Baloma 10
10
1Nobakwesu, cintu nceyandisya amoyo wangu woonse alimwi ncekumbila Leza ncakuti bamusyobo wangu bafutuke. 2Ndizuminine kuti mbasungu kuli zya Leza, pele busungu bwabo tabulondokede. 3Nkaambo tabazi nzila njaambila bantu kuti mbalulami, balasola kulijanina nzila yakulilulamika kuli Leza, tabalibombyi kunzila ya Leza pe. 4Lino Kilisito ngamagolelo aa Mulawo kuti boonse basyoma baambwe kuti mbalulami.
Leza mbwayanda kufutula bantu boonse
5Kwaamba zyabululami bujanwa mukubamba Mulawo, Mozesi wakalemba kuti, “Ooyo uucita zyaamba Mulawo uyooba aabuumi.” 6Lino kwaamba zyabululami bujanwa mukusyoma Leza, wakalemba kuti, “Mutalibuzyi kuti, ‘Nguni uukonzya kuya kujulu?’” (Nkokuti, kuya kujulu kuyooleta Kilisito.) 7“Alimwi mutalibuzyi kuti, ‘Nguni uukonzya kuya kucikkalilo cabafu?’” (Nkokuti, kuya kucikkalilo cabafu kuyooleta Kilisito.) 8Ino waamba buti? Ulati, “Majwi aa Leza taali kule andinywe. Ali mumilomo amyoyo yanu.” (Nkokuti makani aaamba zyalusyomo ndotukambauka.) 9Kuti kamwaamba amilomo yanu kuti Jesu ngo Mwami, alimwi kuti kamusyoma amyoyo yoonse kuti Leza wakamubusya kuzwa kubafu, muyoofutulwa. 10Nkaambo muntu ulasyoma amoyo wakwe, eelyo Leza ulamwaamba kuti mululami, nkabela muntu ooyo ulazumina akwaamba zyalusyomo lwakwe, eelyo ulafutulwa. 11Malembe aamba kuti, “Taakwe naba omwe uusyoma mulinguwe uyoousigwa nsoni.” 12Nkaambo taakwe kwaandaana akati ka Bajuda abamasi. Boonse Mwami wabo ngumwi buyo, ulaleleka aabo boonse bamukumbila. 13Mbubwaamba Malembe kuti, “Kufumbwa muntu uukumbila Mwami Leza kuti amugwasye, uyoofutulwa.”
14Ino inga bamukumbila buti ngobatanasyoma? Alimwi balamusyoma buti kabatanamvwa zyakwe? Alimwi bazimvwe buti kakutakwe sikubakambaukila? 15Alimwi inga bakambauka buti batatumwa? Mbubonya mbuli mbokulembedwe kuti, “Ncibotu kapati nibaboola aabo bakambauka Makani Mabotu.” 16Pele takuli kuti boonse bakaazumina Makani aayo pe. Mbubuli bwakaamba musinsimi Izaya kuti, “O Mwami Leza, nguni uusyoma nzyotukambauka?” 17Lino lusyomo lulaba mumuntu namvwa Mulumbe, awalo Mulumbe ulaletwa mukukambauka zya Kilisito.
18Pele ndabuzya kuti, sena Baisilayeli tabanamvwa Mulumbe ooyu? Peepe, kwalo bakamvwa. Mbubwaamba Malembe kuti, “Majwi aabo akamvwigwa munyika yoonse. Makani aabo akasika kumagolelo aanyika.” 19Pele lino alimwi ndabuzya kuti, sena Baisilayeli tiibakaziba Mulumbe ooyu? Mozesi nguuingula nati, Leza ulati,
“Ime nzoomucitya munyono kulibaabo
bamukowa uunyina ankuuya.
Njoomunyemya akaambo kabantu
mbomuti mbafuba-fuba.”
20Awalo, Izaya ulaambisisya ulati, Leza ulati,
“Ime ndakajanwa abantu
batakali kundiyandaula.
Ndakalibonya kuli baabo batakali
kubuzya-buzya zyandime.”
21Pele zya Baisilayeli Leza waamba kuti, “Buzuba boonse ndatandabika maanza aangu kuti ntambule bantu basicinguni bazangi.”
Currently Selected:
Baloma 10: Tonga96
Highlight
Share
Copy
Want to have your highlights saved across all your devices? Sign up or sign in
Tonga Bible © United Bible Societies, 1994.
