Intembauzyo 45
45
Kumweendelezi wanyimbo, aimbye bwiimbwa yampana zyabana ba Kola mbuli Masikili aalukwato.
1Nnzwide makani mabotu mumoyo wangu, kwiimbila Mwami Leza nkwelibambilila,
mbuli cilembyo camulembi uucibwene mbuubede mulaka wangu.
2Nduwe ooyebeka kwiinda baalumi boonse, milomo yako njaluse,
nkaako Leza ulakuleleka akutamani.
3Yebo osintanze, anga panga lyako mukasolo, ubonwe ma, usame bulemu abwami.
4Tanta cakuzunda mubulemu bwako, tondezya lusinizyo abululami bwako,
milimo yako iiyoosya iitondezegwe ajanza lyako lyalulyo.
5Iibbwabule myoyo mivwi yako iibosya,
ibbwabulwe myoyo yabasinkondonyoko omwami,
iizundwe misyobo akuwida kunsi lyamaulu aako.
6Ncalyoonse alyoonse cuuno cako cabwami, O Leza.
musako wabululami nguuyooba musako wako ngobetesya.
7Sikuyanda bululami ulasulaika bubi,
atala lyabeenzinyoko mpaakubikka Leza wako,
wacita eeci naakunanika mafuta aalutangalo.
8Bweema bununkilila mbobuzwa kuzisani zyako, bweema bwa maya,
aloisi alimwi a kasiya, maanda aabwami alibotelezegwe ameja aa bazovu,
ooko nkokuzwa nyimbo zyazingwali-ngwali zikubotezya.
9Akati kabakaintu balemekwa mpaajanika bana basimbi babami.
Kulubazu lwako lwalulyo kwiimvwi nabwiinga waciinga cabwami
uusamide zyangolida yaku Ofi.
10Lino cenjeka kutwi uswiilile, omwana musimbi, luba zyabantu bako, zyamukwasyi wauso.
11Akaambo kakuti ulimweebesi, mwami ulakuyanda, mmulemeke nkaambo mmwami wako.
12Bayooletelezya zipego bantu baku Taya, bayookulemeka bavubi.
13Banoojisi buvubi bwamisyobo-misyobo.
Wasama mwanaa mwami muŋanda yakwe,
zisani zyakwe zisuminidwe ngolida.
14Kasamide zisani zinyekawidwe uyootolwa kumwami,
unooli aabeenzinyina basimbi batazi mwaalumi,
kabamusindikila bazoosika kuli nduwe.
15Banootangede akukondwa baakuletwa, bayoonjila muŋanda yabwami.
16Uyoozyala bana balombe banji yebo omwami,
mbabayootola masena aabasikale babo, munyika yoonse mbabayooba bami.
17Kumazyalani oonse njooibalusya mpuwo yazina lyako,
nkaako iyookutembaula misyobo yoonse kukabe kutamani.
Currently Selected:
Intembauzyo 45: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
