Intembauzyo 44
44
Kumweendelezi wanyimbo. Aimbye bwiimbwa Masikili aabana ba Kola
1Twakalimvwida tobeni O Leza, basikale besu bakatwaambila,
eezyo nzyookacita muciindi ncibakali kupona.
2Ajanza lyako wakatanda misyobo, mumasena aayo wakabikka basikale besu.
Wakapwaya bantu bamisyobo eeyo, basikale besu wakabacita kuti bazwidilile.
3Tiibakiitola nyika amapanga aabo, tiibakazunda anguzu zyabo,
pele ajanza lyako lyalulyo, akuboko kwako kwini, alimwi aluse lwako
wakabatondezya kuti ulabayanda.
4Nduwe Mwami, Leza wangu, uusungula kuti Jakobo azunde.
5Basinkondoma bapilukila musule nkaambo kanduwe,
batulwana tulabalyatauka akubazunda muzina lyako.
6Nsisyomi buta bwangu mebo pe, talili panga lyangu lindizundya.
7Ootuzundya basinkondoma nduwe, ubajazya nsoni batucimwa nduwe.
8Muli Leza motulikankaizizya buzuba abuzuba,
alimwi tunoolitembaula zina lyako kukabe kutamani.
9Lino watubombya, watutakata, tocuunki ampi zyesu.
10Wacita kuti tutije basinkondoma, basinkondoma bakatusaala.
11Wakatulekelezya, twakazazaulwa mbuli mbelele, watumwaila akati kamisyobo imwi.
12Mbuli cintu citakwe muulo mubotu mboouzya bantu bako,
kunyina ampindu njoojana noobauzya.
13Watucita cisesyo kuli baabo mbotukkalaamwi,
twaba cisampuzyo akasimi kuli baabo mbotubambene limwi.
14Twaba cisesyo akati kamisyobo imwi, bapukusa mitwe bantu batubona.
15Ndisampukide buzuba boonse, ndifwa bweeme lyoonse,
16nkaambo aabo bandiseka akundinonga baabonena bandipilusizya bubi basinkondoma.
17Zyoonse eezi zyakacitika kuli ndiswe, nikuba kuti tiitwakakuluba,
nikuba kutasyomeka ku cizuminano cako.
18Myoyo yesu tiiyakatyompwa, nikuba kusiya nzila zyako.
19Pele wakatupwaya akutusiya akati kabamwaaba,
umane wakatuvumba amudima uusiya mbi.
20Kuti naa twakaluba nzila zyako O Leza wesu, nikuba kukomba mutuni,
21sena Leza nootakacibona eeci? Kayi ulaazi maseseke aamumyoyo.
22Akaambo kanduwe tulajaigwa buzuba boonse, tubalwa mbuli mbelele ziya kukujaigwa.
23Sinsimuka, sena ucoona O Mwami? Buka! Utatukakili limwi.
24Nkaambo nzi nootufutatila, waluba kudyamininwa kwesu.
25Twawida ansi mulusuko, mibili yesu mbandaa ansi!
26Nyamuka utugwasye, utununune akaambo kaluyando lwako lutazungaani.
Currently Selected:
Intembauzyo 44: Tonga96
Highlight
Copy
Compare
Share
Want to have your highlights saved across all your devices? Sign up or sign in
Tonga Bible © United Bible Societies, 1994.
