Ciyubunuzyo 7

Bantu ba Isilayeli bali zyuulu zili mwaanda amakumi one azine

1Musule lyayaaya ndakabona bangelo bone baliimvwi muzyooko zyone zyanyika. Bakasinkila myuuwo yone kutegwa luuwo lutaungili ansi nimuba mulwizi nikuba kuungila kumusamu nuuba buti. 2Mpoonya ndakabona aumwi mungelo wakazwida kujwe kajisi acidityo ca Leza uupona. Wakapozomokela bangelo bone aabo Leza mbaakapa nguzu zyakunyonyoona nyika alwizi. 3Mungelo ooyu wakati, “Mutanyonyooni nyika niluba lwizi noziba zisamu, mane kusikila tubabikke cidinto ankumo babelesi ba Leza wesu.” 4Eelyo ndakaambilwa kuti mweelwe wabantu aabo bakabikkwa cidinto ca Leza ankumo zyabo wakali zyuulu zili myaanda iili makumi one azine. Bakazwa kumisyobo ya Isilayeli iili kkumi aibili. 5Kumusyobo wa Juda, bakabikkwa cidinto bakali zyuulu zili kkumi azibili. Kumusyobo wa Lubeni bakali zyuulu zili kkumi azibili. Kumusyobo wa Gadi, bakali zyuulu zili kkumi azibili. 6Kumusyobo wa Asya bakali zyuulu zili kkumi azibili. Kumusyobo wa Nafutali bakali zyuulu zili kkumi azibili. Kumusyobo wa Manase bakali zyuulu zili kkumi azibili. 7Kumusyobo wa Simiyoni bakali zyuulu zili kkumi azibili. Kumusyobo wa Levi bakali zyuulu zili kkumi azibili. Kumusyobo wa Isakaa bakali zyuulu zili kkumi azibili. 8Kumusyobo wa Zebuluni bakali zyuulu zili kkumi azibili. Kumusyobo wa Josefa bakali zyuulu zili kkumi azibili. Kumusyobo wa Benjamini bakabikkwa cidinto bakali zyuulu zili kkumi azibili.

Zyabantu banji batabaliki

9Musule akooku ndakalanga eelyo ndakabona bantu banji batabaliki. Bakazwa kumisyobo yoonse, kuzisi zyoonse, kumilaka yoonse, akumyaambo yoonse. Bakaima kumbele lyacuuno cabwami akumbele lya Mwanaa mbelele, bakasamide majansi aatuba kumwi kabajisi amalala. 10Bakapozomoka bakati, “Lufutuko luzwa kuli Leza wesu uukkede acuuno cabulemu alimwi aku Mwanaa mbelele!” 11Mpoonya bangelo boonse bakaima kabazingulukide cuuno cabwami. Abalo bapati, azilenge zyone zyaima mbubonya buyo. Bakali waala ansi akuvuntama kumbele lyacuuno, bakomba Leza 12bati, “Akube boobo!” Leza wesu atembaulwe, apegwe bulemu, busongo, alumbwe, alemekwe anguzu zyoonse mane kukabe kutamani. Akube boobo.

13Umwi wabapati wakandibuzya kuti, “Ino aaba bantu basamide majansi aatuba mbaani, alimwi ino bazwayi?”

14Mebo ndakamwiingula kuti, “Nduwe oozi simalelo wangu.”

Mpawo wakandaambila kuti, “Aaba mbaabaya bakazwa mumapenzi mapati. Bakasanzya majansi akwaatubya mubulowa bwa Mwanaa mbelele. 15Nkakaambo ncobaimvwi kumbele lyacuuno ca Leza, balamukomba sikati amasiku muŋanda yakwe. Ooyo uukkede acuuno cabwami uyookkala ambabo akubakwabilila. 16Tabakooyoofwa limbi nzala niiba nyota, tabakooyoopenga limbi azuba noluba lumwi. 17Nkaambo Mwanaa mbelele uuli akati kacuuno cabwami, uyoobeembela akubasolweda kutusensa twamaanzi tupa buumi. Eelyo Leza uyoosansamuna misozi yabo yoonse.”

Currently Selected:

Ciyubunuzyo 7: Tonga96

Highlight

Copy

Compare