Ciyubunuzyo 6

Ziga mbuzyakamatulwa

1Lino ndakabona Mwanaa mbelele kanamatula ciga comwe cazeezyo zili ciloba, mpoonya comwe cazilenge ziya cakapozomoka ajwi pati lili mbuli kuzuma kwamvula cati, “Boola!” 2Ndakalanga, mpawo ndakabona bbiza lituba, nkabela ooyo wakatantide ali ndilyo wakajisi buta, eelyo wakapegwa musini wabwami. Mpawo wakainka mbuli muzundi kuti akazunde abambi.

3Mwanaa mbelele naakamana kumatula ciga cabili, ndakamvwa cilenge cabili kaciti, “Boola!” 4Mpoonya kwakazwa bbiza limbi, eeli lyakali kusalala. Ooyo wakatantide ali ndilyo wakapegwa nguzu zyakubusya nkondo ansi aano, kuti bantu bajayane muli cabo beni. Wakapegwa apanga pati.

5Lino Mwanaa mbelele naakamatula ciga catatu, ndakamvwa cilenge catatu cakati, “Boola!” Mpoonya kwakazwa bbiza limbi, lyalo lyakali kusiya. Ooyo wakatantide ali ndilyo wakalijisi cipimyo mujanza lyakwe. 6Mpoonya ndakamvwa cakali kulimvwisya aanga ndijwi lizwida akati kazilenge zyone, lyakati, “Lufulu lomwe lwabulotwe lulaulwa di lyansiliva lyomwe, mfulu zyotatwe zyamaila zilaulwa mbubonya, pele mutanyonyooni mafuta awaini.”

7Lino naakamatula ciga cane, ndakamvwa jwi lyacilenge cane lyakati, “Boola!” 8Mpawo ndakalanga, ndakabona bbiza litubuluka. Ooyo wakatantide ali ndilyo zina lyakwe wakali Lufu, nkabela cikkalilo cabafu cakali mutobede munsi. Aaba bakapegwa nguzu zyakujaya cibeela cane canyika kwiindila mukuleta nkondo, nzala, malwazi, alimwi abanyama babutambo.

9Lino Mwanaa mbelele naakamatula ciga casanu, ndakabona kunsi aacipaililo myuuya yabaabo bakajaigwa akaambo kakukambauka majwi aa Leza alimwi akaambo kabumboni oobo mbubakali kupa. 10Bakapozomoka bakati, “O Mwami Singuzuzyoonse, Oosalala, Oosinizizye, ino ndilili noti kabeteke akusubula bantu bali ansi aabo bakatujaya?” 11Mpoonya omwe-omwe wabo wakapegwa jansi lituba akaambilwa kuti balindile akulyookezya kaindi kaniini mane kusikila babelesinyina, babunyina abalo bajaigwe mbuli mbubakajaigwa balo.

12Lino naakamatula ciga cacisambomwe, ndakalanga eelyo nyika yakazungaana kapati. Zuba lyakabaya, lyaba mbuli cisani cisiya mbi, mwezi wakasalala pyu mbuli bulowa. 13Nyenyezi zyakawida ansi mbuli nkuyu zitana bizwa mbozi mbulumukila ansi ciindi guwo nolibbubbula. 14Julu lyakagwisigwa mbuli kanseme kavungwa, eelyo malundu ansumbu zyoonse zyakagwisigwa aawo mpozyakabede. 15Mpoonya aawo bami baansi, beendelezi, bapati balumamba boonse, bavubi, basinguzu, abantu buyo, bazike naa bazyale, bakayuba mumpangala, alimwi amumyaala yamumalundu. 16Bakaambila malundu aamyaala kuti, “Amutuwide mutusise kuzwa kuli yooyo uukkede acuuno cabwami akutuvuna kuzwa kubukali bwa Mwanaa mbelele! 17Nkaambo buzuba bwabukali bwabo bwasika, ino nguni uukonzya kubuyumina?”

Currently Selected:

Ciyubunuzyo 6: Tonga96

Highlight

Copy

Compare