Intembauzyo 49
49
Kumweendelezi wanyimbo, lwabana ba Kola
1Nobantu nyoonse amuswiilile eeci,
nyoonse nomukkede munyika eeyi amumvwe.
2Amumvwe nobantu buyo anomulemenede,
amumvwe nobavubi anobacete.
3Nyanda kwaamba majwi aabusongo ono,
cizwa mukumvwisya zintu ncetaambe.
4Ndacenjeka kutwi kwangu kukasimpi,
ndapandulula kalabi kangu mukantimbwa.
5Ani njoowe nzi muciindi camapenzi,
ciindi bantu babi basilucengo nobandizinguluka,
6bantu basyoma buvubi bwabo,
balikankaizya akaambo kakuvula kwalubono lwabo?
7Masimpe, taakwe muntu uukonzya kulinununa lwakwe mwini pe,
naba uukonzya kupa Leza cinunuzyo cabuumi bwakwe.
8Kayi cinunuzyo cabuumi ciladula, taakwe uunga wacibbadela bweelede.
9Uunga wacibbadela kuti kapona kwalyoonse alyoonse,
kucibbadelela kuti atakasiki kucuumbwe akubola.
10Boonse balabona kuti abalo basongo balafwa,
mbubonya buyo abafuba-fuba batakwe maanu balaloba,
lubono lwabo basiila bambi.
11Zyuumbwe zyabo nzyezinooli maanda aabo lyoonse,
nkobanoobede ooko kwamazyalani amazyalani,
nikuba kuti myuunda yabo bakayuulikide mazina.
12Avube, avube buti muntu, takkalili pe, ulibuyo mbuli banyama bafwidilila.
13Nzila yabasikami-kami njeeyi, yabaabo bazuminina buvubi bwabo ili boobu,
14bayoosika kwacivumwe, mbuli mbelele, bayoofwa, bayooembelwa alufu.
Bayooendelezegwa abalulami cifumo-fumo, mucuumbwe mibili yabo iyoobola.
Kwacivumwe nkokuyooba kumunzi wabo.
15Kuzwa kunguzu zyalufu Leza uyoondinununa, masimpe uyoonditambula.
16Utayoowi muntu uujisi lubono lunji,
ciindi bulemu bwaŋanda yakwe bwaakuvula,
17nayoofwa taakwe ncayootolelela. Bulemu bwakwe tabukamutobeli pe.
18Nikuba kuti naakali kupona wakali kulyaamba kuti ulilelekedwe,
abantu kabamulumbaizya akaambo kakuzwidilila kwakwe,
19uyooya kumuyabanji kuli basikale bakwe bataboni mumuni alili.
20Muntu uuvubide uutamvwisyi zintu taindene abanyama bafwidilila.
Currently Selected:
Intembauzyo 49: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
