwi babo bakaba basicinguni. 8Mbubonya mbuli mbokulembedwe kuti,
“Leza wakabacitya kuti babe basicinguni.
Meso aabo taaboni, amatwi aabo taamvwi, kusikila sunu.”
9Awalo Devedi ulaamba kuti,
“Bajatwe akucegwa nibacili amapobwe.
Bawide mudiba akusubulwa.
10Meso aabo aofwaale, ataboni.
Mapenzi aabo abalemene lyoonse.”
11Lino mbuzye kuti, sena Baisilayeli bakalifumpula mukuti bawe akunyonyooka? Peepe, akaambo kakubisya kwabo, bamasi bakafutulwa kuti Baisilayeli bafwe munyono. 12Aboobo twabona kuti kubisya kwa Baisilayeli kwakabaletela mpindu bantu boonse ansi aano, nkokuti kukacilwa kwabo kwakabaletela mpindu bamasi boonse. Tee kayi kuyooba mpindu mpati ciindi Baisilayeli boonse bakasalwa nibayoofutulwa.
Zyakufutulwa kwabamasi
13Njanda kwaamba zyandinywe nobamasi. Mbuli mbweli mutumwa kuli baabo batali Baisilayeli, ndabotelwa abutumwa bwangu oobu. 14Ambweni mukucita boobo ndakonzya kucitya kuti bamusyobo wangu bafwe munyono, eelyo bamwi babo basyome Kilisito akufutulwa. 15Kuti naa kukakwa kwa Baisilayeli a Leza kwakacitya kuti walo ayanzane abantu boonse, ino kutambulwa kwabo kulaamba nzi? Kuli mbuli kuti bafu babuka.
16Naa kuti muntu wapa kuli Leza kabeela kacinkwa kakusaanguna, nkokuti cinkwa coonse capegwa. Naa kuti muyanda ulasalala, nkokuti ayalo mitabi. 17Mitabi imwi yamusamu waoliva yakatyoka, nkabela Leza wakalumika mutabi waoliva wamusokwe mubusena bwayo. Nywebo nobamasi muli mbuli mutabi wamusokwe, pele lino mulatambula nguzu zizwa mumusamu waoliva uusyangwa, nkokuti kuzwa ku Baisilayeli. 18Nkaambo kaako tamweelede kusampaula aabo bakatyoka mbubuli mitabi yaambwa. Ani inga mwalisumpula buti? Kayi muli mitabi buyo! Tamuli ndinywe mutabilila miyanda pe, pele miyanda njiitabilila ndinywe.
19Lino mulati, “Mitabi yakatyoka kuti kulumikwe ndiswe amusamu.” 20Iiyi, mbombubo oobo. Bakatyoka nkaambo tiibakasyoma, eelyo nywebo mulikkede mumusamu nkaambo kakusyoma kwanu. Nkaako mutali kulikankaizyi, pele amucenjele. 21Leza taakabaleka Baisilayeli, balo bali mbuli mitabi iini-ini. Sena nywebo muyeeya kuti inga wamuleka buyo? 22Lino amuzibe kuti Leza ngusilubomba ncobeni, alimwi mukali. Mukali kuli baabo bawa, pele ulaalubomba kulindinywe, kufumbwa buyo kuti kamutasampauli lubomba lwakwe. 23Nkabela kuti Baisilayeli basiya kutasyoma kwabo beempa, Leza uyoobalumikizya amusamu abalo. Leza ngusinguzu, ulakonzya kucita oobo. 24Nywebo nobamasi muli mbuli mutabi waoliva wamusokwe, ooyo Leza ngwaakatyola akuulumika amusamu waoliva uusyangidwe, calo citakonzyi kulicitikila. Aboobo ncuuba-uba kuti Leza alumikizye alimwi mitabi yakatyokede amusamu wayo.
Leza ngusilubomba kuli boonse
25Nobakwesu, kuli maseseke ngeyanda kuti mwaazibe, kuti ambweni inga mulaliyeyeela kuti muli basongo. Maseseke aayo ngaaya, Baisilayeli bamwi mbaasicinguni, nkabela kunooli boobo kusikila bamasi basale boonse bakaboole kuli Leza. 26Ndendilyo Baisilayeli boonse nibayoofutulwa. Mbuli mbwaaamba Malembe kuti,
“Muvuni uyooboola kuzwa ku Ziyoni.
Ngonguwe uyoogwisya zinyonyoono zya Isilayeli.
27Cizuminano eeci ciyoocitika
ndaakubalekelela zinyonyoono zyabo.”
28Lino kwaamba zya Makani Mabotu Baisilayeli mbaasinkondonyina Leza akaambo kanu. Pele kwaamba zyakusalwa, Baisilayeli mbayandwa ba Leza nkaambo kabasikale babo. 29Lino Leza tasanduki, naita akuleleka muntu. 30Kaindi nywebo nobamasi tiimwakali kuswiilila Leza, pele sunu Leza wamufwida luzyalo nkaambo Baisilayeli bakali kukaka akutamuswiilila walo. 31Mbubonya oobo Baisilayeli tabaswiilili Leza kuti mukutambula luzyalo lwa Leza nywebo, abalo balutambulizye. 32Leza wakacita kuti bantu boonse babe mbuli baange nkaambo tabamuswiilili. Wakacita oobo mukuti abafwide luzyalo boonse.
Leza aalumbaizigwe
33Ha! luzyalo lwa Leza ndupati kapati! Luzibo abusongo bwakwe tazyaambiki! Nguni uukonzya kupandulula makanze aakwe akumvwisisya nzila zyakwe? 34Zili mbuli mbwaaamba Malembe kuti,
“Ani nguni uuzi mizeezo ya Mwami Leza?
Nguni uukonzya kuba mulayi wakwe?
35Naa nguni wakapa Leza cintu,
kuti amana walo amuboozezye?”
36Nkaambo mbwali nguwakalenga zintu zyoonse, nguubamba zyoonse, aboobo zyoonse mpozili nkaambo kakwe. Leza alemekwe lyoonse. Akube boobo!
Currently Selected:
Baloma 11: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
