Intembauzyo 50
50
Lwa Asafu
1Mwami Leza Singuzuzyoonse, ulaita nyika yoonse,
ulaiita kuzwa kupaswida zuba kuyoosikila nkolibbilila.
2Kuzwa ku Ziyoni munzi wakwe weebeka, Leza ulabala.
3Mbwaasika Leza wesu takooumuna buyo pe,
kumbele lyakwe kuli mulilo uusyukutya, kubbubbula guwo mumbali lyakwe.
4Uloompolola majulu anyika, uloompolola kuti abeteke bantu bakwe.
Naompolola ulati,
5“Nobasalali bangu amubungane, nywebo nimwakapanga cizuminano andime muzipaizyo.”
6Aaambilizye zyabulemu bwako majulu eeni,
nkaambo yebo O Leza lwako omwini nduwe mubetesi.
7“Nkoo amuswiilile nobantu bangu ndaambe,
lwako Isilayeli teelela nkwaambile mulandu wako,
ndendime Leza, Leza wako.
8Nsikutapatili akaambo kazituuzyo zyako,
naa zipaizyo zyakutenta nzebona lyoonse.
9Poho uuzwa kucimpati cako nsikoomutambula,
nsikootambula naba sijembwe uuzwa mucaanda cako.
10Teekayi banyama boonse bamusokwe mbibangu,
kubikkilizya aŋombe zili mutulundu tuli cuulu.
11Nibaba bayuni bali muzilundu ndibazi,
zilenge zyoonse zyamusokwe nzizyangu.
12Kuti nikwali kufwa nzala, nindatakwaambila,
kayi nyika azyoonse zili mulinjiyo nzizyangu.
13Sena nndya nyama yabapoho, naa kunywa bulowa bwampongo?
14Nkoo, pa zipaizyo zyakulumba kuli Leza,
zuzukizya zikonke zyako kuli Sijulu wamajulu.
15Nkoo, kandiite mubuzuba bwamapenzi, ndiyookuvuna, eelyo yebo uyoondilemeka.”
16Leza kuli sizinyonyoono ulati,
“Ujisi nguzu nzi kuyabwaamba zyamilawo yangu,
kwaamba cizuminano cangu amulomo wako?”
17Kayi toyandi kulaigwa, majwi aangu waasiya kusule lyako.
18Ubone mubbi, waba mweenzinyoko, balongwe bako mbaasimamambe.
19Ubelesya mulomo wako kwaamba zibi, mulaka wako ngwakubeja.
20Uvwiya munyoko wakkala, mwanaakwenu mwida ngobejelezya.
21Zyoonse eezi noolikuzicita mebo ndaumwine buyo.
Wali kuyeeya kuti mebo ndimbuli nduwe, ono ndakuzula, ndakupa mulandu.
22Nywebo nomulubide Leza amwaayeeye makani aaya,
nentakwe kumukwamauna-kwamauna kwabula uumuvuna.
23Uundilemeka nguyooyo uuleta zipaizyo zyakulumba,
ubamba nzila yakwe kuti mebo nde Leza nkamufutule.
Currently Selected:
Intembauzyo 50: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
